Hebreos 7 - DIOSPA QHELQACHISQ

Jesusqa Melquisedec jina sacerdote

¹ Melquisedecqa Salén sutiyoj llajtaj kuraj kamachejnin karqa, Patapi Kaj Diospa sacerdotentaj. Maypachachus Abraham maqanakuspa kuraj kamachejkunata atipasqanmanta kutimusharqa chaypacha, Melquisedecqa Abrahamta taripaj llojsimorqa, chantá payta samincharqa.

² Jinataj Abrahamqa kuraj kamachejkunawan maqanakuspa qhechusqanmanta sapa chunkamanta ujta Melquisedecman qorqa. Melquisedec chay suti niyta munan: Cheqan Kajta Ruwaj Kuraj Kamachej. Jinallataj ujnin sutin Salenpa Kuraj Kamachejnin, niyta munan: Sonqo Tiyaykusqa Kaypa Kuraj Kamachejnin.

³ Paypa tatanmanta, mamanmanta, ñawpa tatankunamantapis mana ni ima yachakunchu, nitaj paqarisqanmanta, ni wañusqanmantapis. Aswanpis payqa Diospa Churinman rijch'asqa kaspa, wiñaypaj sacerdote kashan.

⁴ Reparaychej Melquisedec imayna jatunpaj qhawasqachus kasqanta. Ajina kasqanrayku ñawpa tatanchej Abrahampis maqanakuspa tukuy qhechusqanmanta sapa chunkamanta ujta payman qosqa.

⁵ Moisespa kamachisqanman jina Leví ayllumanta sacerdotekunaqa israelita masinkukunamanta sapa chunkamanta ujta jap'inanku karqa, israelitakuna paykuna jina Abrahampa miraynin kashajtinkupis.

⁶ Chaywanpis Melquisedecqa mana Leví ayllumantachu kashaspapis, Abrahampa makinmanta sapa chunkamanta ujta jap'erqa. Chantá Melquisedecqa Abrahamta samincharqa, pichus Diospa nisqanta jap'isqaña, chayta.

⁷ Tukuy yachanchej pichus saminchajqa aswan kuraj kasqanta saminchayta jap'ejmanta nisqaqa.

⁸ Jinallataj sapa chunkamanta ujta jap'ej sacerdotekunaqa wañoj runalla kanku. Chaywanpis Diospa Qhelqachisqanpi nin Melquisedecqa mana wañusqanta, manachayqa kawsashasqanta.

⁹ Chayrayku niyta atisunman: Leví ayllumanta kaj sacerdotekuna kunan sapa chunkamanta ujta jap'inku chaypis, Melquisedecman qollasqankutataj, imaraykuchus Abrahamqa paykunaj sutinkupi sapa chunkamanta ujta payman qorqa.

¹⁰ Chayqa ajina, imaraykuchus Leví manaraj karqarajchu chaypis, payqa ñawpa tatan Abrahampa ukhunpi kasharqa, maypachachus Melquisedec Abrahamta taripaj llojserqa, chaypacha.

¹¹ Diosqa kamachisqankunata israelitakunaman qorqa, yuyaspa Leví ayllumanta sacerdotekuna israelitakunata yanapanankuta nisqanta junt'anankupaj. Sichus Leví ayllumanta sacerdotekunanejta runakuna Diospa tukuy mañasqanta junt'ayta atinkuman karqa chayqa, waj sacerdote rikhurimunan manaña necesariochu kanman karqa. Chayrayku chay sacerdote mana Aaronpa t'aqanmantachu kanan karqa, manachayqa Melquisedecpa t'aqanmanta.

¹² Chantá sacerdote kanaqa waj aylluman pasananpaj, kamachisqapis waj jinaman tukuchisqallataj kanan tiyan.

¹³ Tukuyta Kamachej Jesucristonchejrí mana Leví jatun ayllumantachu karqa, manachayqa Judá jatun ayllumanta. Diospa Qhelqachisqanpitaj nin Judá ayllumanta mana pipis sacerdote kayta atinanta.

¹⁴ Yachanchej jina, Tukuyta Kamachej Jesucristonchej Judá jatun ayllumanta karqa. Moisestajrí Judá jatun ayllumanta parlaspa, sacerdote kanankumanta mana imatapis nerqachu.

¹⁵ Chayqa aswan sut'i kashan, imaraykuchus chay waj sacerdote Melquisedec jina sayarinña.

¹⁶ Jesús sacerdote karqa mana Leví jatun ayllumanta kasqanraykuchu, manachayqa mana tukukoj kawsayniyoj kasqanrayku.

¹⁷ Diospa Qhelqachisqanpi paymanta nin: Qanqa wiñaypaj sacerdote kanki Melquisedecpa t'aqanman jina, nispa.

¹⁸ Chayrayku, chay ñawpa kamachisqaqa yanqhayachisqa karqa, ni imapaj allin kasqanrayku.

¹⁹ Moisespa kamachisqanqa mana pitapis cheqan runaman tukuchiyta aterqachu. Kunanrí Dios aswan sumaj kajta qonawanchejta suyakuspa noqanchej paypi atinikunchej. Chaynejtataj Diosman qayllaykunchej.

²⁰ Diosqa tiluspa, Jesusta sacerdotepaj churarqa. Chay waj sacerdotekunataqa Dios mana tiluspachu churarqa.

²¹ Sacerdotenchej Jesustarí Dios tiluspa churasqa, maypachachus pay nerqa: Tukuyta Kamachej Dios tilorqa, manataj tilusqanta p'akenqachu. Pay nerqa: Qanqa wiñaypaj sacerdote kanki, nispa.

²² Ajinamanta Jesusqa aswan sumaj tratomanta garante churasqa karqa.

²³ Chay wakin sacerdotekuna ashkha karqanku, imaraykuchus wañojlla kasqankurayku sacerdote jina imachus ruwanankuta mana ruwayllatapuni aterqankuchu.

²⁴ Chaywanpis Jesús mana jayk'aj wañoj kasqanrayku, sacerdote kayninta mana pimanpis saqeyta atinmanchu.

²⁵ Chayrayku pay wiñaypaj qhespichiyta atin, pikunachus paynejta Diosman qayllakojkunata, imaraykuchus pay wiñaypaj kawsallanpuni paykunarayku Diosmanta mañapunanpaj.

²⁶ Jesusqa, necesitasharqanchej chay Kuraj Kaj Sacerdotemin. Payqa juchamanta t'aqasqa, mana k'amina, llimphutaj. Kunantaj Dios Payta juchasapakunamanta t'aqanña, jinataj janaj pachamanta aswan pataman churarqa.

²⁷ Jesusqa mana chay waj kuraj kaj sacerdotekuna jinachu. Paykuna sapa p'unchay uywa ñak'asqata q'olachispa Diosman jaywananku karqa, ñawpajta paykunaj juchankurayku, qhepantataj runakunaj juchankurayku. Jesusrí runakunaj juchanku pampachasqa kananpaj uj kutillata wiñaypaj wañorqa, pay kikin kawsayninta qospa.

²⁸ Moisespa kamachisqanqa pisi kallpa runakunatamin churarqa kuraj kaj sacerdotekuna kanankupaj. Chaywanpis Moisespa kamachisqanmanta qhepata Dios tiluspa Churinta Kuraj Kaj Sacerdotepaj churarqa. Kunantaj payqa wiñaypaj mana pantayniyoj Kuraj Kaj Sacerdote.