Hechos 16 - DIOSPA QHELQACHISQ

Timoteoqa Pablowan khuska rin

¹ Chaymanta Pablowan, Silaswan ima Derbe llajtaman, Listramanwan chayarqanku. Chaypi Jesusta qhatikoj runa Timoteo sutiyoj tiyakorqa. Mamanqa Jesuspi atinikoj judío warmi karqa, tatantaj Greciamanta karqa.

² Listrapi, chantá Iconio llajtapi tiyakoj wawqe panakuna Timoteomanta allinta parlaj kanku.

³ Jinapi Pabloqa Timoteota paywan pusayta munarqa. Chaywanpis judiokunata mana phiñachiyta munaspa, Pabloqa Timoteota circuncidacherqa, imaraykuchus chay llajtapi judiokuna yacharqanku Timoteoj tatan griego runa kasqanta.

⁴ Chantá Pablowan, Timoteowan llajtamanta llajta purispa, sapa iglesiaman willarqanku imatachus Jerusalenpi Jesuspa kuraj kachankuna, iglesiapi kurajkunawan ima kamacherqanku, chayta. Jinallataj paykunata kamacherqanku chay tukuyta junt'anankuta.

⁵ Ajinamanta iglesiakunaqa Jesuspi atinikusqankupi kallpachakorqanku, sapa p'unchaytaj Diosman kutirikoj runakuna astawan iglesiaman yapakorqanku.

Pablo mosqoypi jina uj runata rikun

⁶ Pablowan, Silaswan, Timoteowan ima chay qhepata Frigianta, Galacianta rishajtinku, Santo Espíritu paykunata jark'arqa ama Asia suyupi Jesusmanta sumaj willayta willanankupaj.

⁷ Paykuna Misiaman chayaspa, Bitiniaman yaykuyta munashajtinku, Jesuspa Espíritun manallataj rinankuta saqerqachu.

⁸ Ajinamanta rerqanku Misianejta, chaymantataj Troasman rerqanku.

⁹ Chay tutataj Pabloqa mosqoypi jina rikorqa Macedoniamanta uj runata. Pabloj ñawpaqenpi sayarikuspataj, chay runa mañakushasqa: Jamuriy ari Macedoniaman yanaparinawaykupaj, nispa.

¹⁰ Pablo chayta mosqoypi jina rikusqanrayku, noqayku wakichikorqaykupacha Macedoniaman rinaykupaj. Pabloj chay rikusqannejta yacharqayku Dios wajyawasqaykuta paykunaman Jesusmanta sumaj willayta willanaykupaj.

Lidiaqa Jesuspi atinikun

¹¹ Troasmanta noqayku botepi cheqanta rerqayku Samotracia churukama, q'ayantintaj Neapolisman chayarqayku.

¹² Chaymantataj rerqayku Romaj kamachiyninpi kaj Filipos llajtaman, mayqenchus Macedoniapi aswan jatun llajta karqa, chayman. Chaypitaj mana unaytachu qhepakorqayku.

¹³ Samarina p'unchay llajtamanta llojsispa, noqayku mayu kantuman rerqayku, Diosmanta mañakuna kaj cheqaman. Chaypi tiyaykuspataj, Jesusmanta sumaj willayta yachacherqayku chaypi tantasqa warmikunaman.

¹⁴ Ujnin kaj warmi Lidia sutiyoj karqa Tiatira llajtamanta, paytaj may sumaj puka kulli telata qhatoj. Diosta yupaychajllataj karqa. Jinapi Tukuyta Kamachej Jesusqa Lidiaj sonqonman parlapayarqa, paytaj Pabloj nisqanta tukuy sonqo jap'ikorqa.

¹⁵ Jinapi Lidia bautizachikorqa tukuy wasi ayllunwan ima. Chantá pay niwarqayku: Sichus qankuna yuyankichej Tukuyta Kamachej Jesuspi tukuy sonqo atinikusqayta chayqa, wasiyman jamuriychej uj mashkha p'unchayllatapis qheparikunaykichejpaj, nispa. Ajinamanta Lidia mayta mañakuwasqaykurayku wasinman rerqayku.

Pablowan Silaswan carcelpi

¹⁶ Uj p'unchay noqayku Diosmanta mañakoj rishajtiyku, uj kamachi sipas taripamuwarqayku. Pay supayniyoj kasqanrayku watuyta yachaj, chaynejtataj chay sipaspa patronninkuna ashkha qolqeta jap'ej kanku.

¹⁷ Chay sipasqa Pabloj qhepanta, qhepaykutawan ima jamorqa, jinataj qhaparqachaspa, nerqa: Kay runakunaqa Patapi Kaj Diospa kamachinkuna kanku. Paykuna willasunkichej imaynatachus qhespichisqa kanaykichejta, nispa.

¹⁸ Ajinallatapuni unayta sapa p'unchay qhaparishajtin, Pabloqa amisqaña kaspa, kutiriytawan sipaspi kashaj supayta nerqa: Jesucristoj sutinpi kamachiyki paymanta llojsinaykita, nispa. Chay ratopachataj chay supayqa sipasmanta llojserqa.

¹⁹ Jinapi sipaspa patronninkuna manaña paynejta qolqeta jap'inankuta yachaspa, Pablota, Silastawan jap'iytawan, paykunata aparqanku plazaman, maypichus juezkuna karqanku, chayman.

²⁰ Chantá juezkunata nerqanku: Kay runakuna judiokuna kaspa, llajtanchejpi ch'ajwata oqharichishanku.

²¹ Paykuna waj jina yachachiykunata yachachishanku, mayqentachus noqanchej Romaj kamachiyninpi kajkunaqa mana jap'ikuyta atisunmanchu, nitaj ruwaytapis, nispa.

²² Chantá runakunapis Jesuspa kachankunaj contrankuta oqharikullarqankutaj. Juezkunataj kamacherqanku Pabloj patanchanan p'achata Silaspatawan lluch'uspa, paykunata seq'onankuta.

²³ Manchayta seq'oykuytawantaj, carcelman paykunata wisq'aykorqanku, carcelpi kamachejtataj mayta nerqanku sumajta paykunata qhawananta.

²⁴ Carcelpi kamachejtaj juezkunaj nisqankuta kasuspa, Pablotawan Silastawan aswan ukhuman wisq'aykorqa, chakinkutataj cepoman mat'iykorqa.

²⁵ Chawpi tutata jinataj Pablowan, Silaswan ima Dioswan parlarikusharqanku, takispataj, payta yupaychasharqanku. Waj wisq'asqakunapis chay takisqankuta uyarisharqanku.

²⁶ Chaypacha jallp'a ujllata sinch'ita ikhakorqa. Carcelpa cimientonkuna lajrarakorqa, chay ratopachataj punkukunapis kicharirakorqanku. Wisq'asqa tukuy runamantataj cadenanku t'akarakorqa.

²⁷ Chantá carcelpi kamachejqa ujllata rijch'arispa, punkukunata kichasqata rikorqa, jinataj yuyarqa wisq'asqa kajkuna ayqesqankuta. Chayrayku espadanta orqhokuspa, wañuchikuyta munasharqa.

²⁸ Pablotajrí sinch'ita qhaparerqa: Ama imanakuychu, tukuyniyku kaypi kashayku, nispa.

²⁹ Chaymanta carcelpi kamachejqa k'anchata qochikuspa, carcel ukhuman yaykorqa, kharkatitispataj Pabloj, Silaspa ñawpaqenkuman wijch'uykukorqa.

³⁰ Jawaman orqhomuspataj, paykunata taporqa: Wiraqochikuna, imatataj ruwasaj qhespichisqa kanaypajri? nispa.

³¹ Paykunataj kuticherqanku: Tukuyta Kamachej Jesuspi atinikuy, jinamantataj qan qhespichisqa kanki, wasi aylluykiwan ima, nispa.

³² Chantá Pablowan Silaswan Tukuyta Kamachej Jesuspa simi nisqanta willarqanku carcelpi kamachejman, wasinpi tukuy kajkunamanwan.

³³ Chaymantataj carcelpi kamachej chay tutapacha Jesuspa kachankunaj k'irinkuta jamperqa. Chay ch'isipachataj pay, tukuy wasi ayllunwan ima bautizachikorqanku.

³⁴ Chantá carcelpi kamachejqa Pablota, Silastawan wasinman pusaspa, mikhunata jaywarerqa. Paytaj wasi ayllunwan ima kusikorqa Diospi atinikusqankurayku.

³⁵ Q'ayantin paqarin juezkunaqa soldadokunata kacharqanku Pablota, Silastawan carcelmanta kacharinankupaj.

³⁶ Chantá carcelpi kamachejqa Pabloman willarqa: Juezkuna nichimunku qankuna kacharisqa kanaykichejta. Chayrayku kunanqa allillanta ripuychej, nispa.

³⁷ Pablorí soldadokunata nerqa: Manaraj imamantapis juchayoj kasqaykuta sut'inchashaspa, juezkunaqa tukuypa rikunanta seq'ochiwarqayku. Chantá carcelpi wisq'achiwarqayku, manapis Roma llajtayojchu kaykuman jina. Kunantaj, pakayllamantachu kachariwasqayku? Mana jinachu kanqa. Aswanpis paykuna kikinku orqhonawaykupaj jamuchunku, nispa.

³⁸ Chantá chay soldadokuna Pablojta, Silaspatawan nisqankuta juezkunaman willamorqanku, juezkunataj sinch'ita mancharikorqanku, Pablowan, Silaswan Roma llajtayoj kasqankuta yachaspa.

³⁹ Chantá carcelman rispa, paykuna mañarqanku Pablowan, Silaswan chay ruwasqankuta qonqayman churanankuta. Jinaytawantaj, carcelmanta paykunata orqhospa, mañallarqankutaj chay llajtamanta ripunankuta.

⁴⁰ Chantá Pablowan, Silaswan carcelmanta llojsispa, Lidiaj wasinmanraj rerqanku. Chaypi kaj wawqe panakunata sonqochaytawantaj, riporqanku.