Hebreos 5 - DIOSPA QHELQACHISQ

¹ Diosqa tukuy kuraj kaj sacerdotekunata runakuna ukhumanta ajllan, paykuna runakunaj sutinkupi Diospa ñawpaqenpi rikhurinankupaj. Jinataj kuraj kaj sacerdoteqa runakunaj sutinpi jaywanakunata Diosman jaywan, jinallataj jucha pampachasqa kananpaj uywa ñak'asqa q'olachinatapis.

² Chay sacerdotetaj mana yachajkunamanta, chantá juchallejkunamanta khuyakuyta atin, paypis runallataj kaspa pisi kallpa kasqanrayku.

³ Chayrayku payqa uywata ñak'aspa, Diosman jaywan ajinamanta juchan pampachasqa kananpaj. Chantá runakunaj juchanku pampachasqa kananpaj uywa ñak'asqata jaywanallantaj tiyan.

⁴ Mana pipis munasqanraykullaqa kuraj kaj sacerdote kayta atinmanchu. Manachayqa Diospuni payta wajyaspa, kuraj kaj sacerdote kananpaj churan, imaynatachus Diosqa Aaronta wajyaspa churarqa, ajinata.

⁵ Chayrayku Cristopis mana jatunchakorqachu pay kikin Kuraj Kaj Sacerdote kananpaj churakuspa. Manachayrí Diospuni payta nerqa: Qan Churiy kanki, kunantaj noqa Tatayki kani, nispa.

⁶ Diospa Qhelqachisqanpi wajnejpipis nillantaj: Qanqa Melquisedec jinallataj wiñaypaj sacerdote kanki, nispa.

⁷ Jesús kay pachallapiraj kawsashaspa, sinch'ita qhaparispa chantá waqaspa Diosmanta mañakorqa, pichus wañunanmanta kacharichinanpaj atiyniyoj karqa, chaymanta. Jinataj Diosta may jatun respetowan qhawaspa tukuy sonqo k'umuykusqanrayku Dios mañakusqanta uyarerqa.

⁸ Ajinaqa Jesús Diospa Churin kashaspapis, ñak'arisqannejta Diosta kasuy imachus kasqanta yacharqa.

⁹ Ajinamanta Cristo Diospa tukuy kamachisqanta junt'asqanrayku, Dios payta churarqa ajinamanta payta kasojkunaman wiñay kawsayta qonanpaj.

¹⁰ Jinallataj Dios payta Kuraj Kaj Sacerdote kananpaj churallarqataj, Melquisedecpa t'aqanman jina.

Diospi atinikuna

¹¹ Chaymanta ashkhataraj parlanayku tiyan. Chaywanpis chayqa mana sut'inchay atina jinallachu, imaraykuchus qankuna mana usqhayllata entiendeyta atinkichejchu.

¹² Qankunaqa unayña Diosta qhatikoj kasqaykichejrayku, yachachejkunaña kanaykichej karqa. Kunantajrí watej yachachinaraj kankichej, Diospa simi nisqanmanta yachanaykichejpaj imachus jasalla kashan, chaykunata. Qankuna wawa jina lechellapajraj kankichej, mana mikhunapajrajchu.

¹³ Pichus lechellawanraj kawsajqa wawallaraj. Chayrayku imachus cheqan kashan, chayta mana reparayta atinchu.

¹⁴ Mikhunarí wiñay tukusqa runakunapaj, pikunachus imachus allin, imatajchus mana allinchu kasqanta sapa kuti reparaspa yachankuña, chaykunapaj.