Hechos 3 - DIOSPA QHELQACHISQ

Pedroqa suchu runata puririchin

¹ Uj kuti Pedrowan, Juanwan Temploman risharqanku tardenpi kinsa kaj phani chayta. Chay phanitaqa judiokuna tantakoj kanku Dioswan parlarikunankupaj.

² Chaypacha K'acha Punku nisqa Temploj pationman yaykunapi uj runa tiyakusharqa, pichus paqarikusqanmantapacha suchu karqa, chay. Ayllunkunaqa sapa p'unchay chay punkunman payta apaj kanku, chaynejta yaykojkunamanta qolqeta mañakunanpaj.

³ Jinapi suchu runaqa Pedrota, Juantawan Temploj pationman yaykushajta rikuspa, paykunamanta mañakorqa imallatapis qorinankuta.

⁴ Paykuna suchuta allinta qhawarqanku, Pedrotaj nerqa: Qhawariwayku má, nispa.

⁵ Suchu runataj paykunata qhawarerqa, yuyaspa imallatapis qorinankuta.

⁶ Pedrotajrí payta nerqa: Mana qolqe nitaj qoripis tiyapuwanchu. Chaywanpis imachus kapuwasqanta qosqayki: Nazaretmanta Jesucristoj sutinpi sayariy, puririytaj, nispa.

⁷ Chantá Pedroqa suchu runata paña makinmanta jap'ispa sayaricherqa. Chay kikinpachataj runaj chakinwan, moqonkunawan ima thuruyarqanku.

⁸ Chaypacha suchu runaqa ujllata phinkispa, sayarerqa, puriytataj qallarerqapacha. Jinaspataj Jesuspa kuraj kachankunawan khuska Temploj pationman thaskispa yaykorqa, kusiywan phinkiykachaspa, Diosta jatunchaspa ima.

⁹ Jinapi tukuy runakuna payta rikorqanku purishajta, Diosta jatunchashajta ima.

¹⁰ Jinataj rejserqankupacha pay chay suchu runapuni kasqanta, pichus Temploj pationman yaykunapi K'acha Punku nisqapi mañakuspa tiyakoj, chay. Chayrayku mayta t'ukorqanku suchu runa puririsqanmanta.

Pedro Temploj pationpi parlan

¹¹ Chaypacha Pedrowan, Juanwan Salomonpa corredornin nisqapi kasharqanku. Purirej suchu runataj paykunamanta mana kacharikorqachu. Jinapi runakuna mayta t'ukuspa, imata jina chayman tantakamorqanku.

¹² Chantá Pedro chayta rikuspa, paykunata nerqa: Israelitakuna, imaraykutaj kay jinata t'ukushankichejri? Imaraykutaj kay jinatapuni qhawawaykuri? Ichapis qankuna yuyashankichej noqayku atiyniykuwan, chayrí k'acha runa kasqaykurayku kay suchu runata puririchisqaykuta. Mana jinachu.

¹³ Manachayqa Abrahampa Diosnin, Isaacpata, Jacobpata, ñawpa tatanchejkunajta ima kamachin Jesusta churan may jatunpaj qhawasqa kananpaj. Qankunarí Jesusta qhesachaspa, Pilatoman jaywaykorqankichej wañuchisqa kananpaj. Pilatotaj Jesusta kacharipuyta munarqa chaypis, qankuna manapuni munarqankichejchu.

¹⁴ Aswanpis qankunaqa mana juchayoj cheqan kajta ruwajta qhesacharqankichej, cuentanmantataj uj runa wañuchi kacharisqa kananta mañarqankichej.

¹⁵ Ajinata qankuna pichus tukuyman kawsayta qojta wañucherqankichej. Diostajrí payta wañusqamanta kawsarichimorqa, noqaykutaj testigo jina chay rikusqaykuta willayku.

¹⁶ Jesuspa sutinpi atinikusqaykurayku Diosqa kay suchu runata qhaliyacherqa, pitachus qankuna rikunkichej, rejsinkichejtaj, chayta. Jesuspi atinikusqaykurayku ñawpaqeykichejpi kay suchu runaqa puririshan.

¹⁷ Yawar masikuna, noqa kayta yachani: Jesusta wañuchispa, qankuna imatachus ruwasqaykichejta mana yacharqankichejchu, nillataj kamachejniykichejkunapis yacharqankuchu.

¹⁸ Chaywanpis Diosqa paymanta ñawpa sut'inchajkunanejta sut'inchasqaña paypa kachamusqan Cristo ñak'arinanta. Diostaj chay nisqanta qankunanejta junt'arqa.

¹⁹ Chayrayku Diosman kutirikuychej Jesuspi atinikuspa, juchaykichej pampachasqa kananpaj.

²⁰ Chantá Diosqa janaj pachamanta sonqoykichejta kallpachanqa, chaymantataj Cristota watej kachamonqa, pitachus qallariymantapacha qankunapaj ajllarqa, chayta.

²¹ Kunanqa pay janaj pachallapiraj qhepakonqa, Dios watej tukuy imata mosojyachinankama. Chaymanta Diosqa ajllasqa sut'inchajninkunanejta unaymantapachaña willarqa.

²² Ajinata Moisespis nillarqataj: Diosniykichej noqata jina paymanta uj sut'inchajta jatarichenqa wawqeykichej ukhumanta. Qankunataj payta kasunkichej tukuy ima nisqanpi.

²³ Pillapis Diosmanta chay sut'inchajpa nisqanta mana kasojrí Diospa ayllunmanta wijch'usqa kanqa, nispa.

²⁴ Kay p'unchaymantaqa ñawpajtaña Diosmanta tukuy sut'inchajkuna willarqanku, Samuelmanta qallarispa, jinallataj paypa qhepanta jamojkunapis.

²⁵ Qankunataj Diosmanta sut'inchajkunaj wawan kankichej, chantá ñawpa tataykichejkunawan Diospa trato ruwasqanta jap'erqankichej. Chaypacha Diosqa Abrahamman nerqa: Qanpa mirayniykinejta kay pachapi tukuy runakuna saminchasqa kanqanku, nispa.

²⁶ Chayrayku Churin Jesusta wañusqamanta kawsarichimuspa, Dios payta ñawpajta qankunamanraj kachamorqa, sapa ujniykichej millay kawsayniykichejmanta Diosman kutirikuspa saminchasqa kanaykichejpaj, nispa. Ajinata Pedro chay runakunaman nerqa.