Hechos 28 - DIOSPA QHELQACHISQ

Malta nisqa churupi

¹ Noqayku qocha kantuman chayaspa, Malta nisqa churupi kasqaykuta yacharqayku.

² Chaypi tiyakojkunaqa sumaj sonqowan yanapawarqayku. Jinataj paykuna ninata jap'icherqanku q'oñikunaykupaj, imaraykuchus paramusharqa, chirimusharqataj.

³ Pablorí llant'ata pallasharqa, ninaman enqhananpaj. Jinallapi uj katari ninamanta ayqemuspa, Pabloj makinta khaniykorqa.

⁴ Chaypi tiyakojkunataj Pabloj makinpi katarita warkhurashayajta rikuspa, paykunapura ninakorqanku: Kay runaqa runa wañuchipunichá kanman. Qochapi wañunanmanta llusp'ejtinpis, justiciata ruwaj diosmin mana kawsajta saqenchu, nispa.

⁵ Pablotajrí makinmanta katarita ninaman thalaykuspa, mana imanasqa karqa.

⁶ Paykuna suyasharqanku Pablo punkiykunanta, chayrí ujllata wañusqa wijch'ukunanta. Unayta suyarqanku chaypis, repararqanku Pablo mana imanakusqanta. Chayrayku uj jinatañataj yuyarqanku: Kay runaqa uj dios kasqa, nispa.

⁷ Maypichus kasharqayku, chay qayllapi uj jallp'a karqa chay churupi kamachej Publio sutiyojpata. Paytaj wasinman wajyarikuwarqayku, kinsa p'unchay junt'atataj sumajta mikhuchiwarqayku.

⁸ Chaypacha Publioj tatan puñunanpi onqosqa kasharqa k'aja onqoywan, wijsa q'ewiywan ima. Pablotaj chay onqosqata waturikoj yaykorqa. Chantá Diosmanta mañakorqa, onqosqata makinwan llankhaykuspataj qhaliyacherqa.

⁹ Chayta Pablo ruwajtin, chay churupi waj onqosqakunapis payman jamorqanku, Pablotaj paykunatapis qhaliyachillarqataj.

¹⁰ Chayrayku chay runakuna jatunpaj qhawawarqayku. Barcopi ripunaykupajpis, tukuy imata churapullawarqaykutaj.

Pabloqa Romaman chayan

¹¹ Kinsa killata chay churupi kasqaykumanta, Alejandriamanta jamoj barcopi riporqayku. Chay barcoqa Malta churullapitaj sayasqa chiri pasanankama, sutintaj Castorwan Poluxwan karqa.

¹² Ñawpajta Siracusaman chayarqayku, chaypitaj kinsa p'unchayta karqayku.

¹³ Chaymanta mama qochaj kantullantapuni rispa, Regio llajtaman chayarqayku. Q'ayantintaj uramanta wayramusqanrayku iskay p'unchaypi Puteoliman chayarqayku.

¹⁴ Chaypeqa tarerqayku wawqe panakunata. Paykunataj mañawarqayku qanchis p'unchayta paykunawan karikunaykuta. Chay qhepatataj Roma llajtaman rerqayku.

¹⁵ Chantá Romapi wawqe panakunaqa chayman chayanaykuta yachaspa, ñanman taripaj llojsimorqanku Apio Forokama, wakintaj Kinsa Tabernas nisqakama. Chaypi Pabloqa wawqe panakunata rikuspa, Diosman pachis nerqa, kusiywantaj astawan kallpachakorqa.

¹⁶ Romaman chayasqaykutawantaj, kamachejkunaqa mana carcelmanchu Pablota wisq'acherqanku. Manachayqa waj wasipi sapanta kananta saqerqanku, uj soldadotawan payta qhawananpaj.

Pabloqa judiokunaman Jesusmanta willan

¹⁷ Kinsa p'unchayninman, Pablo wajyacherqa Romapi tiyakoj judío kurajkunata. Tantakamojtinkutaj, Pablo paykunata nerqa: Wawqekuna, noqa mana ima juchata ruwarqanichu llajta masinchejkunaj contranpi, nitaj ñawpa tatakunaj usunkutapis p'akerqanichu. Aswanpis wakinkuna mana imallamanta Jerusalenpi presochawarqanku. Jinaspataj, Romaj churasqan kamachejkunaj makinkuman jaywaykuwarqanku.

¹⁸ Chay kamachejkunaqa judío masinchejkunaj juchachawasqankumanta allintapuni tapuwarqanku. Chantá noqapi mana ima juchata wañuchinawankupaj jina tarispa, kacharipuwayta munarqanku.

¹⁹ Chay judiokunatajrí mana kacharinawankuta munarqankuchu. Chayrayku noqa mañakorqani Romapi kuraj kamachej César uyarinawanta. Chaywanpis mana llajta masiykunata ch'atayta munaspachu kaypi kashani.

²⁰ Chayrayku noqa wajyacherqaykichej qankunata rikuyta munaspa, kay imakunamanta parlanaypaj: Noqaqa Israel ayllunchejpa suyakuyninrayku kay cadenawan watasqa kashani, nispa.

²¹ Chantá judío kurajkunaqa Pabloman kuticherqanku: Judeamanta mana ni ima cartata qanmanta willachispa apachimuwaykuchu, nitaj mayqen wawqepis jamunchu qanmanta ima mana allintapis willaj.

²² Chaywanpis, noqayku qanpa simiykimanta uyariyta munayku imatachus yuyasqaykita, imaraykuchus uyariyku ashkha runakuna chay Jesuspa yachachisqanta qhatejkunaj contranta tukuynejpi oqharikusqankuta, nispa.

²³ Chaymanta Pablowan parlanankupaj judío kurajkuna uj p'unchayta ajllarqanku. Chaymantaj aswan ashkha runakuna jamorqanku, Pablo tiyakusharqa, chay wasiman. Chantá paqarinmantapacha ch'isiyanankama Pabloqa paykunaman Diospa kamachiyninmanta yachacherqa. Atisqantataj Jesusmanta yachacherqa imaynatachus Moisespa kamachisqanmanta qhelqasqapi, Diosmanta sut'inchajkunaj qhelqasqankupi ima Jesusmanta willasqanta.

²⁴ Wakinkunaqa Pabloj yachachisqanta sumajta jap'ikorqanku, wakinkunataj chay yachachisqanta mana jap'ikorqankuchu.

²⁵ Paykunapura mana uj yuyaylla kaspataj, chay judiokuna ripunankupaj wakichikorqanku. Pablorí paykunata nerqa: Santo Espiritoqa sut'inchaj Isaiasnejta ñawpa tatanchejkunaman nerqa:

²⁶ Kay runakunaman rispa, willamuy: Qankuna uyarillankichej, manataj imachus kasqanta entiendenkichejchu. Qhawashaspapis, mana yachankichejchu imatachus rikusqaykichejta, nispa.

²⁷ Kay runakuna rumi sonqo kanku. Ñak'ayllata uyarinku, ñawinkutataj wisq'anku. Sitajchus ñawinkuwan rikunkuman, ninrinkuwantaj uyarinkuman, chantá sonqonkuwantaj noqaman kutirikamuwankuman chayqa, noqa paykunata qhaliyachiyman, nispa.

²⁸ Jinapi Pabloqa nillarqataj: Kunan qankuna kayta yachaychej: Dios imaynatachus runakunata qhespichinanmanta mana judío kajkunamanpis willakonqa, paykunataj uyarenqanku, nispa.

²⁹ Pablo chayta nisqantawantaj, judiokunaqa riporqanku, paykunapura mayta churanakuspa.

³⁰ Iskay watata Pablo Romapi tiyakorqa wasi jap'ikusqanpi, jinataj payta watukojkunata chayman wajyaj.

³¹ Ajinaqa Pablo mana manchachikuspa, Diospa kamachiyninmanta yachacherqa, Tukuyta Kamachej Jesucristomantawan, nitaj pipis payta jark'arqachu.