Hechos 24 - DIOSPA QHELQACHISQ

Pablo kamachej Felixpa ñawpaqenpi kutichikun

¹ Phishqa p'unchayninman kuraj kaj sacerdote Ananías Cesareaman rerqa, wakin kurajkunawan, Diospa kamachisqanmanta yachachej Tértulo sutiyoj runata pusariykukuspa. Chantá paykuna kamachej Felixpaman yaykorqanku chaypi Pablota ch'ataykunankupaj.

² Pablota pusamusqankutawan, Tertuloqa payta ch'ataykuyta qallarispa, Felixta nerqa: Kamachej Félix, noqayku judiokuna qannejta allinta kawsakushayku, imaraykuchus yachayniyoj kasqaykiwan tukuy imata cheqanta kamachinki.

³ Tukuynejpi imatachus noqaykurayku ruwasqaykita rikuspa, anchatapuni pachis niyku, may k'acha Félix.

⁴ Mana astawan sayk'uchisuyta munaykuchu. Chayrayku kunan, k'acha sonqoyoj kasqaykirayku mañakuyku uj chhikanta uyarinawaykuta.

⁵ Noqayku yachayku kay runaqa millay runa kasqanta. Tukuy llajtapi judiokunata ch'ajwachin. Jinallataj payqa Nazaret llajtayoj runata qhatikojkunaj kamachejnin.

⁶ Chantá Temploykutapis ch'ichichayta munallarqataj. Chayrayku payta presocharqayku, Moisés kamachiwasqaykuman jina payta juzganaykupaj.

⁷ Soldadokunata kamachej Lisiastajrí Jatun Juntaykuman yaykuykuspa, Pablota ancha kallpawan qhechuwarqayku.

⁸ Lisiastaj kamachiwarqayku Pablota ch'ataykojkuna jamunaykuta qanwan parlaj. Qan kikiykichus Pablota tapunki chayqa, paypa siminmanta yachanki imamantachus juchachasqaykoqa jinapuni kasqanta, nispa.

⁹ Chantá Tértulo chayta nejtin, chaypi kaj judiokunapis nillarqankutaj ajinapuni kasqanta.

¹⁰ Chantá kamachej Félix señawan nerqa Pablo parlananta. Pablotaj nerqa: Yachani qan unay wataña kay suyupi cheqanta kamachisqaykita. Chayrayku tukuy sonqo ñawpaqeykipi parlarisaj.

¹¹ Jerusalenman Diosta yupaychaj risqayqa chunka iskayniyoj p'unchayllaraj kashan. Qan tapurinki chayqa, ajinapuni kasqanta yachanki.

¹² Kaykunarí mana rikuwarqankuchu ni piwan Templopi churanakushajta, nitaj tantakunayku wasikunapi runakunata ch'ajwachishajta, nillataj llajtapipis.

¹³ Kay runakuna manallataj rikuchisuyta atinkumanchu, imamantachus tumpawasqanku ajinapuni kasqanta.

¹⁴ Kaytarí sut'inta willasqayki: Noqaqa ñawpa tataykunaj Diosninta yupaychani Jesuspa cheqan ñanninta qhatispa, mayqentachus kaykuna pantasqa kasqanta ninku, chayta. Astawanpis noqa Moisespa kamachisqanpi qhelqasqata, Diosmanta sut'inchajkunaj qhelqasqankuta ima tukuy sonqo jap'ikuni.

¹⁵ Kay ch'ataykuwajkuna jina noqapis Diospi suyakullanitaj tukuy runakuna wañuymanta kawsarimpunankuta, cheqan kajta ruwajkuna kachunku, chayrí mana allin kajta ruwajkunapis.

¹⁶ Chayrayku kallpakuni ruwasqaymanta sonqoypi mana juchachasqa kanaypaj Diospa ñawpaqenpi, runakunaj ñawpaqenpipis.

¹⁷ Ajinaqa unay watamanta Jerusalenman kuterqani, llajta masiykunapaj qolqe yanapata apanaypaj, jinallataj Diosman uywa ñak'asqa q'olachinata jaywanaypaj ima.

¹⁸ Noqa Temploj pationpi kashaspa, llimphuchakusharqani Diospa ñawpaqenpi allinpaj qhawasqa kanaypaj. Chaypitaj wakin runakuna taripawarqanku. Chaywanpis mana ashkha runachu chaypi karqanku, nitaj ima ch'ajwapis karqachu.

¹⁹ Pikunachus taripawarqanku, chaykuna Asiamanta judiokuna karqanku. Imamantapis ch'ataykuwayta munaspa, paykunamin qanman jamunanku karqa ch'ataykunawankupaj.

²⁰ Manachayrí, kaypi kajkuna qanta nisuchunku Jatun Juntapi imamantachus ch'ataykuwasqankuta.

²¹ Ñawpaqenkupi kashaspa, noqa jatunmanta nerqani: Wañusqakuna kawsarimponqanku, nispa. Ichapis chay nisqaymanta kunan p'unchay paykuna juchachashawanku, nispa. Ajinata Pabloqa Felixta nerqa.

²² Kamachej Felixqa Jesuspa cheqan ñanninmanta sumajta yacharqa. Chayrayku Pabloj nisqanta uyarispa, Felixqa ch'ataykojkunata nerqa: Kay imakunamantaqa astawan tapusaj, soldadokunata kamachej Lisias chayamojtin, nispa.

²³ Chaymantataj capitanta kamacherqa Pablota allinta qhawananta. Chaywanpis pay saqenan karqa Pablota watukoj jamojkuna payta yanapanankuta.

Kamachej Felixwan Drusilawan ima Pablota uyarinku

²⁴ Pisi p'unchaykunamantawan, kamachej Félix kutimorqa Drusila warminwan. Drusilaqa judía karqa. Chantá Félix Pablota wajyacherqa, imaynatachus Jesucristopi atinikusqanmanta uyariyta munaspa.

²⁵ Chaypacha Pabloqa cheqan kajta ruwanamanta, sonqoj munayninwan mana atipachikoj kanamanta, jamoj juicio p'unchaymanta ima parlarqa. Felixtajrí chayta uyarispa, mancharikorqa. Chayrayku Pablota nerqa: Kunanqa amaña chaymanta astawan parlawayñachu. Noqa waj p'unchaypi ujtawan wajyasqayki, nispa.

²⁶ Aswanpis, Félix suyasharqa Pablo qolqeta lluk'iykunanta payta kacharipunanpaj. Chayrayku sapa kuti wajyacherqa paywan parlananpaj.

²⁷ Jinapis judiokunaman allin rijch'ayta munaspa, Felixqa mana Pablota carcelmanta kacharicherqachu. Iskay watanmantaj, Felixpa cuentanmanta Porcio Festo sutiyojñataj kamachinanpaj yaykorqa.