Hechos 19 - DIOSPA QHELQACHISQ

Pabloqa Efesoman rin

¹ Corintopi Apolos kashajtin, Pablo orqorara cheqanejta rerqa Éfeso llajtaman chayanankama. Chaypitaj wakin wawqekunawan tinkorqa.

² Paykunatataj taporqa: Qankuna Jesuspi atinikojtiykichej, Santo Espíritu qankunaman jamorqachu? nispa. Paykunataj kuticherqanku: Santo Espíritu kasqanta mana uyarillaykupischu, nispa.

³ Pablo tapullarqataj: Chantá imaraykutaj bautizachikorqankichejri? nispa. Paykunataj kuticherqanku: Bautizaj Juanpa yachachisqanta jap'ikusqaykurayku bautizachikorqayku, nispa.

⁴ Chantá Pablo nerqa: Bautizaj Juanqa, pikunachus Diosman kutirikorqanku, chaykunata bautizarqa. Chay runakunamantaj yachacherqa paypa qhepanta jamoj Jesuspi atinikunankuta, nispa.

⁵ Chayta uyarispa, chay wawqekunaqa Tukuyta Kamachej Jesuspa sutinpi bautizachikorqanku.

⁶ Pablo umanku pataman makinta churaykojtintaj, Santo Espíritu paykunaman urayk'amorqa. Chantá waj parlaykunapi parlarqanku, Diosmantataj sut'incharqanku.

⁷ Tukuyninkupi chunka iskayniyoj qharikuna karqanku.

⁸ Chaymanta Pabloqa judiokunaj tantakunanku wasiman rerqa, mana manchachikuspataj, kinsa killa junt'ata yachacherqa, Diospa kamachiyninmanta entiendechiyta munaspa.

⁹ Wakinkunarí sonqonkuta rumiyachispa, manapuni Jesuspi atinikuyta munarqankuchu, aswanpis tukuypa ñawpaqenpi Jesuspa cheqan ñanninmanta millayta rimarqanku. Chayrayku Pablo paykunamanta t'aqakuspa, Tiranno nisqaj yachachina wasinman mosoj yachachisqakunata pusarqa. Chaypitaj sapa p'unchay paykunata yachacherqa.

¹⁰ Ajinata Pablo ruwarqa iskay wata junt'ata, chayraykutaj Asia cheqanejpi tiyakoj tukuy judiokuna, ajinallataj griegokunapis Tukuyta Kamachej Jesusmanta uyarerqanku.

¹¹ Diosqa Pablonejta runaj mana jayk'aj rikusqan t'ukuna imakunata ruwasharqa.

¹² Chay jina kajtin, runakunaqa Pabloj llankharisqan pañuelokunata, chayrí ima p'achallantapis onqosqakunaman churamoj kanku, chay onqosqakunataj qhaliyaporqankupacha. Jinallataj supaykunapis onqosqakunamanta llojserqanku.

¹³ Chaypacha wakin judío yatirikuna llajtamanta llajta purej kanku, Tukuyta Kamachej Jesuspa sutinta oqharispataj, supaykunata runakunamanta qharqoyta munallarqankutaj. Paykuna supaykunata kay jinata nej kanku: Jesuspa sutinpi, pimantachus Pablo parlan, chaypa sutinpi kamachiyku llojsinaykichejta, nispa.

¹⁴ Judiokunaj ujnin kuraj sacerdote Esceva sutiyoj karqa, paypa churinkunataj ajinata supaykunata qharqoyta munarqanku.

¹⁵ Uj kutirí supayqa paykunaman kuticherqa: Jesustaqa rejsini, pichus Pablo kasqantapis yachallanitaj. Qankunarí, pikunataj kankichejri? nispa.

¹⁶ Chantá supayniyoj runa paykunaman phinkiykuspa, sonqo nanayta maqararqa. Chay runakunataj q'aralla, sinch'i maqasqataj chay wasimanta ayqerqanku.

¹⁷ Chantá Éfeso llajtapi tukuy judiokuna, griegokunapis chayta yachaspa, manchachikorqanku, Tukuyta Kamachej Jesuspa sutintataj jatuncharqanku.

¹⁸ Chaypachallataj Jesuspi ashkha atinikojkunapis jamuspa, tukuypa uyarinanta willakorqanku ñawpajta millay ruwasqankumanta.

¹⁹ Ashkha yatirikunataj layqayta yachanapaj p'anqankukunata tantaykuspa apamorqanku, tukuypa rikunantataj ruphaykucherqanku. Chay ruphachisqanku p'anqakunataj 50.000 qolqe valerqa.

²⁰ Ajinata Diospa simi nisqan kallpawan tukuynejman chayasharqa.

²¹ Chaymanta qhepaman, Pabloqa Macedonianejta, Ajaya jap'iynejta ima riyta yuyarqa, Jerusalenman chayanankama. Pay nerqa: Chaymantataj, Roma llajtamanpis rinallaytaj tiyan, nispa.

²² Chantá Macedoniaman ñawpacherqa iskay yanapajninkuna Timoteota, Erastotawan. Chaykamataj Pabloqa uj mashkha p'unchaytawan Asia jap'iypi qheparikorqa.

Efesopi ch'ajwa

²³ Chaykama Éfeso llajtapi jatun ch'ajwa oqharikorqa Jesuspa cheqan ñanninta qhatikojkunarayku.

²⁴ Demetrio sutiyoj runa chay ch'ajwata oqharicherqa. Payqa qolqe metalmanta ruwaj kaspa, Artemisa nisqa lantej templonman rijch'akojta juch'uychaj templokunata ruwaj. Ajinamanta paywan khuska ruwajkunata ashkha qolqeta ganachej.

²⁵ Chantá pikunachus Artemisaj templonta ruwajkunata tantachispa, Demetrio nerqa: Wiraqochikuna, qankuna allinta yachankichej kay templokunata ruwaspa kawsakusqanchejta.

²⁶ Chaywanpis qankuna rikushankichej, uyarishankichejtaj, imaynatachus Pablo tukuyman yuyayta qosqanta: Runaj makinwan ruwasqaqa mana dioskunachu kanku, nispa. Paytaj ashkha runaj sonqonta tijrachishan, mana Éfeso llajtallapichu, manachayqa tukuy Asiantinpi.

²⁷ Chayqa mana walejchu noqanchejpajqa, imaraykuchus qolqe jap'inanchejqa tukukaponqa. Mana chayllachu. Artemisaj templonpis qhesachasqallataj kanqa, runataj manaña payta maypaj qhawanqankuchu. Yachankichej jina, Asia jap'iypi tukuy tiyakojkuna, kay pachantinpi ima Artemisata yupaychanku, nispa.

²⁸ Jinapi Demetrioj parlasqanta uyarispa, Artemisaj templonta ruwajkunaqa Pablopaj mayta phiñarikorqanku, qhapariytataj qallarerqanku: Jatunchasqa kachun Éfeso llajtayojkunaj Artemisanqa, nispa.

²⁹ Chantá tukuy llajtantin oqharikuspa, Gayota, Aristarcotawan teatro nisqa tantakuna wasiman qhataterqanku. Paykuna Macedoniamanta karqanku, Pablota yanapajkuna.

³⁰ Jinapi Pablopis teatroman yaykuyta munarqa, chay runakunaman parlananpaj. Jesusta qhatikoj masinkunarí payta jark'arqanku.

³¹ Jinallataj Asiapi wakin kamachejkunamanta Pabloj kawsaqenkunapis payman nichillarqankutaj amapuni teatroman rinanta.

³² Chaykama teatropi tantasqa kajkuna manchayta ch'ajwasharqanku. Wakin uj jinata qhaparisharqanku, wajkunataj waj jinata. Paykunamanta ashkha ni yachallarqankupischu imapajchus tantakusqankuta.

³³ Jinapi judiokunaqa runa chawpimanta Alejandrota tanqaspa ñawpajman aparqanku. Paytaj señawan paykunata ch'inyachiyta munarqa, imaraykuchus sut'inchayta yuyarqa mana judiokunachu chay ch'ajwamanta juchayoj kasqankuta.

³⁴ Chay runakunarí Alejandro judío kasqanta reparaytawan, iskay phanita jina uj kunkalla qhaparerqanku: Jatunchasqa kachun Éfeso llajtayojkunaj Artemisanqa, nispa.

³⁵ Chantá chay llajtaj kuraj qhelqerin runakunata ch'inyachispa, nerqa: Éfeso llajtayojkuna, tukuy yachanku noqanchej Éfeso llajtayojkuna jatun Artemisaj templonta waqaychaj kasqanchejta, jinallataj janaj pachamanta urmamoj lantintapis.

³⁶ Jina kajtenqa, qankuna ch'inlla kakuychej, amataj imatapis mana allinta unanchaspaqa ruwaychejchu.

³⁷ Yanqhallata kay runakunata pusamunkichej. Paykuna mana imatapis templomanta suwankuchu, nitaj diosninchej Artemisapajpis millayta rimankuchu.

³⁸ Jinallataj sichus Demetrio, llank'aj masinkunawan ima pejpa contranta imatapis niyta munanku chayqa, juezkuna tiyan. Sapa ujninku quejakoj richunku.

³⁹ Chantá waj imakunamantawan parlariyta munaspaqa, juntaj ñawpaqenpi chayta sut'inchanaykichej tiyan.

⁴⁰ Kaypeqa qhasillata ch'ajwata jatarichishankichej. Pajtataj Romapi kamachejkuna juchachawasunman contrankupi oqharikusqanchejmanta, noqanchejtaj mana chaymanta kutichikuyta atisunmanchu, nispa.

⁴¹ Chay qhelqeri ajinata parlayta tukuspataj, runakunata kachaporqa.