Hebreos 9 - DIOSPA QHELQACHISQ

Diosman ñawpa jaywanakuna mana valorniyojchu

¹ Tata Dios israelitakunawan ñawpa ruwasqan tratopi imaynatachus Diosta yupaychanapaj kamachisqakuna karqa, kallarqataj Dioswan Tinkukuna Toldopis.

² Dioswan Tinkukuna Toldoqa kay jina karqa: Ñawpaj kaj cuartoqa Diospaj T'aqasqa Cheqa nisqa karqa, chaypitaj uj candelero karqa, chantá uj mesa ima Diospaj t'aqasqa t'antayoj.

³ Chaymantataj warkhusqa uj velo karqa, chay wasanpitaj Diosllapaj T'aqasqa Cheqa karqa.

⁴ Chaypitaj qorimanta incienso q'oshñichina karqa, jinallataj Diospa trato ruwasqan cajonpis, mayqenchus qoriwan lluch'isqa karqa, chay. Chay cajonpa ukhunpitaj qorimanta uj juch'uy manka karqa maná nisqa t'antayoj. Chaypi Aaronpa varan kallarqataj, mayqenchus q'omeryaspa t'ikasqa, chay. Kallarqataj p'alta rumikunapi qhelqasqa kamachisqakuna.

⁵ Chay cajonpa patanpitaj qorimanta ruwasqa iskay querubín nisqa angelkuna karqa, Khuyakuyta Tarina Cheqata lijrankuwan qhataspa. Chaywanpis kunan chaykunamanta manaña astawan sut'inchaspa parlasunñachu.

⁶ Chay tukuy ajina wakichisqa kajtin, sacerdotekunaqa Diospaj T'aqasqa Cheqa nisqa cuartoman kutin kutinta yaykorqanku, sacerdote jina imachus ruwanankuta junt'anankupaj.

⁷ Diosllapaj T'aqasqa Cheqamanrí, watapi uj kutita kuraj kaj sacerdotella yaykoj. Chayman uywa ñak'asqaj yawarnin aparisqa yaykoj. Chay yawartataj Diosman jaywanan karqa, paypa juchanta Dios pampachananpaj, chantá runakuna mana reparakuspalla juchallikusqanku, chaytawan Dios pampachananpaj.

⁸ Chaywan Santo Espíritu yachachisharqa Diosllapaj T'aqasqa Cheqaman yaykuna manaraj kicharisqachu kasqanta runakuna yaykunankupaj. Chaytaj ajina karqa Dioswan Tinkukuna ñawpaj kaj Toldo kashanankama.

⁹ Chayqa kunanpaj uj rijch'anachinalla karqa. Chaypacha chaypi Diosman jaywanakunata, chantá uywa ñak'asqata q'olachispa jaywasqankoqa jaywajkunaj sonqonkuta juchamanta mana llimphuchayta aterqachu.

¹⁰ Chay ñawpa kamachisqakuna karqa mikhunamanta, ujyanamanta, Diospa ñawpaqenpi llimphu rikhurinapaj imachus ruwanamanta ima. Chaykunataj valorniyoj karqa, Dios tukuy imata mosojyachinan p'unchaykamalla.

¹¹ Chaywanpis Cristo jamunña, aswan allin imakunamanta Kuraj Kaj Sacerdote kananpaj. Maypichus pay imachus ruwananta junt'arqa, chay toldopis aswan sumajllataj. Chay toldoqa mana runaj ruwasqanchu, ajinaqa mana kay pachamantachu.

¹² Chantá Cristoqa manallataj chivokunaj nitaj torillokunaj yawarnin aparisqachu yaykorqa. Manachayqa pay kikinpa yawarnin aparisqa Diosllapaj T'aqasqa Cheqaman uj kutillata yaykorqa. Ajinamanta Cristo wiñaypaj juchaj atiyninmanta kacharichiwarqanchej.

¹³ Ñawpajta chivokunajta, chayrí torillokunajta yawarnin, china waka uña q'olachisqaj ushphan ima mana llimphupaj qhawasqa runakunaman qhallisqa karqa. Ajinata ruwaspataj, runakunaj ukhunpa jawallanta llimphuchaj kanku.

¹⁴ Cristorí wiñaypaj kawsaj Santo Espiritunejta Diosman mana iman imanasqa uywa jina pay kikin jaywaykukorqa. Ajinaqa Cristoj yawarnin may jinatarajchus sonqonchejta millay ruwasqanchejmanta llimphuchawasunchej, kawsaj Diospa munayninta ruwananchejpaj.

¹⁵ Chayrayku Jesucristonejta runakuna Dioswan mosoj tratoman yaykunchej, wajyasqa kajkuna wiñay kawsayta chayaqeta jina jap'inanchejpaj, mayqentachus Dios qonanta nerqa, chayta. Cristo wañorqa runakunata ñawpa tratopi juchallisqankumanta kacharichinanpaj.

¹⁶ Nisunchej: Uj testamento ruwasqa junt'akunanpajqa, pichus testamentota ruwaj wañunanraj tiyan.

¹⁷ Testamentoqa junt'akun, pichus ruwaj wañupun chaypachalla. Testamentota ruwaj runa kawsashajtillanraj, ruwasqan testamentoqa mana junt'akuyta atinchu.

¹⁸ Chayrayku, ñawpaj kaj tratota Dios ruwananpaj runakuna uywata ñak'aspa, yawarninta jaywarqanku.

¹⁹ Maypachachus Moisés kamachisqaj tukuy nisqanta israelitakunaman ñawiriporqa chaypacha, pay torillokunaj yawarninta, chantá chivokunaj yawarninta ima chuwapi yakuwan chajrorqa. Chantá tiñisqa puka millmawan, hisopo qhorawan ima chay p'anqaman, chantá tukuy israelitakunaman ima ch'ajchuykorqa.

²⁰ Chantá jatunmanta parlaspa, Moisés nerqa: Kay yawarmin Dios qankunawan trato ruwasqanta sinch'ita sayachin, nispa.

²¹ Chaymantataj Moisesqa Dioswan Tinkukuna Toldota, chantá chaypi Diosta yupaychanapaj kaj imakunatawan yawarwan ch'ajchullarqataj.

²² Diospa kamachisqaman jina, ñawpaqenpi imapis llimphuchasqa kananpaj, uywa ñak'asqaj yawarninta ch'ajchunanku karqa. Yawar mana ch'ajchusqa kajtinrí, manallataj ima juchapis pampachasqachu karqa.

Cristoj wañusqan juchata pampachan

²³ Chayrayku imachus yupaychana cheqapi kashan, chay tukoyqa uywa ñak'asqaj yawarninwan llimphuchasqa kanan karqa. Chaykunataj janaj pachapi imachus kashan, chayman rijch'akoj jinalla karqa. Janaj pachapi kaj imakunarí uywakunaj yawarninmantapis aswan sumaj jaywanawan llimphuchasqa kanan karqa.

²⁴ Cristoqa mana runakunaj ruwasqan toldomanchu yaykorqa, mayqenchus cheqa kajpa rijch'aynillan karqa, chayman. Manachayqa pay kikin janaj pachamanpuni yaykorqa, Diospa ñawpaqenpi rikhurispa noqanchejrayku Diosmanta mañapunawanchejpaj.

²⁵ Kuraj kaj sacerdotekuna sapa wata uywaj yawarnin aparisqa Diosllapaj T'aqasqa Cheqaman yaykoj kanku. Cristorí mana sapa kutichu janaj pachaman yaykorqa jaywana jina pay kikin jaywaykukunanpaj.

²⁶ Mana jina kanman karqa chayqa, kay pacha ruwasqa kasqanmantapacha Cristoqa ashkha kutitaña wañunman karqa. Kunantajrí chay p'unchay junt'akojtin, pay kikin wañunanpaj jaywaykukuspa, uj kutillata wiñaypaj rikhurin juchata pampachananpaj.

²⁷ Nisqa kashan runaqa uj kutillata wañunan, chaymantataj Diospa ñawpaqenpi juzgasqa kanqa.

²⁸ Ajinallatataj Cristopis uj kutillata wañorqa, ashkha runaj juchanchejta pampachananpaj. Chaymanta qhepanejman pay ujtawan kay pachaman kutimonqa, manaña juchanchejrayku wañunanpajchu, manachayqa paypi atinikuspa suyajkunata qhespichinawanchejpaj.