Hechos 14 - DIOSPA QHELQACHISQ

Pablowan Bernabewan Iconio llajtapi

¹ Iconiopipis Pablowan, Bernabewan ima usunkuman jina judiokunaj tantakunanku wasiman yaykorqanku. Sut'ita Jesusmanta parlasqankuraykutaj, ashkha judiokuna Jesuspi atinikorqanku, jinallataj mana judío kajkunapis.

² Jesuspi mana atinikoj judiokunarí mana judío kajkunata yachaykuchispa, Pabloj chantá Bernabéj contrankupi oqharicherqanku.

³ Chaywanpis Pablowan, Bernabewan chaypi unayta qhepakorqanku. Paykunataj mana manchachikuspa, Tukuyta Kamachej Jesusmanta willarqanku, paypi sonqonkuta churaspa. Paytaj kachasqankunaj parlasqanku jinapuni kasqanmanta yachayta qonanpaj runaj mana jayk'aj rikusqanta, may t'ukuna imakunata ima rikucherqa.

⁴ Ajinaqa chay llajtapi tiyakojkuna iskayman t'aqakorqanku: Ujkunaqa judiokunaman kutikorqanku, ujkunataj Jesucristoj kachankunaman.

⁵ Chaymantataj mana judío kajkunawan, judiokunawan, kamachejninkukunawan ima tantakuspa, yachachinakorqanku Jesucristoj kachankunata maqaykuytawan, rumiwan ch'anqaykuspa wañuchinankupaj.

⁶ Jinapi Pablowan, Bernabewan ima chayta yachaspa, Licaonia jap'iypi Listra llajtaman, Derbeman ima ayqerqanku, chaymantataj chay muyuyninpi cheqakunaman rerqanku.

⁷ Chaypipis paykuna Jesusmanta willayta willarallarqankutaj.

Pablota Listrapi rumiwan ch'anqaykunku

⁸ Listra llajtapi uj runa karqa chakinmanta suchu. Paqarisqanmantapacha ajina kasqanraykutaj mana jayk'aj puririsqachu.

⁹ Uj kutipi Pablo Jesusmanta willashajtin chay runaqa Pabloj parlasqanta uyarisharqa. Pablotaj suchu runata qhawarispa, yacharqa Jesuspi atinikusqanta qhaliyapunanpaj.

¹⁰ Chayrayku Pablo jatunmanta parlaspa, suchuta nerqa: Sayariy, nispa. Suchutaj ujllata sayarispa, puririyta qallarerqa.

¹¹ Pabloj ruwasqanta rikuspataj, runakuna qhapariyta qallarerqanku Licaonia rimaypi: Runaman rijch'akoj dioskuna urayk'amuspa, waturikoj jamuwasqanchej, nispa.

¹² Chantá Bernabeta suticharqanku Júpiter, nispa, Pablotataj Mercurio, nispa, paypuni ñawpajta parlarej kasqanrayku.

¹³ Jupiterpa templon llajtaman yaykunapi karqa. Jinapitaj chay lantej sacerdoten torokunata, t'ika pillukunatawan llajtaj punkunman apamorqa. Chantá sacerdotewan, runakunawan ima wakichikorqanku chay torokunata ñak'aspa, Pablotawan, Bernabetawan yupaychanankupaj.

¹⁴ Pablowan, Bernabewanqa chay runakuna imatachus ruwayta munasqankuta reparaytawan, p'achankuta llik'irakorqanku may llakisqa kasqankumanta yachayta qospa. Jinaspataj, runa chawpiman yaykorqanku, qhaparerqankutaj:

¹⁵ Runa masikuna, imaraykutaj kayta ruwashankichejri? Noqayku runalla kayku, qankuna jina. Aswanpis qankunaman willaj jamuyku, kay qhasi manakaj imakunata saqespa, kawsashaj Diosman kutirikunaykichejpaj. Paymin janajta, kay pachata, mama qochata ima ruwarqa, chaykunapi tukuy ima kajkunatapis.

¹⁶ Ñawpajtaqa Dios saqellarqa tukuy runakuna munayninkuta ruwajta.

¹⁷ Chaywanpis pay sut'ita rejsichikorqa k'acha Dios kasqanta allin imakunata ruwaspa. Payqa parata apachimusunkichej, chajraykichejta tiemponpi poqochin, mikhuna patapitaj uywakusunkichej, sonqoykichejtataj kusiywan junt'achin, icharí?

¹⁸ Chayta nispa, Pablowan Bernabewan ima chay runakunawan ñak'ayta kasuchikorqanku, ama torokunata ñak'aspa paykunaman yupaychanankupaj dioskunaman jina.

¹⁹ Jinallapi wakin judiokuna Antioquiamanta, Iconiomantawan chayamorqanku, paykunataj runakunata yachaykuchispa, ujtawan ch'ajwata jataricherqanku. Chay runakunataj Pablota rumiwan ch'anqaykorqanku. Pablo wañusqa kasqanta yuyaspataj, llajtamanta jawaman qhatatarqanku.

²⁰ Jesucristota qhatikojkunarí Pabloman qayllaykuspa, payta muyuykorqanku. Paytaj jatarispa, paykunawan khuska llajtaman kutirerqa. Q'ayantintaj Pablowan, Bernabewan Derbe llajtamanñataj rerqanku.

Siriapi kaj Antioquiaman kutiripunku

²¹ Pablowan, Bernabewan ima Derbe llajtapi Jesusmanta willayta willajtinku, ashkha runakuna Jesusta qhatikuyta qallarerqanku. Chaymantataj Jesuspa kachankuna kutirerqanku Listraman, Iconioman, Antioquiaman ima.

²² Chay llajtakunapitaj paykuna Jesuspi atinikojkunata kallpacharqanku Jesusta qhatikusqankupi sinch'ita sayanankupaj, nerqankutaj: Diospa kamachiyninman yaykunanchejpaj noqanchej tukuy imaynamanta ñak'arinanchejpuni tiyan, nispa.

²³ Jinallataj sapa iglesiapi kurajkunata churarqanku. Ayunaspa, Diosmanta mañakuspataj, Pablowan Bernabewan Diospa makinman chay kurajkunata churarqanku, pipichus atinikusqanku, chaypaman.

²⁴ Chantá Pisidianejta rispa, Pablowan Bernabewan Panfiliakama chayarqanku.

²⁵ Perge llajtapi Jesusmanta sumaj willayta willaytawantaj, Atalia llajtamanñataj rerqanku.

²⁶ Ataliamantataj botepi Antioquiaman kutiriporqanku, maymantachus iglesiaqa paykunata kachasqanku Diospa qhasilla k'acha yanapayninwan ruwanankuta ruwanankupaj, chayman. Paykunataj chay ruwanata tukusqankuña.

²⁷ Chantá Antioquiaman chayaytawan, Pablowan Bernabewan ima iglesiata tantaykuspa, willarqanku imaynatachus Dios tukuy imapi paykunata yanapasqanta. Willallarqankutaj imaynatachus Dios mana judío kajkunapajpis punkuta kicharisqanta, paykunapis Jesuspi atinikunankupaj.

²⁸ Chaypitaj paykuna unayta qhepakorqanku Jesusta qhatikojkunawan khuska.