Hechos 22 - DIOSPA QHELQACHISQ

¹ Pablo nerqa: Wawqekuna, kurajkuna ima, kay ñawpaqeykichejpi kutichikusqayta uyariwaychej, nispa.

² Arameo parlaypi Pablota parlajta uyarispa, chay runakuna astawan ch'inyarqanku. Pablotaj nerqa:

³ Noqaqa judío kani, Ciliciapi kaj Tarso llajtamanta. Kay Jerusalén llajtapi wiñakorqani, yachachejniytaj Gamaliel karqa. Payqa ñawpa tatakunaj tukuy kamachisqankuta allintapuni yachachiwarqa, noqataj tukuy sonqowan Diospa kamachisqanta junt'arqani, imaynatachus qankunapis kunan ruwashankichej, ajinata.

⁴ Ñawpajtaqa noqa wañurachiyta munaspa, qhatiykachaj kani Jesuspa cheqan ñanninta qhatikojkunata. Qharikunata, ajinallatataj warmikunatapis carcelman wisq'arachej kani.

⁵ Kuraj sacerdote, chantá kurajkuna ima allinta yachanku mana llullakusqayta. Noqaqa paykunamanta cartata qochikorqani Damascopi kaj judío masinchejkunaman apanaypaj, chaypi Jesusta qhatikojkunata presochaspa, Jerusalenman maki watasqata apamuspa jasut'ichinaypaj.

Pablo imaynatachus Jesuspi atinikusqanta willan

⁶ Jinapi Damascoman qayllaykushajtiyku, chawpi p'unchayta, ujllata janaj pachamanta uj jatun k'anchay muyuykuwarqa.

⁷ Noqataj pampaman wijch'ukorqani, chaypachataj kay jinata nimuwajta uyarerqani: Saulo, Saulo. Imaraykutaj noqata qhatiykachashawankiri? nispa.

⁸ Chantá noqa nerqani: Pitaj kanki, wiraqochíy? nispa. Paytaj kutichiwarqa: Noqa kani Nazaretmanta Jesús, pitachus qan qhatiykachashanki, chay, nispa.

⁹ Noqawan rejkunataj, chay k'anchayta rikorqanku chaypis, parlamuwasqanta mana entienderqankuchu.

¹⁰ Chaymanta noqa taporqani: Imatataj ruwasajri? nispa. Tukuyta Kamachej Jesustaj niwarqa: Jatarispa, Damascoman riy, chaypitaj nisonqanku imatachus ruwanaykita, nispa.

¹¹ Chay k'anchayqa ñawsayachiwarqa. Chayrayku noqawan rejkuna makiymanta aysarispa, Damasco llajtaman pusaykuwarqanku.

¹² Chaypacha Damascopi Ananías sutiyoj uj runa tiyakorqa, paytaj Diosta yupaychaj Moisespa kamachisqanman jina. Chantá Damascopi kaj judiokunapajpis allin runapaj qhawasqa karqa.

¹³ Jinapi Ananiasqa watukuwaj jamorqa, ñawpaqeypi sayaspataj, niwarqa: Saulo wawqéy, ñawiyki watejmanta rikuchun, nispa. Chaypacha watejmanta rikuyta aterqani, jinataj payta rikorqani.

¹⁴ Chantá Ananías niwarqa: Ñawpa tatanchejkunaj Diosnenqa ñawpajmantapacha qanta ajllakusunki paypa munayninta rejsinaykipaj, Diospa Cheqan Kaj Kamachinta rikunaykipaj, kikin siminmantataj nisqanta uyarinaykipaj ima.

¹⁵ Chayrayku qan tukuy runaman imatachus rikusqaykita, uyarisqaykitawan willanki.

¹⁶ Jina kajtenqa, imatataj suyashankiri? Jatarispa, bautizachikuy, jinaspataj Jesuspa sutinta oqharispa Diosniykipaj rejsikapuy, juchaykimanta llimphuchasqa kanaykipaj, nispa.

Pablo mana judío kajkunaman rin

¹⁷ Aswan qhepamanqa Jerusalenman kutimuspa, noqa Templopi Dioswan parlarikushajtiy, mosqoypi jina ujta rikorqani.

¹⁸ Chay mosqoypi jina rikusqaypi Jesús niwarqa: Kunanpacha Jerusalenmanta usqhayllata ripuy, imaraykuchus kaypi imatachus noqamanta willasqaykita mana uyarisonqankuchu, nispa.

¹⁹ Noqatajrí kuticherqani: Tukuyta Kamachej Jesusníy, tukuyninku yachanku imaynatachus tukuynejman rispa, qanpi atinikojkunata tantakuna wasipi jap'irachisqayta, ñak'arichisqaytataj.

²⁰ Qanmanta willaj Estebanta wañuchishajtinkupis, noqa chaypi paykunawan khuska kasharqani wañuchinankuta munaspa. Chay wañuchejkunaj patanchana p'achankutapis qhawarqani, nispa.

²¹ Jesustajrí kutichiwarqa: Puririllayña, imaraykuchus noqa karuman kachasqayki, mana judío kajkunaman noqamanta willaranaykipaj, nispa.

Pablota wisq'achinku

²² Chayta Pablo ninankama, judiokunaqa nisqanta uyarishallarqanku. Chaymanta qhaparerqanku: Wañuchun chay runaqa. Payqa manamin kawsananpaj jinachu, nispa.

²³ Jinallataj paykuna qhaparillarqankupuni, p'achankuta choqaraspa, jallp'ata pataman qhallispataj.

²⁴ Jinapi romano soldadokunata kamachejqa cuartel ukhuman Pablota pusaykucherqa, chaypi jasut'ichispa rimarichinanpaj, imaraykuchus yachayta munarqa imamantachus chay jinatapuni Pabloj contranta qhaparqachashasqankuta.

²⁵ Soldadokuna jasut'inankupaj Pablota watashajtinku, pay qayllapi sayashaj ujnin capitanta nerqa: Roma llajtayoj runata jasut'ichiy atikullanchu, juiciopi manaraj juchachasqa kashajtin? nispa.

²⁶ Chay capitán chayta uyarispa, soldadokunata kamachejman kay jinata willamorqa: Allinta qhawakuy imatachus ruwasqaykita, imaraykuchus kay runaqa romano kasqa, nispa.

²⁷ Jinapi soldadokunata kamachejqa Pabloman qayllaykuspa, taporqa: Niway, romanochu kanki? nispa. Pablotaj nerqa: Arí, nispa.

²⁸ Chantá soldadokunata kamachejqa nillarqataj: Noqaqa romano kanaypaj ashkha qolqeta pagarqani, nispa. Pablotaj kuticherqa: Noqatajrí, romano kani paqarikusqaymantapacha, nispa.

²⁹ Chaypacha pikunachus Pablota jasut'inankupaj wajyasqa kajkuna ithirerqanku, pay romano kasqanta yachaspa. Soldadokunata kamachejpis mancharikullarqataj Pablota wataykuchisqanmanta, jasut'inankuta kamachisqanmantawan ima.

Pablota judiokunaj Jatun Juntankuman apanku

³⁰ Q'ayantin romano soldadokunata kamachejqa yachayta munarqa imamantachus judiokuna Pablota juchachasqankuta. Chayrayku pay kamacherqa kuraj sacerdotekuna Jatun Juntaman tantakamunankuta. Chantá cadenawan watasqanmanta Pablota phaskarachispa, ñawpaqenkuman pusaykorqa.