Hechos 9 - DIOSPA QHELQACHISQ

Sauloqa Jesuspi atinikun

¹ Chaykama Sauloqa Tukuyta Kamachej Jesusta qhatikojkunata wañurachillaytapuni munaspa, kuraj kaj sacerdotewan parlaj rerqa.

² Paymantataj cartakunata qonanta mañakorqa, Damasco llajtapi judiokunaj tantakunanku wasipi rikuchimunanpaj. Chay cartanejtataj kuraj kaj sacerdoteqa Sauloman atiyta qorqa, Jesuspa cheqan ñanninta qhatikojkunata jap'ispa cadenawan watasqata Jerusalenman apananpaj, qharikunapis, warmikunapis kachunku.

³ Jinapi Saulo ñanta rishaspa, Damasco llajtaman qayllaykushajtinña, janajmanta ujllata uj k'anchay payta muyuykorqa.

⁴ Paytaj pampaman choqakorqa, parlamojtataj uyarerqa: Saulo, Saulo, imaraykutaj qhatiykachashawankiri? nispa.

⁵ Chantá Saulo taporqa: Wiraqochi, pitaj kankiri? nispa. Parlamojtaj kuticherqa: Noqa Jesús kani, pitachus qan qhatiykachashanki, chay. Manamin allinchu qanpajqa buey jina ayjonpa puntanta jayt'anaykeqa, icharí? nispa.

⁶ Saulotaj manchariywan kharkatitispa, nerqa: Tukuyta Kamachej, imatataj munanki ruwanaytari? nispa. Jesustaj kuticherqa: Jatarispa, llajtaman yaykuy, chaypitaj nisonqanku imatachus ruwanaykita, nispa.

⁷ Saulowan rejkuna manchariywan mana parlariyllatapis aterqankuchu, imaraykuchus ni pita rikuspa, parlamojllata uyarerqanku.

⁸ Jinapi Sauloqa pampamanta sayarispa, ñawinta kicharerqa, manataj imatapis rikuyta aterqachu. Chantá paywan rejkuna makinmanta aysaspa, Saulota Damasco llajtaman pusaykorqanku.

⁹ Chaypitaj Saulo kinsa p'unchay junt'ata mana rikuspa karqa, manallataj ni imata mikhorqachu nitaj ujyarqachu.

¹⁰ Chaypacha Damasco llajtapi, Jesusta qhatikoj uj runa karqa, Ananías sutiyoj. Paymantaj Tukuyta Kamachej Jesús mosqoypi jina rikhurispa, nerqa: Ananías, nispa. Paytaj kuticherqa: Tukuyta Kamachej Jesús, imatataj niyta munawankiri? nispa.

¹¹ Tukuyta Kamachejtaj Ananiasta nerqa: Jatarispa, Paña nisqa callepi, Judaspa wasinman riy. Chaypitaj Tarso llajtayoj Saulomanta tapukuy, imaraykuchus payqa Diosmanta mañakushan.

¹² Paytaj mosqoypi jina rikun Ananías sutiyoj runata payman yaykumuspa, makinwan llankhaykojta, watejmanta rikuyta atinanpaj, nispa.

¹³ Ananiastajrí kutichispa, nerqa: Tukuyta Kamachej Jesús, ashkha runaña willawanku imaynatachus Jerusalenpi chay Sauloqa qanpi atinikojkunata anchata ñak'arichisqanta.

¹⁴ Kay llajtamanpis kuraj sacerdotekunaj carta qosqankuwan jamun, pikunachus sutiykita oqharispa Diosninkupaj rejsikapusojkunata presochaspa apananpaj, nispa.

¹⁵ Tukuyta Kamachej Jesustaj nerqa: Rillay, imaraykuchus noqaqa payta ajllakuni kamachiy kananpaj, noqamanta willananpaj mana judío kajkunaman, kuraj kamachejkunaman, jinallatataj israelitakunamanpis.

¹⁶ Chantá payman rikuchillasajtaj may chhikatachus sutiyrayku ñak'arinanta, nispa.

¹⁷ Ajinaqa Ananías chay wasiman rispa, chayman yaykorqa, Saulota rikuspataj, makinwan llankhaykorqa, nerqataj: Saulo wawqéy, Tukuyta Kamachej Jesús, pichus kayman jamushajtiyki ñanpi rikhurisorqa, paymin kachamuwan watejmanta rikuyta atinaykipaj, jinataj Santo Espíritoj kamachiyninpi kanaykipaj, nispa.

¹⁸ Chaypacha ujllata Sauloj ñawinmanta qherpa jina t'akakorqa, watejmantataj rikorqa. Jatarispataj, bautizachikorqa.

¹⁹ Chaymantataj Sauloqa mikhuspa, watejmanta kallpachakorqa. Chantá Damascopi pisi p'unchaykunata qhepakorqa Jesusta qhatikojkunawan khuska.

Sauloqa Jesusmanta Damascopi willan

²⁰ Chaymantapacha Sauloqa judiokunaj tantakunanku wasipi willarayta qallarerqa, Jesusqa Diospa Churin kasqanta.

²¹ Saulota uyarejkunatajrí t'ukuspa, tapunakusharqanku: Manachu kay runaqa Jerusalenpi pikunachus Jesuspa sutinta oqharispa Diosninkupaj rejsikapojkunata qhatiykachasharqa chinkachinanpaj? Manachu kaymanpis jamullarqataj, paykunata cadenawan watasqata kuraj sacerdotekunaj ñawpaqenman apananpaj? nispa.

²² Saulotajrí astawan kallpachakuspa, sut'ita willararqa Jesusqa Cristopuni kasqanta, Damascopi tiyakoj judiokunataj mana imatapis kutichiyta aterqankuchu.

Saulo judiokunamanta ayqen

²³ Chaymanta qhepaman judiokunamanta wakinkuna tantakuspa, yachachinakorqanku Saulota wañuchinankupaj.

²⁴ Jinapi tuta p'unchay llajtamanta llojsina punkukunapi wateqarqanku, payta wañuchinankupaj. Saulotajrí imatachus wakichikusqankumanta uyarerqa.

²⁵ Chayrayku uj ch'isi Jesusta qhatikojkunaqa Saulota uj jatun canastapi llajtaj perqanta urayk'ucherqanku ayqekunanpaj.

Sauloqa Jerusalenman rin

²⁶ Jerusalén llajtaman chayaspa, Sauloqa Jesusta qhatikoj masinkunawan tantakuyta munarqa. Paykunatajrí payta manchachikorqanku, imaraykuchus mana creerqankuchu paykuna jinallataj Jesuspi atinikoj kasqanta.

²⁷ Jinapi Bernabé sutiyojqa Saulota pusarqa Jesuspa kuraj kachankunaman rejsinachinanpaj. Chantá Bernabé paykunaman willarqa Saulo imaynatachus Tukuyta Kamachej Jesusta ñanpi rikusqanta, imaynatatajchus Jesús payman parlasqanta ima. Paykunaman willallarqataj Saulo imaynatachus Damascopipis mana manchachikuspa Jesusmanta willarasqanta.

²⁸ Ajinamanta Sauloqa Jesucristota qhatikojkunawan Jerusalenpi qhepakorqa. Chantá paykunawan khuska tukuynejman rerqa, mana manchachikuspataj, Jesusmanta willararqa.

²⁹ Ajinallatataj Saulo griego rimayta parlaj judiokunawan parlaspa, churanakorqa. Paykunarí chaymanta Saulota imaynamantapis wañuchiyta mask'arqanku.

³⁰ Chayta yachaspa, wawqe panakunaqa Saulota pusarqanku Cesarea llajtaman. Chaymantataj Tarsoman payta kachaporqanku.

³¹ Chaykama Iglesiaqa allillan kasharqa tukuy Judeapi, Galileapi, Samariapi ima. Jesusta qhatikojkunataj Diospa wawan jina wiñasharqanku, ashkhayasharqankutaj Santo Espíritoj yanapayninwan. Chantá Tukuyta Kamachej Jesusta may respetowan qhawaspa kawsakusharqanku.

Pedroqa Eneasta qhaliyachin

³² Pedroqa wawqe panakunata watukoj tukuynejta purishaspa, uj kuti Lida sutiyoj llajtaman chayarqa, Jesusta qhatikojkunata waturikunanpaj.

³³ Chaypitaj Eneas sutiyoj runawan tinkukorqa. Pay suchu kasqanrayku, pusaj watataña puñunanmanta mana sayarisqachu.

³⁴ Jinapi Pedroqa payta nerqa: Eneas, Jesucristo qhaliyachisunki. Sayariy, puñuna mast'anaykita oqhariy, nispa. Eneastaj sayarerqapacha.

³⁵ Chantá Lidapi, Sarón llajtapi tiyakojkuna ima Eneasta purishajta rikuspa, Tukuyta Kamachej Jesuspi atinikorqanku.

Pedroqa Dorcasta kawsarichin

³⁶ Chaypacha Jopepi tiyakorqa Jesusta qhatikoj uj warmi, Tabitá sutiyoj, griego rimaypitaj sutin Dorcas karqa. Paytaj allin imakunata ruwaj, wajchakunatapis yanapajpuni.

³⁷ Chaymanta qhepanejman Dorcas onqoykuspa, wañuporqa. Chantá Dorcaspa ayanta mayllaspa, panakunaqa altopata wasiman churarqanku.

³⁸ Jope llajtaqa mana karupichu karqa Lida llajtamanta. Chayrayku Jesusta qhatikoj chay wawqe panakuna Lidapi Pedro kasqanta yachaspa, iskay runakunata kacharqanku ajinata nichispa: Ama jinachu kay, kunanpacha jamuriwayku ari, nispa.

³⁹ Chantá Pedro paykunawan rerqa. Jopeman chayajtinkutaj, wawqe panakuna Pedrota altopataman pusarqanku. Chaypitaj warmisapakuna waqaspa, Pedroman rikucherqanku Dorcas wajkunapaj ruwapusqan p'achakunata, aymillakunata ima.

⁴⁰ Jinapi Pedroqa tukuyninkuta jawaman llojsicherqa, qonqoriykukuspataj Diosmanta mañakorqa. Chantá wañusqata qhawarispa, nerqa: Tabitá, sayariy, nispa. Chay warmitaj ñawinta kicharispa, Pedrota rikorqa, tiyarikorqataj.

⁴¹ Pedrotaj makinmanta aysarispa, sayaricherqa. Chaymantataj warmisapakunata, Jesusta chay waj qhatikojkunata ima wajyaspa, Dorcasta kawsashajta paykunaman rikucherqa.

⁴² Chaypacha Pedro chay warmita kawsarichisqan tukuy Jope llajtapi yachakorqa, ashkha runataj Tukuyta Kamachej Jesucristopi atinikorqanku.

⁴³ Pedrotaj Jopepi unayta qhepakorqa, suela ruwaj Simonpa wasinpi.