Hechos 21 - DIOSPA QHELQACHISQ

Pablo Jerusalenman rin

¹ Chantá Éfeso iglesiaj kurajninkunata: Ripusqayku nispa, barcoman wicharerqayku, chaymantataj cheqanta Cos churuman rerqayku. Q'ayantintaj Rodas churuman chayarqayku, chaymantataj Pátara llajtaman.

² Pátara llajtapitaj tarerqayku Feniciaman rishaj barcota, chayman wicharispataj, purirerqayku.

³ Rishaspataj, Chipre churuta lloq'enejpi rikorqayku, chaymantataj Siria jap'iynejman rerqayku. Tiro llajtaman chayaspataj, chaypi sayarqayku, imaraykuchus barcomanta cargata urayk'uchinanku karqa.

⁴ Chaypi noqayku Jesusta qhatikojkunata tarispa, paykunawan qanchis p'unchayta qhepakorqayku. Paykunarí Santo Espíritoj nisqanrayku Pablota nisharqanku ama Jerusalenman rinanta.

⁵ Chaywanpis chay qanchis p'unchay qhepata llajtamanta llojserqayku Jatun Qocha kantuman. Jinapi tukuy wawqekuna, warminkuwan, wawankuwan ima noqaykuwan khuska rerqanku. Chantá mama qocha kantupi qonqoriykukuspa, tukuyniyku Dioswan parlarikorqayku.

⁶ Chaymantataj sapa ujwan noqayku q'apinakuspa, barcoman wicharerqayku, paykunataj wasinkuman kutiriporqanku.

⁷ Tiromanta llojsispa, noqayku Tolemaidaman chayarqayku. Ajinapi tukucherqayku mama qochanejta puriyniykuta. Chantá Tolemaidapi kaj wawqe panakunata tarispa, napaykorqayku, paykunawantaj uj p'unchayta karikorqayku.

⁸ Q'ayantintaj, tukuyniyku Cesareamanñataj rerqayku. Cesareaman chayaspataj, Jesusmanta sumaj willayta willaj Felipej wasinman chayarqayku. Ñawpajta Jerusalén iglesiapi qanchis yanapajkunata ajllasqanku, chaykunamanta Felipe ujnin kaj karqa.

⁹ Felipetaj tawa sipas ususiyoj karqa, paykunataj Diospa simi nisqanta sut'inchajkuna karqanku.

¹⁰ Pisi p'unchaykunamanta Agabo sutiyoj Diosmanta sut'inchaj runa Judeamanta chayamorqa.

¹¹ Jinapi pay watukoj jamuwarqayku. Chantá Pabloj chumpinta oqhariytawan, Agaboqa chakinta, makintawan wataykukuspa, nerqa: Kay jinata Santo Espíritu nin: Jerusalenpi judiokunaqa ajinata kay chumpiyojta watanqanku, chaymantataj mana judío kajkunaman payta jaywaykonqanku, nispa.

¹² Chayta uyarispa, noqayku chaypi kaj wawqe panakuna ima Pablota jark'ayta munarqayku ama Jerusalenman rinanpaj.

¹³ Pablotajrí niwarqayku: Imaraykutaj chay jinatapuni waqaspa sonqoyta wawayachiwankichejri? Noqaqa wakichisqaña kani, mana watachikunallaypajchu, aswanpis Jerusalenpi wañuchisqa kanaypaj Tukuyta Kamachej Jesusrayku, nispa.

¹⁴ Chantá ni imaynapi payta jark'ayta atispa, saqellarqaykuña: Tukuyta Kamachej Jesuspa munasqan ruwasqa kachun, nispa.

¹⁵ Chay p'unchaykuna qhepata noqayku wakichikuytawan, Jerusalenman rerqayku.

¹⁶ Cesareamantapis wakin wawqekuna noqaykuwan rillarqankutaj, Chipre llajtayoj Mnasonpa wasinman pusanawaykupaj. Payqa unayña Jesusta qhatikoj karqa, noqaykutaj wasinpi qheparikunayku karqa.

Pabloqa Santiagota watukun

¹⁷ Chantá Jerusalenman chayajtiyku, wawqe panakunaqa tukuy sonqo wasinkuman wajyarikuwarqayku.

¹⁸ Q'ayantintaj Pablo noqaykuwan rerqa Santiagota watukoj, chaymantaj iglesiamanta tukuy kurajkuna tantakamorqanku.

¹⁹ Paykunata napaykuytawan, Pabloqa kantumanta willarqa, imatachus Dios paynejta mana judío kajkuna ukhupi ruwasqanmanta.

²⁰ Chayta uyariytawan, chay kurajkunaqa Diosta yupaychaspa, Pablota nerqanku: Wawqeyku, qan kikiyki yachanki, may chhika waranqa judiokuna Jesuspi atinikusqankuta, paykunataj mayta munanku Moisespa kamachisqanta kasunata.

²¹ Chaywanpis qanmanta kayta uyarerqayku: Qanqa mana judío kajkuna ukhupi tiyakoj judiokunaman yachachisqanki manaña Moisespa kamachisqanta kasunankuta. Nillasqankitaj amaña qhari wawankutapis circuncidanankuta, nitaj ñawpa usunchejman jina kawsanankuta.

²² Kunanqa, chay nisqankumanta imaninkitajri? Judío wawqe panakunaqa yachanqankupuni kayman chayamusqaykita.

²³ Runakuna ama chayta qanmanta yuyanankupaj kay nisqaykuta ruway: Noqayku ukhupi tawa runakuna Diospaj ruwasaj nisqankuta junt'ananku tiyan.

²⁴ Qanpis paykunawan khuska Temploman rispa, kamachisqaman jina Diospa ñawpaqenpi llimphuchakuy. Chantá paykuna chujchankuta ruthuchikunankupaj qan qolqeta churapuy. Ajinata ruwajtiyki, tukuy yachanqanku mana jinachu kasqanta qanmanta uyarisqankoqa. Aswanpis rikonqanku qanpis Diospa kamachisqanta junt'asqaykita.

²⁵ Jinallataj noqayku uj cartata apacherqaykuña, pikunachus mana judío kajkunamanta Jesuspi atinikorqanku, chaykunaman. Chantá chay cartapi kamacherqayku paykuna lantikunaman jaywasqa aychata ama mikhunankuta, nitaj yawarta, nillataj jeq'eqasqa chayrí sipisqa uywaj aychantapis. Nillarqaykutaj ama khuchichakunankuta, nispa.

²⁶ Iglesiaj kurajninkunaj nisqankuta kasuspa, Pabloqa chay tawa runakunawan khuska q'ayantin llimphuchakorqa Diospa ñawpaqenpi allinpaj qhawasqa kananpaj. Chaypacha Temploj pationman yaykuspa, tukuypa uyarinanta willarqa mayk'ajchus llimphuchakunanku tukukunanta. Chay qhepatataj uywa ñak'asqata Diosman q'olachispa jaywananku karqa sapa ujninkumanta.

Pablota Templopi presochanku

²⁷ Qanchis p'unchay junt'akunan kashajtin, Asiamanta wakin judiokunaqa Temploj pationpi Pablota rikuspa, tukuy runata ch'ajwacherqanku, Pablotataj jap'erqanku.

²⁸ Chantá qhaparispa, nerqanku: Israelitakuna, yanapawayku. Kay runaqa tukuynejpi ayllunchejpa contranta yachachin, jinallataj Moisespa kamachisqanpa contranta, Temploj contrantapis. Astawanqa Grecia llajtayojkunata kay patioman pusaykamuspa, Diospaj t'aqasqa may llimphu cheqata ch'ichichan, nispa.

²⁹ Chayta nerqanku, imaraykuchus llajtapi Pablota rikusqanku Éfeso llajtayoj Trofimowan purishajta. Chayrayku yuyarqanku payqa Trofimota Temploj pationmanpis pusasqanta.

³⁰ Ajinamanta tukuy llajtantin oqharikuspa, Pablota jap'erqanku, qhatatispataj, Temploj pationmanta orqhorqanku. Chay ratopachataj Temploj punkunkunata wisq'arqankupacha.

³¹ Chaywanpis Pablota wañuchinayashajtinku, romano soldadokunata kamachej uyarerqa tukuy Jerusalén llajtapi runakuna oqharikushasqankuta.

³² Chaypachalla romano kamachejqa soldadokunata capitankunatawan pusariykukuspa, ch'ajwa chawpiman chayarqa. Judiokunataj romano kamachejta soldadonkunatawan rikuspa, manaña Pablota maqarqankuchu.

³³ Chantá romano soldadokunata kamachejqa chimpaykuspa, Pablota jap'ichiytawan, kamacherqa iskay cadenawan wataykunankuta. Chantá runakunata taporqa pichus kasqanta, imatachus ruwasqanta ima.

³⁴ Chay runakunarí qhaparisharqanku ujkuna uj jinata, ujkunataj waj jinata. Chay jinapuni ch'ajwa kasqanraykutaj, soldadokunata kamachejqa mana sut'ita entiendeyta aterqachu imatachus nishasqankuta. Chayrayku pay soldadokunata kamacherqa Pablota cuartelman pusanankuta.

³⁵ Cuartelman wicharinapaj patillaman chayaspataj, soldadokunaqa Pablota oqharispa ayqecherqanku, imaraykuchus runakunaqa Pablota wañuchinankupaj jina qhepankuta jamusharqanku.

³⁶ Chay runakunataj qhaparqachasharqanku: Wañuchisqa kachun, nispa.

Pablo runakunaman parlaykun

³⁷ Soldadokuna cuartelmanña yaykushajtinku, Pabloqa soldadokunata kamachejta nerqa: Uj chhikanta qanwan parlariyta munayman, nispa. Soldadokunata kamachejtaj nerqa: Griegota parlayta yachankichu?

³⁸ Manachu qan kanki Egiptomanta chay runa, pichus manaraj unaychu ch'ajwata oqharichispa, 4.000 runa wañuchejkunata ch'innejman pusarqa, chay? nispa.

³⁹ Pablotaj kutichispa, nerqa: Noqa judío kani, Tarso llajtayoj. Tarsoqa Cilicia jap'iypi jatun llajtamin. Kunanqa ama jina kaspa, saqeriway uj chhikanta kay runakunaman parlarejta, nispa.

⁴⁰ Chantá soldadokunata kamachejqa Pablota parlarejta saqerqa. Pablotaj wicharina patillapi sayarikuytawan, makinwan señaspa runakunata ch'inyacherqa. Chantá arameo parlaypi paykunaman parlayta qallarerqa.