Hechos 25 - DIOSPA QHELQACHISQ

Pabloqa Festowan parlan

¹ Kamachej Festoqa Cesareaman chayamuspa, kinsa p'unchayninman Jerusalenman rerqa.

² Chantá kuraj sacerdotekuna, judiokunamanta jatunpaj qhawasqa kajkuna ima Festoj ñawpaqenman jamorqanku Pablota ch'ataykunankupaj.

³ Jinapi paykuna kamachej Festomanta mañakorqanku Pablota Jerusalenman pusachinanta, imaraykuchus paykuna yachachinakusqanku ñanpi Pablota wañuchinankupaj.

⁴ Festorí paykunaman kuticherqa: Pabloqa Cesareapi presochasqa kashan. Noqapis pisi p'unchaymantawan chayman kutiripusaj.

⁵ Qankunamanta wakin kurajkuna noqawan khuska Cesareaman richunku. Chay runachus juchayoj kanqa chayqa, qankuna jaqaypi payta ch'ataykuychej, nispa.

⁶ Chaypacha Festoqa Jerusalenpi qhepakorqa pusajtachus, chayrí chunka p'unchaytachus, chaymantataj Cesareaman kutiporqa. Q'ayantinpachataj, juzgadopi tiyaykukuspa, kamacherqa Pablota ñawpaqenman pusamunankuta.

⁷ Pablo yaykumojtintaj, Jerusalenmanta jamoj judiokunaqa payta muyuykuspa, ch'ataykuyta qallarerqanku tukuy imaymana mana allinta ruwasqanmanta. Chaywanpis mana rikuchiyta aterqankuchu ajinapuni kasqanta.

⁸ Chantá Pablo kuticherqa: Noqaqa mana imatapis Temploj contranta, nillataj Romapi kamachej Cesarpa contrantapis ruwanichu. Manallataj judiokunaman Diospa qosqan kamachisqakunatapis p'akinichu, nispa.

⁹ Kamachej Festorí judiokunaman allinta rijch'ayta munaspa, Pablota taporqa: Qan Jerusalenman riyta munawajchu, chaypi kay imakunamanta noqa juzgasunaypaj? nispa.

¹⁰ Pablotaj kuticherqa: Cesarpa sayachisqan juzgadonpi kani. Kaypimin juzgasqa kanay tiyan. Noqaqa mana ima sajratapis judiokunaj contranta ruwanichu, qantaj allinta chayta yachanki.

¹¹ Chayrayku, sichus imatapis wañuchisqa kanaypaj jina ruwani chayqa, wañuchinawaykichejta mana manchachikunichu. Tumpawasqanku mana jina kajtinrí, ni pi atinchu paykunaman jaywaykuwayta. Aswanpis kuraj kamachej Cesarpa ñawpaqenpipuni juzgasqa kanay tiyan, nispa.

¹² Chantá Festoqa yuyaychajninkunawan parlaytawan, Pabloman kuticherqa: Sichus kuraj kamachej César uyarinasunta munanki chayqa, riyta atinki pay juzgasunanpaj, nispa.

Pablo kuraj kamachej Agripaj ñawpaqenpi

¹³ Chaymanta mana unaymanchu kuraj kamachej Agripa, panan Berenicewan ima Cesareaman jamorqanku Festota waturikoj.

¹⁴ Paykuna unayta chaypi kasqankumanta, Festoqa kuraj kamachej Agripaman Pablomanta willarerqa: Kaypi uj preso kashan Felixpa saqesqan.

¹⁵ Noqa Jerusalenpi kashajtiy, judiokunamanta kuraj sacerdotekuna, kurajkunawan ima jamuspa, payta ch'ataykorqanku, mañawarqankutaj pay wañuchisqa kananpaj juchachanayta.

¹⁶ Noqatajrí paykunata nerqani: Noqayku romanokuna mana pitapis wañuchisqa kananpaj juchachallaykuchu, manaraj ch'ataykojkuna payta uyanchashajtinku, nitaj ch'atasqa runapis kutichikushajtin.

¹⁷ Chayrayku paykuna kayman jamojtinku, q'ayantinpacha noqa juzgadopi tiyaykukuspa, Pablota pusachimorqani.

¹⁸ Chantá ch'atajkuna tantakojtinku, noqaqa yuyarqani imata mana allinta ruwasqanmantachá Pablota juchachanankuta. Chaywanpis mana jinachu kasqa.

¹⁹ Paykunaqa payta ch'atashasqanku Diosninkuta yupaychana imakunamanta, chantá Jesús sutiyoj wañusqa uj runamanta, pimantachus Pablo nin kawsashasqanta, chaymanta.

²⁰ Chay imakunamanta imatachus ruwanayta mana yachaspa, Pablota taporqani: Jerusalenman riyta munawajchu, chaypi kay imakunamanta noqa juzgasunaypaj? nispa.

²¹ Pablorí munarqa kuraj kamachej Cesarkama chayayta chaypi juzgasqa kananpaj. Chayrayku kamacherqani preso kananta, kuraj kamachejman pusachinaykama, nispa. Ajinata Festoqa Agripaman nerqa.

²² Chantá Agripaqa nerqa: Noqapis chay runata uyariyta munayman, nispa. Festotaj nerqa: Q'ayapacha payta uyarinki, nispa.

²³ Q'ayantenqa Agripawan, Berenicewan ima sumaj p'achallisqa juzgadoman yaykorqanku. Paykunawan khuska yaykullarqankutaj soldadokunata kamachejkuna, llajtapi kurajkuna ima. Festotaj kamacherqa Pablota pusaykamunankuta.

²⁴ Chantá Pablo chayamojtinkama, Festo nerqa: Kuraj kamachej Agripa, qankunapis wiraqochikuna: Kaymin chay runaqa, pimantachus tukuy judiokuna Jerusalenpi, jinallatataj kaypipis mañakuwanku wañuchisqa kananta, chay.

²⁵ Noqataj paypi mana ni imata tarinichu wañuchisqa kananpaj jina. Chaywanpis paypuni kuraj kamachej Cesarwan uyarichikuyta munasqanrayku, Cesarman pusachisaj.

²⁶ Noqarí mana yachanichu imatachus paymanta cartapi kamachejniyman ninayta. Chayrayku kunan payta wajyachini ñawpaqeykichejman, astawanqa qan payta rejsinaykipaj, kuraj kamachej Agripa. Ichapis astawan payta tapuspa, yachayta atiyman imatachus cartapi ninaypaj.

²⁷ Noqapajqa mana walejchu kanman presota kuraj kamachej Cesarman apachinay, mana allinta willaspa imamantachus tumpasqa kasqanta, nispa.