Hechos 4 - DIOSPA QHELQACHISQ

Pedrowan Juanwan Jatun Juntaj ñawpaqenpi

¹ Pedrowan, Juanwan ima chay runakunaman parlashallajtinkuraj, chayamorqanku wakin sacerdotekuna, Templota qhawajkunaj kamachejninku, saduceokuna ima.

² Paykunataj anchata phiñakorqanku, imaraykuchus Pedrowan, Juanwan ima yachachisharqanku wañusqakunaqa Jesusnejta kawsarimpunankuta.

³ Chayrayku Jesuspa chay kuraj kachankunata jap'ispa, q'ayantinkama carcelman wisq'aykucherqanku, ch'isiña kasqanrayku.

⁴ Chaywanpis chay uyarejkunamanta ashkha runakuna Jesuspa kuraj kachankunaj nisqankuta jap'ikorqanku. Qharikunallata yupaspa, 5.000 jina karqanku.

⁵ Q'ayantenqa Jerusalenpi tantakorqanku Israelmanta kamachejkuna, kurajkuna, Diospa kamachisqanmanta yachachejkuna ima.

⁶ Chayman jamullarqankutaj kuraj kaj sacerdote Anás, chantá Caifás, Juan, Alejandro, kuraj kaj sacerdotej tukuy ayllunkuna ima.

⁷ Chaymantataj Pedrota, Juantawan pusachimuytawan, ñawpaqenkupi sayaykuchispa, tapuyta qallarerqanku: Ima atiywantaj, chayrí pejpa sutinpitaj kay tukuy imata ruwashankichejri? nispa.

⁸ Chantá Pedroqa Santo Espíritoj kamachiyninpi kaspa, ajinata kuticherqa: Israelitakunata kamachejkuna, kurajkuna ima.

⁹ Kunan p'unchay qankuna tapushawayku uj suchu runapaj allin kajta ruwasqaykumanta, yachayta munaspa pinejtachus payta qhaliyachisqaykuta.

¹⁰ Tukuy kurajkuna, tukuy israelitakuna ima allinta yachaychej: Kay suchu runata Nazaret llajtayoj Jesucristoj sutinpi qhaliyacherqayku. Chay Jesustaqa qankuna cruzpi chakatarqankichej. Chaywanpis Diosqa payta wañusqamanta kawsarichimorqa.

¹¹ Paymá chay Jesusqa, pimantachus Diospa Qhelqachisqanpi ajinata nin: Wasi ruwajkunaj pisipaj qhawasqanku rumeqa cimiento esquinapaj sumaj rumiman tukupun, nispa.

¹² Mana waj runanejta pipis qhespichisqa kayta atinmanchu manachayqa Jesucristonejllata. Diosqa tukuynin kay pachapi mana waj sutita churanchu, paypi atinikuspa noqanchej qhespichisqa kananchejpaj, nispa.

¹³ Chaypacha kurajkuna mayta t'ukorqanku Pedrotawan, Juantawan mana manchachikuspa parlajta rikuspa. Astawanqa chay kurajkuna yacharqanku Pedrowan, Juanwan mana sumaj yachaj runakunawanchu yachakusqankuta. Jinapis repararqanku paykuna Jesuswan khuska purisqankuta.

¹⁴ Jinallataj chay qhaliyachisqa suchu runata Jesuspa kuraj kachankunawan khuska sayashajta rikuspa, kurajkunaqa mana imatapis niyta aterqankuchu.

¹⁵ Chantá chay kurajkunaqa Pedrotawan, Juantawan jawaman llojsichispa, paykunapura parlanakorqanku.

¹⁶ Paykuna nerqanku: Imatataj ruwasun kay runakunawanri? Jerusalenpi tukuy tiyakojkuna yachanku runaj mana jayk'aj rikusqan t'ukunata ruwasqankuta. Chayta mana pakayta atisunmanchu.

¹⁷ Chaywanpis amaña Jesusmanta yachachisqankuta tukuynejman junt'achinankupaj kay iskay runakunata manchaykuchina ama kunanmanta qhepaman ni piman Jesuspa sutinpi parlanankupaj, nispa.

¹⁸ Jinapi, Jesuspa kuraj kachankunata wajyachispa, chay kurajkunaqa kamacherqanku amaña pimanpis Jesusmanta parlanankuta, nitaj Jesuspa sutinpi imatapis yachachinankuta.

¹⁹ Jinapi Pedrowan, Juanwan ima kuticherqanku: Qankuna unancharispa niwayku qankunata kasunaykuchus, chayrí Diosta kasunaykuchus aswan allin kasqanta.

²⁰ Noqaykurí mana ch'in kayta atisqaykuchu. Manachayqa imatachus rikusqaykuta, uyarisqaykuta ima willaranaykupuni tiyan, nispa.

²¹ Ajinamanta kurajkuna maytapuni paykunata manchaykuchispa, Pedrota, Juantawan kachariporqanku. Jasut'iytapis mana aterqankuchu runakunata manchachikuspa, imaraykuchus tukuy runakuna Diosta yupaychasharqanku runaj mana jayk'aj rikusqan t'ukunata rikusqankumanta.

²² Chay suchu runa, pitachus t'ukunata ruwaspa qhaliyachisqanku, chay tawa chunka watayoj jinaña karqa.

Jesucristota qhatikojkuna Diosmanta kallpata mañakunku

²³ Judío kurajkuna paykunata kacharisqankutawan, Pedrowan, Juanwan ima Jesucristota qhatikoj masinkuman rispa, willarqanku imatachus kuraj sacerdotekuna, kurajkunawan ima paykunaman nisqankuta.

²⁴ Jesucristota qhatikojkunataj chayta uyarispa, tukuyninku uj sonqolla jatunmanta parlaspa Diosta nerqanku: Tukuyta Kamachej Dios, qanqa janaj pachata, kay pachatawan, mama qochatapis, tukuy ima chaykunapi kajkunatawan ruwarqanki.

²⁵ Qanllataj Santo Espiritunejta ñawpa tatayku kamachiyki Davidpa siminnejta parlaspa, nerqanki: Imaraykutaj suyukuna oqharikunkuri? Imaraykutaj runakunapis qhasi manakajta ruwayta yuyaychakunkuri?

²⁶ Kay pachapi kuraj kamachejkuna, kurajkunawan ima Diospa contranta oqharikunku, ajllakusqan Cristoj contranpiwan ima, nispa.

²⁷ Ajinamanta Herodeswan, Poncio Pilatowan kay llajtapi tantakorqanku mana judío kajkunawan, israelitakunawan ima ajllasqa kamachiyki Jesuspa contranpi oqharikunankupaj, pitachus qan ajllakorqanki, paypa contranpi.

²⁸ Chaywanpis imatachus paykuna ruwarqanku, chaytaqa qallariymantapachaña qan atiyniykiwan wakicherqanki, munayniykiman jina ruwasqa kananpaj.

²⁹ Kunanqa Tukuyta Kamachej Dios, qhawariy imaynatachus paykuna phiñakuspa, manchachiwasqaykuta. Chantá kay kamachiykikunata kallpachawayku ari, mana manchachikuspa Simi nisqaykita willanaykupaj,

³⁰ atiyniykiwan onqosqakunata qhaliyachiyta atinaykupaj ima. Yanaparillawaykutaj runaj mana jayk'aj rikusqanta, may t'ukuna imakunata ima ruwanaykupaj ajllakusqayki kamachiyki Jesuspa sutinpi, nispa.

³¹ Chaypacha Jesucristota qhatikojkuna Dioswan parlarikuyta tukusqankutawan, maypichus kasharqanku, chaynej kharkatiterqa. Chaymantataj tukuyninku Santo Espíritoj kamachiyninpi kaspa, Diospa simi nisqanta mana manchachikuspa willallarqankupuni.

Jesucristota qhatikojkuna kapuyninkuwan yanapanakunku

³² Chantá Jesucristopi atinikojkuna uj yuyaylla, uj sonqolla karqanku. Mana pipis nejchu kapuynin paypallata kasqanta, manachayqa tukuy imanku tukuyninkojta karqa.

³³ Chantá Jesuspa kuraj kachankuna Jesucristoj kawsarimpusqanmanta manchay atiywan willararqanku. Diostaj tukuyninkuta mayta yanaparqa.

³⁴ Paykuna ukhupi mana pipis pisichikojchu, imaraykuchus kapuyniyojkuna jallp'ankuta, wasinkuta ima vendej kanku.

³⁵ Chay qolqetataj Jesuspa kuraj kachankunaman apamoj kanku, paykunataj qolqeta rak'iraj kanku sapa ujman, maychus pisichikusqankuman jina.

³⁶ Jinaqa paykuna ukhupi karqa Leví jatun ayllumanta José sutiyoj uj runa, paytaj Chipre churumanta karqa. Jesuspa kuraj kachankuna payta sutichasqanku Bernabé, nispa. Chay niyta munan Sonqochaj.

³⁷ Bernabepis jallp'anta vendeytawan, chay qolqeta apamuspa, Jesuspa kuraj kachankunaman jaywarqa.