Hebreos 6 - DIOSPA QHELQACHISQ

¹ Chayrayku, wiñay tukusqa kananchejkama ñawpajman rispa, Diosmanta astawan astawan yachakuspallapuni kanachej. Jesucristoman kutirikuspa qallariypi imatachus yachakorqanchej, chay ñawpaj kaj yachachiykunata saqena. Amaña watej watej kay imakunamanta yachachinachu: Mana allin kajta ruwanamanta, Diosman kutirikuna kasqanmanta, Diospi atinikuna kasqanmanta.

² Jinallataj amaña parlanachu bautizakuna kasqanmanta, Santo Espirituta jap'inapaj makita umaman churanamanta, wañusqamanta kawsarimpuymanta, chantá wiñaypaj jasut'iymanta ima.

³ Dios munanqa chayqa, kaykunamanta astawan entiendesunchej.

⁴ Wakinkuna Cristoman kutirikuspa, Diospa qosqanwan misk'irichikorqanku, Santo Espiritutapis jap'erqanku.

⁵ Jinallataj paykuna Diospa simi nisqan may sumaj kasqanta misk'irichikorqanku. Chantá jamoj p'unchaykunapi kay pacha mosojyachisqa kajtin, Diospa atiynin imaynachus kanantapis yacharqanku.

⁶ Ajinata yachashaspapis, sichus ñawpa kawsayninkuman kutiripunkuman chayqa, manaña ujtawan Diosman kutirichisqa kayta atinkuñachu. Ajinata ruwaspaqa, Diospa Churinta paykuna kikinku watej cruzman chakatanku, ajinamanta runaj rikunanta p'enqaypi rikhurichispa.

⁷ Runaqa jallp'a jina. Pikunachus Cristoman kutirikojkunaqa parawan qarpasqa jallp'a jina kanku, mayqenchus tarpojpaj sumajta poqochin, chay jina. Diostaj chay jallp'ata saminchan.

⁸ Pikunachus ñawpa kawsayman kutiripojkunarí qhasi manakaj khishkata wiñachej jallp'a jinalla kanku. Chay jina jallp'atataj Dios maldicin, qhepanejmantaj ninawan ruphaykuchisqa kanqa.

⁹ Munasqa wawqe panakuna, ajinata parlayku chaypis, allinta yachayku qankuna Diosta qhatikuspa paypi atinikuspallapuni kashasqaykichejta. Chayqa qankunapaj aswan sumaj, ajinamantataj qhespichisqa kankichej.

¹⁰ Diosqa cheqan kaspa, ruwasqaykichejmanta mana qonqaponqachu, jinallataj payta munakusqaykichejmantapis. Chayrayku qankuna Diospa ajllakusqankunata yanaparqankichej, kunanpis yanapashallankichejpuni.

¹¹ Chaywanpis munayku ari, sapa ujniykichej k'uchi kasqaykichejta tukukuykama rikuchinaykichejta, Diospi atinikuspa imatachus suyakushankichej, chayta jap'inaykichejpaj.

¹² Qhella kanaykichejtapis manallataj munaykuchu. Manachayqa munayku, pikunachus Diospi tukuy sonqo atinikuspa, chantá pacienciawan Diospa nisqanman jina chayaqeta jap'iyta suyanku, ajinallatataj qankunapis ruwanaykichejta.

¹³ Maypachachus Diosqa Abrahamman imatachus qonanta nerqa chaypacha, pay kikinrayku tilorqa, imaraykuchus paymanta aswan kuraj mana karqachu.

¹⁴ Jinapi pay Abrahamta nerqa: Noqa may jinata saminchasqayki. Mirayniykitapis may chhikaman tukuchisaj, nispa.

¹⁵ Jinataj Abraham may jina unayta pacienciawan suyakuspa, imatachus Dios nerqa, chayta jap'erqa.

¹⁶ Runakunaqa paykunamanta aswan kuraj kajpa sutinrayku tilunku, icharí? Nisqankuta junt'anankupaj tilojtinkutaj, manaña imamantapis parlana kanñachu.

¹⁷ Chayrayku Diospis tiluspa, sut'ita yachayta qosharqa imatachus nisqanta junt'anantapuni. Ajinamanta imatachus nisqanta jap'ejkunaqa yacharqanku, Dios tiluspa imatachus nisqanmanta mana kutirispa junt'ananta.

¹⁸ Diosqa mana jayk'aj llullakunchu. Chayrayku tiluspa nisqanmanta mana kutiriyta atinchu. Ajinaqa pikunachus waqaychasqa kayta mask'aspa, payman qayllaykojkuna paypi atinikuyta atinchej imatachus niwasqanchejta qonawanchejmanta.

¹⁹ Diospi atinikunaqa sinch'ita sayayta yanapawanchej, imaynatachus jatun gancho barcota pachanpi sayachin, ajinata. Ajinata mana iskayrayaspa Diospi atinikuyta atinchej Jesucristo janaj pachapi kaj Diospa Templonpi cortina ukhuman yaykusqanrayku.

²⁰ Jesusqa noqanchejrayku chay cheqaman yaykunña, ajinamantataj Diosman qayllaykunanchejpaj ñanta kicharerqa. Payqa Melquisedecpa t'aqanman jina wiñaypaj Kuraj Kaj Sacerdote churasqa karqa.