Hechos 15 - DIOSPA QHELQACHISQ

Iglesiaj kurajninkuna Jerusalenpi tantakunku

¹ Chaypacha Judeamanta wakin wawqekuna Antioquiaman jamuspa, mana judío kaj wawqe panakunaman kay jinata yachachiyta qallarerqanku: Sichus Moisespa kamachisqanman jina mana circuncidachikunkichejchu chayqa, mana qhespichisqa kayta atinkichejchu, nispa.

² Pablowan, Bernabewanrí chay wawqekunawan sinch'ita churanakorqanku. Chayrayku Antioquía iglesiaqa Pablota, Bernabeta, wakin wawqekunatawan ima Jerusalenman kacharqanku, chaypi Jesuspa kuraj kachankunawan, iglesiapi kurajkunawan ima chaymanta sut'inchanankupaj.

³ Jinapi Antioquía iglesia paykunata kacharpayajtin, paykuna Fenicianejta, Samarianejta ima rerqanku. Rej jinataj Jesuspi atinikojkunaman willararqanku imaynatachus mana judío kajkunapis Diosman kutirikusqankumanta. Chay wawqe panakunataj chayta uyarispa, maytapuni kusirikorqanku.

⁴ Pablowan, Bernabewan Jerusalenman chayajtinku, iglesiawan, Jesuspa kuraj kachankunawan, iglesiapi kurajkunawan ima kusiywan paykunata jap'erqanku. Chantá Pablowan, Bernabewan paykunamanpis willallarqankutaj Dios imatachus paykunanejta ruwasqanta.

⁵ Chaywanpis fariseokunamanta wakin wawqekuna sayarispa, nerqanku: Mana judío kajkunamanta Jesuspi atinikojkunaqa circuncidasqa kananku tiyan, jinallataj Moisespa kamachisqantapis junt'anallankutaj tiyan, nispa.

⁶ Chantá Jesuspa kuraj kachankunaqa iglesiapi kurajkunawan tantakorqanku, chaymanta sut'inchanankupaj.

⁷ Anchataña churanakojtinkutaj, Pedro sayarispa, nerqa: Wawqekuna, yachankichej imaynatachus unay qankuna ukhumanta Dios ajllawasqanta mana judío kajkunaman Jesusmanta sumaj willayta willanaypaj, paykunapis Jesuspi atinikunankupaj.

⁸ Diosqa tukuy runaj sonqonkuta rejsin, paytaj yachayta qorqa mana judío kajkunatapis allinpaj qhawasqanta, imaraykuchus Santo Espirituta paykunamanpis qorqa, imaynatachus ñawpajta noqanchejman qowarqanchej, ajinata.

⁹ Payqa noqanchejta, mana judío kajkunatapis uj ñawillawan qhawawanchej. Chayrayku paykunaj sonqonkutapis juchamanta llimphucharqa Jesuspi atinikusqankurayku.

¹⁰ Jina kajtenqa, imaraykutaj kunan qankunaqa Diospa contranpi sayaykunkichejri? Qankunataj Jesusta qhatikoj mana judiokunaman llasa q'epita jina Moisespa kamachisqankunata q'epirichiyta munankichej. Chay kamachisqakunataqa mana ñawpa tatanchejkuna, nitaj noqanchejpis junt'ayta aterqanchejchu, icharí?

¹¹ Noqanchej yachanchej qhespichisqa kasqanchejta Tukuyta Kamachej Jesuspa qhasilla k'acha yanapayninnejta, imaynatachus paykuna qhespichisqa kanku, ajinallatataj, nispa.

¹² Chantá Pedroj nisqanta uyariytawan, tukuyninku ch'inyakorqanku, uyarinankupaj Bernabewan Pablowan imatachus willanankuta. Paykunataj willarqanku imaynatachus Dios paykunanejta runaj mana jayk'aj rikusqanta, may t'ukuna imakunata ima ruwasqanta mana judío kajkuna ukhupi.

¹³ Paykuna parlayta tukojtinkutaj, Santiago sayarispa nerqa: Wawqekuna, uyariwaychej:

¹⁴ Ñapis Simón Pedro willawanchejña imaynatachus kay ñawpaj kutipi Diosqa mana judío kajkunata watukusqanta, paykuna ukhumantataj wakinkunata ajllakusqanta paypata kanankupaj.

¹⁵ Diosmanta ñawpa sut'inchajkunaj willasqankupis Pedroj nisqanwan kikinchakun, imaraykuchus ajinata qhelqasqanku:

¹⁶ Uj p'unchay jamushan, chay p'unchaypitaj Davidpa ayllunta urmasqa kasqanmanta oqharisaj, watejmantataj sayarichisaj, imaynachus ñawpajta karqa, kikinta.

¹⁷ Ajinamanta wajkunapis Tukuyta Kamachej Diosta mask'anqanku, tukuy suyumanta mana judío kajkunapis, pikunachus sutiyta oqharispa Diosninkupaj rejsikapuwanku, chaykuna, nispa.

¹⁸ Ajinata Tukuyta Kamachej Dios nin, pichus kay imakunata ruwananta unaymantapachaña rejsicherqa, chay, nispa.

¹⁹ Chantá Santiago nillarqataj: Yuyasqayman jina, mana judío kajkuna Diosman kutirikushajtinku, mana paykunata pantachinachu.

²⁰ Manachayqa uj cartata paykunaman apachispa, kayllata nisunman: Qhasi dioskunaman jaywasqamantaqa ama mikhunankuta, ama khuchichakunankuta, amataj jeq'eqasqa chayrí sipisqa uywaj aychanta mikhunankuta, nillataj yawartapis mikhunankuta, nispa.

²¹ Chayta qhelqaspa kamachisunman, imaraykuchus unaymantapacha sapa llajtapi Moisespa kamachisqankunamanta willakun, jinallataj tantakuna wasikunapi sapa samarina p'unchaypi tukuypa uyarinanta ñawirinku, nispa.

Mana judío kajkunaman cartata apachinku

²² Chantá Jesuspa kuraj kachankuna, iglesiapi kurajkunawan, tukuy iglesiantin ima paykuna ukhumanta wakin wawqekunata ajllarqanku Pablowan, Bernabewan khuska Antioquiaman kutirinankupaj. Jinapitaj paykuna Judasta, pichus Barsabás nisqata, Silastawan ima ajllarqanku. Chay iskay wawqekuna Jerusalén iglesiapi allinpaj qhawasqa karqanku.

²³ Cartata kay jinata ruwaspataj, paykunawan apacherqanku: Noqayku Jesuspa kuraj kachankuna, iglesiapi kurajkunawan ima wawqeykichej jina napaykamuyku qankuna mana judío kaj wawqe panakunata, pikunachus Antioquiapi, Siriapi, Ciliciapi ima tiyakojkunata.

²⁴ Wakin noqayku ukhumanta mana kachasqallayku qankunaman risqanku, jinataj yachachisqankuwan umaykichejta muyuchispa, yuyayniykichejta tijrasqanku.

²⁵ Chayrayku tukuyniyku uj yuyaylla tantakuspa, noqayku ukhumanta wakin wawqekunata ajllarqayku. Chantá paykunatawan munasqa wawqenchej Bernabetawan, Pablotawan qankunaman kachamushayku.

²⁶ Paykunaqa Tukuyta Kamachej Jesucristoj sutinrayku wañuytapis mana manchachikorqankuchu.

²⁷ Jinallataj Judasta, Silastawan kachamushayku, paykunataj uyapura chaymanta sut'inchasonqachej.

²⁸ Santo Espirituman, noqaykumanpis kayqa allin rijch'awayku: Noqaykoqa Moisespa kamachisqantaqa mana llasa q'epita jina qankunaman q'epirichiyta munaykuchu. Manachayqa kayllata junt'anaykichejta munayku:

²⁹ Ama lantikunaman jaywasqa aychata mikhuychejchu, nitaj yawarta, nillataj jeq'eqasqa chayrí sipisqa uywakunaj aychantapis. Amallataj khuchichakuychejchu. Chaykunamanta karunchakuspa, allinta ruwankichej. Tinkunakama kachun, nispa.

³⁰ Chantá kachasqa wawqekuna Antioquiaman purirerqanku. Chayaytawantaj, Jesusta tukuy qhatikojkunata tantaspa, paykunaman chay cartata jaywarqanku.

³¹ Wawqe panakunataj chay cartata ñawirispa, mayta kusikorqanku paykunata sonqochasqanmanta.

³² Chantá Diosmanta sut'inchaj Judaswan, Silaswantaj, wawqe panakunata sonqocharqanku sinch'itapuni sayanankupaj.

³³ Ajinaqa paykuna uj mashkha p'unchaykunata Antioquiapi qhepakorqanku. Chaymantataj wawqe panakunaqa paykunata kusisqata kachaporqanku, maymantachus jamorqanku, chayman.

³⁴ Silastajrí Antioquiapi qhepakorqa.

³⁵ Pablowan, Bernabewan ima Antioquiapi qhepakullarqankutaj. Jinataj ashkha wawqe panakunawan khuska Diospa simi nisqanta yachacherqanku, Jesusmanta sumaj willaytapis willallarqankutaj.

Pablowan Bernabewan t'aqanakunku

³⁶ Chaymanta qhepaman Pabloqa Bernabeta nerqa: Jaku, tukuy llajtapi wawqe panakunata ujtawan waturikamuna, maypichus Tukuyta Kamachej Jesuspa simi nisqanta willarqanchej, chayman, imaynachus paykuna kashasqankuta yachananchejpaj, nispa.

³⁷ Chaypacha Bernabeqa Juan Marcos nisqata pusayta munarqa.

³⁸ Pablotajrí mana Marcosta pusayta munarqachu, imaraykuchus ñawpaj kaj riyninkupi Marcosqa Panfilia llajtapi paykunata saqerpayaspa, manaña riyta munasqachu Jesusmanta sumaj willayta willamoj.

³⁹ Jinapi paykunapura chaymanta churanakusqankurayku, t'aqanakorqanku. Bernabeqa Marcoswan khuska Jatun Qochanejta botepi Chipreman rerqa.

⁴⁰ Pablotajrí Silasta ajllarqa paywan khuska rinanpaj. Chantá Antioquía iglesiaqa Tukuyta Kamachej Jesuspa sutinpi paykunata kacharpayarqanku.

⁴¹ Paykunataj Sirianejta, Cilicianejtawan rispa, chaypi kaj iglesiakunata kallpacharqanku.