Hechos 17 - DIOSPA QHELQACHISQ

Tesalónica llajtapi ch'ajwa oqharikun

¹ Chaymanta Pablowan, Silaswan rerqanku Anfípolis llajtanejta, Apolonianejta ima Tesalonicaman chayanankukama. Chaypitaj judiokunaj tantakunanku wasi karqa.

² Chantá Pabloqa yachasqa kasqanman jina judiokunaj tantakunanku wasiman yaykorqa. Jinataj kinsa samarina p'unchaypi Diospa simi nisqanmanta sut'ita willarqa.

³ Chaywan paykunaman sut'inta rikucherqa Cristoqa ñak'arinanpuni kasqanta, wañusqamantataj kawsarimpunanta ima. Chaymantataj pay nerqa: Kay Jesusmin, pimantachus noqa willaykichej, paymin Cristoqa, nispa.

⁴ Paykunamanta wakinkunaqa Jesuspi atinikuspa, Pablowan, Silaswan ujchakorqanku. Ajinamanta Grecia suyumanta Diosta ashkha yupaychajkuna, allinpaj qhawasqa ashkha warmikuna ima Jesuspi atinikorqanku.

⁵ Chaymanta wakin judiokunaqa Pablotawan, Silastawan envidiawan qhawarqanku ashkha runakuna paykunata qhatisqankurayku. Chayrayku qhella millay runakunata mink'amorqanku, paykunawan llajtantinpi ch'ajwata oqharichinankupaj. Jinapitaj paykuna Jasonpa wasinman ujllata yaykuykorqanku Pablota, Silastawan mask'aj, paykunata orqhomuspa, ch'ajwashaj runakunaman jaywaykunankupaj.

⁶ Paykunata mana tarispatajrí, Jasonta, wakin wawqekunatawan qhatatarqanku llajtapi kamachejkunaj ñawpaqenman. Qhaparispataj, nerqanku: Kaykunaqa tukuynejpi runakunata ch'ajwachinku. Kunanqa kaymanñataj jamusqanku.

⁷ Jasonqa paykunata wasinpi jap'ikushan. Kay tukuyninkutaj kuraj kamachejninchej Cesarpa kamachisqanta mana kasunkuchu. Manachayqa paykuna ninku Jesús sutiyoj waj kuraj kamachej kasqanta, nispa.

⁸ Chayta uyarispataj, tukuy llajtantin, kamachejkunawan ima ni imanayta aterqankuchu.

⁹ Chantá Jasonmanta, chay waj wawqekunamantawan garantiata qolqeta jap'ispa, kachariporqanku.

Pablowan Silaswan Bereaman chayanku

¹⁰ Chay tutapacha wawqe panakunaqa Pablota, Silastawan Berea llajtaman kacharpayarqanku. Jaqayman chayaspataj, judiokunaj tantakunanku wasiman yaykorqanku.

¹¹ Bereapi tiyakojkunatajrí aswan k'acha karqanku Tesalonicapi tiyakojkunamanta nisqaqa, imaraykuchus Diospa Simi Nisqanta tukuy sonqo jap'ikorqanku. Chayrayku sapa p'unchay Diospa Qhelqachisqanta allinta qhawaspa, Pabloj yachachisqan cheqachus manachus kasqanta waturerqanku.

¹² Ajinamanta Grecia llajtayoj allinpaj qhawasqa warmikunamanta, chantá qharikunamanta ima Jesuspi may chhika atinikorqanku.

¹³ Tesalonicapi kaj judiokunarí uyarisqanku Pabloqa Bereaman chayaspa, Diospa simi nisqanta willashasqanta. Chayrayku paykuna Bereaman rispa, chay llajtayojkunaj umanta muyucherqanku, jinataj ch'ajwata oqharicherqanku.

¹⁴ Chantá wawqe panakunaqa Pablota usqhayllata kacharpayarqanku, mama qochaj kantunman rinanpaj. Silaswan, Timoteowantajrí Bereapi qhepakorqanku.

¹⁵ Pablowan rejkuna Atenaskama payta pusarqanku, chaymantataj Bereaman kutiriporqanku. Pablotajrí paykunanejta Silasman, Timoteomanwan nicherqa paykuna askamalla jamuspa, paywan tantakunankuta.

Pabloqa Atenas llajtapi

¹⁶ Pabloqa Atenaspi Silasta, Timoteotawan suyashajtin, chay llajtapi tukuy imaymana lanti kasqanmanta sonqon t'impurerqa.

¹⁷ Chayrayku Pabloqa judiokunawan, Diosta yupaychaj mana judío kajkunawan ima judiokunaj tantakunanku wasipi pantasqankumanta reparacherqa. Kikillantataj sapa p'unchay plazaman tantakamojkunawanpis chaymanta parlallarqataj.

¹⁸ Chantá Epicuro sutiyoj runata qhatejkuna, estóicos nisqa yachaysapa runakunawan ima Pablowan tapunaykukorqanku. Ujkunataj nerqanku: Imatataj niyta munan kay ch'ajwakuri? nispa. Wakintaj nerqanku: Kayqa waj mosoj dioskunamantasina parlashan, nispa. Chayta nerqanku, imaraykuchus Pabloqa willasharqa Jesuspa sumaj willayninmanta, wañusqamanta kawsarimuymantawan.

¹⁹ Chantá chay runakuna Pablota Areópago nisqa juntaman pusarqanku. Chaypitaj taporqanku: Willariwaykumanchu imachus chay mosoj yachachiyniyki kasqanta?

²⁰ Noqayku chay parlasqaykita manapuni ni jayk'aj uyarerqaykuchu. Chayrayku yachayta munayku imatachus chay nisqayki niyta munasqanta, nispa.

²¹ Chayta nerqanku, imaraykuchus Atenas llajtayojkunawan, chaypi tiyakoj waj llajtayojkunawan ima mayta munaj kanku ima mosoj yachachiytapis uyariyta, chayrí chaymanta parlayta.

²² Chantá Pabloqa Areópago juntapi sayarispa, nerqa: Atenas llajtayojkuna, noqa reparani qankunaqa ashkha dioskunata tukuy sonqo yupaychajkuna kasqaykichejta.

²³ Llajtaykichejpi puriykachashaspaqa, chay dioskunata yupaychanapaj may chhika altarkunata rikuni. Jinallataj uj altartapis tarini kay jinata nishajta: “Kayqa mana rejsisqa diospata”, nispa. Chay Diosmanta, pitachus mana rejsispalla yupaychankichej, chaymantamin noqaqa parlasqaykichej.

²⁴ Paymin kay pachata, tukuy imatawan ruwaj Diosqa, janaj pachajta, kay pachajtapis Tukuyta Kamachejnintaj. Manataj payqa runaj ruwasqan templopichu tiyakun.

²⁵ Nillataj Diosqa imapipis runa yanapananta suyanchu. Manachayqa pay tukuyman kawsayta qon, samayta, tukuy imatawan.

²⁶ Payqa uj runallamanta tukuy suyuta rikhuricherqa, kay pachaman junt'ananchejpaj. Diosllataj churarqa mayk'ajkamachus, chantá may cheqapichus tiyanankuta.

²⁷ Chayta Dios ruwarqa noqanchej payta mask'ananchejpaj, ichapis imaynallamantapis reparaspa, payta tarinanchejpaj. Jinapis Diosqa sapa ujninchejmanta mana karupichu.

²⁸ Manachayqa Diosrayku kawsanchej, purinchej, kanchejtaj. Yarawita wakichejniykichejkunamanta wakinkuna kay jinata nisqanku: Noqanchejpis Diospa miraynin kanchej, nispa.

²⁹ Chayrayku Diospa mirayninchus kanchej chayqa, mana yuyasunmanchu Diosqa qorimanta, qolqe metalmanta, chayrí rumimanta ruwasqa lantiman rijch'akusqanta. Chaykunaqa runaj yuyasqanman jinalla ruwasqa kanku.

³⁰ Ñawpa tiempopi runakuna Diosta mana rejserqankuchu chaypis, Dios chayta qonqayman churarqa. Kunantajrí, Diosllataj tukuynejpi runakunata kamachin payman kutirikunankuta.

³¹ Chayqa ajina, imaraykuchus Dios uj p'unchayta wakichinña, chay p'unchaypitaj cheqa kayninman jina tukuy runata juzganqa kachamusqan runanejta. Diostaj sut'ita yachayta qon pichus chay runa kasqanta, chay runata wañusqamanta kawsarichimuspa, nispa. Ajinata Pabloqa juntapi kajkunaman nerqa.

³² Wañusqakuna kawsarimpunankumanta uyarispa, wakinkunaqa Pablomanta asikorqanku. Ujkunarí nerqanku: Waj kutillapiña imatachus parlashanki, chaymanta astawan uyarisqayku, nispa.

³³ Chantá Pablo paykunaj chawpinkumanta llojsiporqa.

³⁴ Wakin runakunatajrí Pablowan khuskachakorqanku paypa nisqanta jap'ikusqankurayku. Chaykunamanta karqanku Areópago juntamanta Dionisio, chantá Dámaris sutiyoj warmi, wajkuna ima.