Hechos 23 - DIOSPA QHELQACHISQ

¹ Chantá Pablo Jatun Juntamanta kajkunata allinta qhawaspa, nerqa: Wawqekuna, kunankama Diospa ñawpaqenpi llimphu sonqoyoj kawsakuni, nispa.

² Pablo chayta nejtinkama, kuraj kaj sacerdote Ananiasqa Pabloj qayllanpi kajkunata kamacherqa siminpi laq'anankuta.

³ Pablotaj Ananiasta nerqa: Qanqa puraj uya kanki, Diostaj qantapis jinch'allasonqataj. Qanqa Moisespa kamachisqanman jina juzganawaykipaj kashanki. Kunantajchu chay kamachisqata p'akispa, laq'achiwanki? nispa.

⁴ Chay qayllapi kajkunatajrí Pablota nerqanku: Ajinatachu Diospa kuraj kaj sacerdotenpa contranta rimanki? nispa.

⁵ Pablotaj nerqa: Wawqekuna, qhespichiwaychej ari, noqa mana yacharqanichu kuraj kaj sacerdote kasqanta, imaraykuchus yachani qhelqasqa kasqanta: Ama llajtaykita kamachejpaj contranta rimankichu, nispa.

⁶ Jinapi Pablo repararqa chay Jatun Juntapi wakin saduceo t'aqamanta kasqankuta, wakintaj fariseo t'aqamanta. Chayrayku pay jatunmanta parlaspa, nerqa: Wawqekuna, noqa fariseo kani, fariseoj churintaj. Kunantaj noqata juchachashawanku wañuymanta kawsarimuypi suyakusqayrayku, nispa.

⁷ Chayta Pablo nisqantawan, fariseokunawan, saduceokunawan ima paykunapura siminakuyta qallarerqanku, ajinamantataj Jatun Juntapi kajkuna iskayman t'aqakorqanku.

⁸ Chay ch'ajwa karqa, imaraykuchus saduceokuna ninku wañuymanta kawsarimuy mana kasqanta, nitaj angelkuna, waj espiritukunapis. Fariseokunatajrí chay tukuy kasqanta creenku.

⁹ Tukuyninkutaj anchata ch'ajwarqanku. Fariseokunamanta Diospa kamachisqanmanta wakin yachachejkuna sayaykuspa, manchayta siminakusharqanku: Mana ima sajratapis kay runapi tariykuchu. Ichapis uj espíritu, chayrí uj angelchus payman parlanman karqa, nispa.

¹⁰ Juntamanta kajkuna chay jinatapuni jap'inakushajtinku, romano soldadokunata kamachejqa phutikorqa Pablota wañuchinankumanta. Chayrayku soldadonkunata kamacherqa chay runakuna chawpimanta Pablota orqhomuspa, ujtawan cuartelman pusaykunankuta.

¹¹ Chantá q'ayantin ch'isi Tukuyta Kamachej Jesusqa Pabloman rikhurispa, nerqa: Sonqochakuy Pablo. Imaynatachus kay Jerusalenpi noqamanta testigo jina willarqanki, kikillantataj Roma llajtapipis noqamanta sumaj willayta willanki, nispa.

Pablota wañuchinankupaj wakichikunku

¹² Q'ayantin paqarenqa wakin judiokuna tantakuspa, uj yuyayman yaykorqanku. Chantá tiluspa, nerqanku mana imatapis mikhunankuta, nitaj ujyanankuta Pablota wañuchinankukama.

¹³ Chay yachachinakojkunaqa tawa chunka jina karqanku.

¹⁴ Ajinaqa paykuna rerqanku kuraj sacerdotekunawan, kurajkunawan ima parlamoj, nerqankutaj: Noqayku tiluspa parlaykuña ni ima mikhunatapis llaminaykupaj Pablota wañuchinaykukama.

¹⁵ Chayrayku qankuna, Jatun Juntapi kajkunawan ima soldadokunata kamachejmanta mañaychej Pablota ujtawan pusachimunanta, astawan tapuyta munaj jinalla. Noqaykutaj, manaraj kayman chayamushajtin, ñanpi payta suyaykusqayku wañuchinaykupaj, nispa.

¹⁶ Chaywanpis Pabloj pananpa churenqa chay nisqankuta uyarerqa, paytaj cuartelman rispa, Pabloman willamorqa.

¹⁷ Pablotaj uj capitanta wajyaspa, nerqa: Kay waynata soldadokunata kamachejman pusaykuripuway, imaraykuchus imatachá willanan kashan, nispa.

¹⁸ Chay capitanqa waynata pusaykuspa, soldadokunata kamachejta nerqa: Presochasqa Pabloqa wajyachiwaspa, mañawarqa kay waynata qanman pusamunayta. Paytaj imatachá willasonqa, nispa.

¹⁹ Soldadokunata kamachejtaj waynata makinmanta wajnejman pusaspa, taporqa: Imatataj willanawayki kashan? nispa.

²⁰ Chantá waynaqa payta nerqa: Wakin judiokuna yachachinakusqanku qanmanta mañanankupaj Pablota q'aya Jatun Juntaman ujtawan pusaykunaykita, payta astawan tapuyta munaj jinalla.

²¹ Qanrí ama paykunata kasuychu. Tawa chunkamanta aswan ashkha runakuna pakaykukuspa, ñanpi Pablota suyaykonqanku. Paykuna tiluspa parlanakusqanku mana imatapis mikhunankuta, nitaj ujyanankuta Pablota wañuchinankukama. Kunantaj wakichisqaña kanku chayta ruwanankupaj. Qan ninallaykitaña suyashanku, nispa.

²² Chayta uyariytawan, soldadokunata kamachejqa waynata kachaporqa: Imatachus willawasqaykitaqa ama pimanpis willankichu, nispa.

Pablota kamachej Felixman pusanku

²³ Chantá romano soldadokunata kamachejqa iskay capitankunata kamacherqa wakichinankuta iskay pachaj soldadokunata Cesareaman rinankupaj. Kamachillarqataj wakichinankuta caballopi rej qanchis chunka soldadokunata, iskay pachaj lanzayoj soldadokunatawan, chay ch'isipacha jisq'on phanita puririnankupaj.

²⁴ Jinataj nerqa Pablopajpis caballokunata wakichinankuta, Judea jap'iypi kamachej Felixpaman mana imanasqa chayananpaj.

²⁵ Paykunawantaj kamachej Felixman kay jina cartata apacherqa:

²⁶ Sumaj kamachej Félix, noqa Claudio Lisias tukuy sonqo qanta napaykamuyki.

²⁷ Wakin judiokuna kay runata jap'ispa, payta wañuchiyta munarqanku. Noqatajrí romano kasqanta yachaspa, soldadoykunawan paykunamanta qhechorqani.

²⁸ Chantá imamantachus juchachasqankuta yachayta munaspa, chay runata Jatun Juntankuman pusacherqani.

²⁹ Chaywanpis chaypi repararqani paykuna kamachisqankuman jinalla payta juchachashasqankuta. Noqatajrí mana paypi ima juchatapis tarerqanichu wañuchisqa kananpaj, nitaj carcelman wisq'asqa kananpajpis.

³⁰ Chantá chay judiokuna payta wañuchinankupaj wateqasqankuta yachaspa, noqaqa qanman payta pusachimushani. Payta juchachajkunamanpis nillanitaj qanpa ñawpaqeykipi uyanchanankuta, nispa. Ajinata soldadokunata kamachejqa Felixman cartata apacherqa.

³¹ Kamachisqaman jina chay ch'isipacha soldadokunaqa Pablota pusarqanku Antípatris llajtakamalla.

³² Q'ayantintaj chakipi rej soldadokuna Jerusalenman kutiporqanku, jinataj caballokunapi kajkunallaña Pablowan rerqanku.

³³ Chay soldadokuna Cesareaman chayaspataj, Pablota kamachej Felixpa ñawpaqenman pusarqanku, jinallataj cartatapis jaywarqanku.

³⁴ Kamachej Felixtaj chay cartata ñawirispa, Pablota taporqa maymantachus kasqanta. Pablotaj Ciliciamanta kasqanta nerqa.

³⁵ Chantá kamachej Felixqa Pablota nerqa: Qanta ch'atajkuna chayamojtinku, uyarisqayki, nispa. Chaymantataj kamacherqa Pablota Herodespa juzganan wasipi wisq'anankuta.