Hechos 13 - DIOSPA QHELQACHISQ

Bernabeta, Saulotawan Jesucristomanta willajta kachanku

¹ Antioquía iglesiapi Diosmanta sut'inchajkuna, yachachejkuna ima karqanku. Paykuna karqanku: Bernabé, Niger nisqa Simón, Cirenemanta Lucio, Manaén, pichus kamachej Herodespa uywasqa masin karqa chay, Saulo ima.

² Uj p'unchay ayunaspa Diosta yupaychashajtinku, Santo Espíritu paykunata nerqa: Bernabeta, Saulotawan t'aqapuwaychej, imapajchus ajllakuni, chayta ruwamunankupaj, nispa.

³ Chantá iglesiaj kurajninkuna ayunaspa, Dioswan parlarikorqanku. Jinataj Bernabejpa umanman, Saulojpamanwan makinkuta churaykuspa, paykunata kacharqanku.

Chiprepi Jesucristomanta willanku

⁴ Chantá Bernabewan, Saulowan Santo Espíritoj kamachisqanta kasuspa, Seleuciaman rerqanku. Chaymantataj botepi rispa, Chipre churuman chayarqanku.

⁵ Salamina llajtaman rispataj, judiokunaj tantakunanku wasipi Diospa simi nisqanta willarqanku. Juan Marcospis paykunawan risharqa paykunata yanapananpaj.

⁶ Paykuna chay tukuynin churupi puriytawan, Pafos llajtamanñataj chayarqanku. Chaypitaj tinkukorqanku Barjesús sutiyoj uj judío runawan. Chay runa layqa karqa, llullata sut'inchaj.

⁷ Payqa kamachej Sergio Pauloman k'askasqa karqa. Sergio Pauloqa yachayniyoj runa karqa. Jinapi Bernabetawan, Saulotawan wajyacherqa, Diospa simi nisqanta uyariyta munaspa.

⁸ Chay layqa runarí, pichus griego parlaypi Elimas nisqa karqa, chay runa Bernabewan, chantá Saulowan ima churanakorqa, kamachej Sergio Paulota jark'aspa ama Jesucristopi atinikunanpaj.

⁹ Chaymantataj Saulo, pejpatachus ujnin sutin Pablo karqa, payqa Santo Espíritoj kamachiyninpi kashaspa, chay layqata allinta qhawarerqa, chantá nerqataj:

¹⁰ Ya, llullaj atipasqan, tukuy millay ruwanawan junt'asqa runa, qanqa Kuraj Supaypa wawan kanki, tukuy allin kajpa awqantaj. Mayk'ajkamataj Diospa cheqan ñanninta q'ewinkiri?

¹¹ Kunanqa Dios sinch'ita jasut'isonqa. Qan ñawsayanki, jinataj intej k'anchayninta unayta mana rikunkichu, nispa. Pablo chayta nisqantawan, Elimasqa ñawsayarqa. Muyuykachaspataj, mask'arqa pillapis makinmanta pusananta.

¹² Kamachej Sergio Paulotajrí chayta rikuspa, Jesuspi atinikorqa, jinataj mayta t'ukorqa Tukuyta Kamachej Jesusmanta imatachus yachachisqankumanta.

Pablowan Bernabewan Pisidia kaj Antioquiapi

¹³ Pabloqa, paywan kajkuna ima Pafosmanta Perge llajtaman botepi rerqanku. Pergeqa Panfilia jap'iypi karqa. Chaypi Juan Marcos paykunata saqerparispa, Jerusalenman kutiporqa.

¹⁴ Chaywanpis Pablowan, Bernabewan Pergemanta rillarqankupuni Pisidiapi kaj Antioquía llajtaman. Samarina p'unchaypi paykuna judiokunaj tantakunanku wasiman yaykuspa, tiyarikorqanku.

¹⁵ Chantá tantakuna wasipi kurajkuna Moisespa kamachisqanmanta qhelqasqata, Diosmanta sut'inchajkunaj qhelqasqankuta ima tukuypa uyarinanta ñawirerqanku. Jinaspataj, Pablotawan Bernabetawan nicherqanku: Wawqekuna, sichus imallatapis niyta munawajchej kay runakunaj sonqonkuta oqharinaykichejpaj chayqa, kunan parlayta atinkichej, nispa.

¹⁶ Chantá Pabloqa sayarispa, makinwan señata ruwarqa chaypi kajkunata ch'inyachinanpaj, jinaspataj paykunata nerqa: Israelitakuna, Diosta yupaychaj mana judío kajkunapis ima, uyariwaychej:

¹⁷ Israelitakunaj Diosnenqa ñawpa tatanchejkunata ajllarqa. Chantá Egiptopi waj llajtayoj jina tiyakushajtinku, Dios paykunata ashkhayacherqa. Chaymantataj jatun atiyninwan Egiptomanta paykunata orqhorqa.

¹⁸ Paykuna tawa chunka watata jina ch'innejpi purishaspa, imaymana kawsayniyoj karqanku. Chaywanpis Dios paykunawan pacienciakorqa.

¹⁹ Diosllataj Canaán cheqapi qanchis suyukunata tukuchispa, chay jallp'ankukunata ñawpa tatanchejkunaman qoporqa.

²⁰ Chay tukuy imaqa tawa pachaj phishqa chunkayoj wata jina karqa. Chantá Diosqa juezkunata churarqa israelitakunata kamachinankupaj Diosmanta sut'inchaj Samuel rikhurimunankama.

²¹ Chaymanta israelitakuna Diosmanta mañakorqanku kuraj kamachejta churapunanta, Diostaj Benjamín jatun ayllumanta Cispa churin Saulta paykunaman qorqa kuraj kamachejninku kananpaj. Saultaj tawa chunka watata israelitakunata kamacherqa.

²² Chaywanpis Diosqa Saulta kuraj kamachej kananmanta wijch'uspa, Davidtañataj churarqa kuraj kamachej kananpaj. Paymantataj Dios nerqa: Yesejpa churin Davidta tarini, paytaj sonqoypa tukuy munasqanta ruwanqa, nispa.

²³ Chay nisqanman jinataj Diosqa Davidpa mirayninmanta Jesusta jataricherqa, Israelpa Qhespichejnin kananpaj.

²⁴ Manaraj Jesús jamushajtin, Bautizaj Juan tukuy israelitakunaman willarqa Diosman kutirikunankuta chantá bautizasqa kanankuta ima.

²⁵ Chantá Juan wañunan qayllapiña kashaspa, runakunata nerqa: Pi kasqaytataj qankuna yuyankichejri? Pitachus suyashankichej, mana noqa chay qhespichejchu kani. Manachayqa pay qhepayta jamushan, noqataj mana paypa wata runan kanaypaj jinallapischu kani, nispa.

²⁶ Abrahampa ayllunmanta kaj wawqekuna, Diosta yupaychaj mana judiokuna ima, uyariwaychej: Diospa kachamusqan Qhespichej jamunanmanta chay willayqa noqanchejpaj karqa.

²⁷ Chaywanpis Jerusalenpi tiyakojkuna, kamachejninkukuna ima mana repararqankuchu pichus Jesús kasqanta, nitaj entienderqankuchu Diosmanta sut'inchajkunaj qhelqasqankuta, sapa samarina p'unchaypi chayta ñawirispapis. Aswanpis Jesusta wañuchisqa kananpaj juchacharqanku, ajinamantataj ñawpa sut'inchajkunaj nisqankuta junt'arqanku.

²⁸ Paykuna mana ima juchatapis Jesuspi tarerqankuchu wañuchisqa kananpaj jina. Chaywanpis Pilatomanta kamachinanta mañarqanku Jesús wañuchisqa kananpaj.

²⁹ Jesusmanta imatachus ñawpa sut'inchajkunaj qhelqasqanku, chay tukuy junt'akorqa, chantá cruzmanta ayanta urayk'uchimuspa, p'amparqanku.

³⁰ Diostajrí Jesusta wañusqamanta kawsarichimporqa.

³¹ Chaymantataj ashkha p'unchaykunata Jesús rikhurerqa, pikunachus Galileamanta paywan khuska Jerusalenkama risqanku, chaykunaman. Paykunataj kunan chay rikusqankuta testigo jina tukuy israelitakunaman willashanku.

³² Kikillantataj noqaykupis Jesusmanta sumaj willayta qankunaman willashayku, imatachus Dios ñawpa tatanchejkunaman qonanta nerqa, chaymanta.

³³ Noqanchej paykunaj mirayninku kasqanchejrayku Dios chay nisqanta noqanchejpaj junt'arqa, Jesusta kawsarichimuspa. Ajinata paymanta iskay kaj Salmopi nin: Qanqa Churiy kanki, kunantaj noqa Tatayki kani, nispa.

³⁴ Dios nillasqataj Jesusta wañusqamanta kawsarichimunanta ukhun ama asnananpaj. Pay nerqa: Imaynatachus Davidta nerqani payta may sumajta saminchanaytapuni, ajinallatataj chay tukuyta qankunaman qosqaykichej, nispa.

³⁵ Waj Salmopipis nillantaj: Qan mana saqenkichu ajllasqaykej ayan asnaykapunanta, nispa.

³⁶ David kawsanankama Diospa munayninman jina imatachus ruwananta ruwarqa. Chaywanpis wañupojtenqa, ñawpa tatankunaj qayllanpi payta p'amparqanku ayantaj q'etayaporqa.

³⁷ Jesuspa ayanrí mana q'etayaporqachu, imaraykuchus Dios payta kawsarichimorqa.

³⁸ Wawqekuna, kayta yachaychej: Kunan noqayku willashayku Diosqa Jesusnejtamin juchaykichejta pampachananta.

³⁹ Moisespa kamachisqankuna mana pitapis juchanmanta kacharichiyta aterqachu, cheqan runapaj qhawasqa kananpaj. Kunantajrí Jesuspi tukuy atinikojkunaqa paynejta cheqan runapaj qhawasqa kayta atinkichej.

⁴⁰ Chaywanpis sumajta qhawarikuychej ari, sut'inchajkunaj nisqanku ama qankunapi junt'akunanpaj:

⁴¹ Qhawakuychej Diosta pisipaj qhawajkuna, t'ukuriychej, chinkariychejtaj. Kay p'unchaykunapi noqa t'ukunapaj jina imakunata ruwashani. Chantá chay ruwasqaymanta pi willarisojtiykichejpis, mana creeyta atinkichejchu, nispa. Ajinata Pablo Jesusmanta willarqa.

⁴² Chantá Pablowan, Bernabewan judiokunaj tantakunanku wasimanta llojsinankupaj wakichikushajtinku, runakuna mañakorqanku qhepan samarina p'unchaypi ujtawan kutimunankuta, paykunaman chay imakunamanta astawan parlanankupaj.

⁴³ Chay tantakuna wasimanta puririshajtinkutaj, ashkha judiokuna, chantá Diosta yupaychaj mana judiokuna ima Pablota, Bernabetawan qhaterqanku. Jinapitaj Pablowan, Bernabewan paykunata yuyaycharqanku Diospa qhasilla k'acha yanapayninpi mana sayk'uspa kakunankuta.

⁴⁴ Qhepan samarina p'unchaypi chay llajtamanta yaqha tukuy runakuna tantakamorqanku Diospa simi nisqanta uyarinankupaj.

⁴⁵ Judiokunaj kurajninkukunatajrí chay chhika runata rikuspa, Pablowan chhoqonakorqanku, paywan siminakuspataj, payta maldicerqanku.

⁴⁶ Chantá Pablowan, Bernabewan mana manchachikuspa, chay judiokunata nerqanku: Diospa simi nisqanta qankunamanraj willanayku karqa. Qankunatajrí qhesachankichej, nitaj wiñay kawsaytapis jap'ikuyta munankichejchu. Chayrayku kunanqa mana judío kajkunaman chay willayta willasqayku.

⁴⁷ Ajinata ruwasqayku, imaraykuchus Tukuyta Kamachej Dios kay jinata kamachiwarqayku: Mana judío kajkunapaj uj k'anchay jina kanaykipaj churayki, noqalla qhespichej kasqayta tukuy kay pachaj k'uchunkama willamunaykipaj, nispa.

⁴⁸ Chayta uyarispa, mana judío kajkuna mayta kusikorqanku, jinataj nerqanku Diospa simi nisqan may sumaj kasqanta. Chantá pikunachus wiñay kawsaypaj ajllasqa kajkunaqa Tukuyta Kamachej Jesuspi atinikorqanku.

⁴⁹ Ajinamanta Diospa simi nisqanqa tukuy chay jap'iypi willakorqa.

⁵⁰ Chaywanpis chay judiokuna ch'ajwata oqharichiyta munaspa, Diospi yuyajkuna respetasqa warmikunaman, llajtapi kamachej runakunaman ima sajra yuyayta sat'erqanku. Paykunataj Pablotawan, Bernabetawan qhatiykachayta qallarerqanku, chay jap'iymanta paykunata qharqonankupaj.

⁵¹ Jinapi Pablowan, Bernabewan chay runakunaj contranpi chakinkumanta jallp'ata thalarakuspa, Iconio llajtaman riporqanku.

⁵² Jesusta qhatikojkunarí mayta kusikorqanku jinataj Santo Espíritoj kamachiyninpi karqanku.