Hechos 26 - DIOSPA QHELQACHISQ

Pablo kuraj kamachej Agripaman parlaykun

¹ Chantá kuraj kamachej Agripa Pablota nerqa: Imamantachus ch'ataykusunku, chaymanta kutichikuspa parlariyta atinki, nispa. Pablotaj makinta oqharispa, kay jinata parlayta qallarerqa:

² Kuraj kamachej Agripa, mayta kusikuni imamantachus judiokuna ch'ataykushawasqankumanta ñawpaqeykipi kutichikuspa.

³ Astawanqa kusikuni noqayku judiokunaj usuykuta qan allinta rejsisqaykirayku. Chayrayku mañakuyki ama sayk'uspa uyarinawaykita.

⁴ Tukuy judiokuna yachanku imaynatachus juch'uy kasqaymantapacha kawsasqayta llajta masiykuna ukhupi, jinallatataj Jerusalenpipis.

⁵ Paykuna yachallankutaj ñawpajmantapacha fariseo t'aqamanta kasqayta, pikunachus astawanpuni kallpakunku Moisespa kamachisqanta junt'anankupaj, chaykunamanta. Mana jina kajtenqa, paykuna nichunku.

⁶ Kunantajrí juchachashawanku, imatachus Dios ñawpa tataykukunaman qonanta nerqa, chay nisqanpi suyakusqayrayku.

⁷ Israelpa chunka iskayniyoj jatun ayllunkunapis Diospa chay nisqan junt'akunanta suyakushallankutaj, chayraykutaj tuta p'unchay Diosta yupaychanku. Chaywanpis, kuraj kamachejníy, chayta noqa suyakusqayrayku judío masiykunaqa juchachashawanku.

⁸ Qankuna judío masiykunarí, imaraykutaj mana creenkichejchu Dios wañusqamanta runakunata kawsarichinantari?

⁹ Sut'ita nisqaykichej: Ñawpajta noqapis yuyaj kani Nazaret llajtayoj Jesuspa contranta imatapis ruwanay kasqanta.

¹⁰ Ajinata ruwaspataj, Jerusalenpi kuraj sacerdotekunamanta cartata qochikorqani Jesuspi atinikojkunata carcelman wisq'arachinaypaj. Wakinkunata wañuchishajtinkupis, noqaqa kusikoj kani.

¹¹ Jinallataj ashkha kutita paykunata tantakuna wasipi jasut'ichispa, Jesuspa contranta rimachiyta munaj kani. Chay jinatapuni paykunapaj phiñakusqayrayku, paykunata qhatiykachaspa karu llajtakunakama chayarqani.

¹² Chayrayku uj kuti kuraj sacerdotekunamanta cartata qochikuspa, noqa Damasco llajtaman risharqani.

¹³ Kuraj kamachejníy, chawpi p'unchaynejta ñanta rishajtiy, janajmanta ujllata sinch'i k'anchay noqata muyuykuwarqa, noqawan khuska rejkunata ima. Chay k'anchayqa intimantapis aswan sinch'itapuni k'ancharerqa.

¹⁴ Jinapitaj tukuyniyku pampaman choqakorqayku. Uj parlamuwajtataj uyarerqani arameo parlaypi: Saulo, Saulo, imaraykutaj qhatiykachashawankiri? Mana walejchu ayjonpa puntanta jayt'anaykeqa, icharí? nispa.

¹⁵ Chantá noqa nerqani: Wiraqochíy, pitaj kankiri? nispa. Paytaj kutichiwarqa: Noqa Jesús kani, pitachus qhatiykachashanki, chay.

¹⁶ Kunantaj sayariy, imaraykuchus qanman rikhuriyki kunanmantapacha kamachiy jina munasqayta ruwanaykipaj. Ajinaqa kunan p'unchay imatachus rikusqaykimanta testigo jina wajkunaman willamunki, qhepanejman imatawanchus rikuchisqayki, chaymantawan.

¹⁷ Noqa llajta masiykikunamanta waqaychasqayki, jinallataj mana judío kajkunamantapis, pikunamanchus kunan kachashayki, chaykunamanta.

¹⁸ Noqa qanta kachasqayki mana judío kajkunaj ñawinkuta kicharinaykipaj, laqhamanta sut'iman llojsimunankupaj, ajinamanta noqapi atinikusqankurayku Dios juchankuta pampachanqa. Jinallataj paykunapis Diospaj t'aqasqa kajkunawan khuska chayaqeta jap'illanqankutaj, nispa.

¹⁹ Chayrayku kuraj kamachejníy, imatachus Jesús janaj pachamanta rikuchiwarqa, chay kamachiwasqanta kasunipuni.

²⁰ Ajinaqa Damascopiraj Jesusmanta willayta qallarerqani, chaymantá Jerusalenpi, qhepantataj tukuy Judeapi. Mana judío kajkunamanpis noqa Jesusmanta willallarqanitaj. Tukuyninkuman nerqani Diosman kutirikunankuta, jinataj allin kajta ruwaspa, Diosman kutirikusqankumanta yachayta qonankupaj.

²¹ Chayta willasqayraykutaj judiokunaqa Temploj pationpi presochawarqanku, jinaspataj, wañuchiwayta munarqanku.

²² Chaywanpis Dios yanapawasqanrayku kunankama kawsashaniraj, chayraykutaj Jesusmanta willani mana kasu ruwana kajkunaman, atiyniyojkunamanpis. Imatachus Diosmanta ñawpaj sut'inchajkuna, Moisés ima kananta nerqanku, chay kikinta yachachini.

²³ Paykuna willarqanku imaynatachus Cristo ñak'arinanta, paytaj wañusqamanta ñawpaj kaj kawsarimoj kananta ima. Willallarqankutaj Jesús uj k'anchay jina kananta, paynejta judiokuna, mana judío kajkuna ima qhespichisqa kanankupaj, nispa.

²⁴ Ajinata Pablo parlaykushajtin, Festo jatunmanta nerqa: Pablo, pawichikushanki, anchata tukuy imamanta yachayta munasqaykirayku manaña yuyayniykipichu kashanki, nispa.

²⁵ Pablotaj kuticherqa: Mana, k'acha Festo, noqaqa yuyayniypipuni kashani. Chay tukuy nisqaytaj ajinapuni, maychus kasqanman jinataj.

²⁶ Kuraj kamachej Agripapis chay tukuy imamanta yachallantaj. Chayrayku paypa ñawpaqenpi tukuy sonqo parlashani, imaraykuchus yachani chay tukuy ima mana pakayllapichu ruwakusqanta.

²⁷ Kuraj kamachej Agripa, manachu Diosmanta sut'inchajkunaj nisqankuta jap'ikunki? Noqa yachani chayta jap'ikusqaykita, nispa.

²⁸ Agripatajrí Pablota nerqa: Yuyankichu manaraj imapi Cristota qhatikojman tukuchiwayta? nispa.

²⁹ Pablotaj kuticherqa: Manaraj imapipis, chayrí unaymantawanpis Dios munachun noqa jina Jesuspi atinikoj kanaykichejta, mana qanllachu, manachayrí tukuy uyariwajkuna ima. Chaywanpis mana munaymanchu noqa jina cadenawan watasqa kanaykichejta, nispa.

³⁰ Ajinata Pablo nisqantawan, kuraj kamachej Agripa, kamachej Festo, Berenice, tukuy paykunawan kajkuna ima sayarerqanku.

³¹ Jawaman llojsispataj, ninakorqanku: Kay runaqa mana ima mana allin kajtapis ruwanchu wañuchisqa kananpaj jina, nitaj presochasqa kananpajpis, nispa.

³² Agripataj Festota nerqa: Manachus kuraj kamachej Cesarwan juzgachikuyta mañakunman karqa chayqa, kay runaqa kacharisqaña kanman karqa, nispa.