Hebreos 4 - DIOSPA QHELQACHISQ

Diospa qosqan samariy

¹ Diosqa israelitakunaman nisqa paypa qosqan samarinaman yaykunankuta, chay nisqantaj kunankama kashallanraj. Chayrayku manchachikuna tiyan. Pajtataj qankunamanta mayqenpis Diospa qosqan samarinaman mana yaykushanmanchu.

² Ñawpa tatanchejkunaman jina, noqanchejmanpis samarinamanta sumaj willayta willallawarqanchejtaj. Chaywanpis paykuna chay willayta uyarisqankuwanqa mana imatapis tarerqankuchu, chay willasqanta mana jap'ikusqankurayku.

³ Noqanchej Diospi atinikojkunaqa samarinanman yaykunchej. Diospi mana atinikojkunamantarí Dios kay jinata nin: Chayrayku k'araj phiñakuyniypi tiluspa nerqani: Mana samarinankupaj qosqayman yaykonqankuchu, nispa. Dios ajinata nerqa, kay pachata ruwayta tukuytawan samarisqanmanta parlaspa.

⁴ Chayta yachanchej, imaraykuchus qanchis kaj p'unchaymanta parlaspa, Diospa Qhelqachisqanpi nin: Diosqa qanchis kaj p'unchaypi tukuy ruwasqanmanta samarikorqa, nispa.

⁵ Wajnejpi nillantaj: Samarinankupaj qosqay jallp'aman manapuni yaykonqankuchu, nispa.

⁶ Ajinaqa Diospa qosqan samarinanman yaykunaqa runapaj kashanraj. Ñawpajta chay sumaj willayta uyarejkunarí mana yaykorqankuchu, mana kasuyta munasqankurayku.

⁷ Chayrayku Dios uj p'unchayta wakichillantaj, chay p'unchaytaj kunan p'unchay. Chaymanta payqa ñawpajmantapacha Davidnejta parlarqa: Kunan p'unchaychus parlasqanta uyarinkichej chayqa, ama sonqoykichejta rumiyachiychejchu, nispa.

⁸ Sichus Josuella ñawpa tatanchejkunata samarichinman karqa chayqa, Diosqa mana waj p'unchaymanta parlanmanchu karqa.

⁹ Chayrayku, qhepanejman Diospa ayllunpaj uj samariy kanraj,

¹⁰ imaraykuchus pichus Diospa qosqan samarinaman yaykojqa paypa imachus ruwananmanta samarin, imaynatachus Diospis kay pachata ruwaytawan samarikorqa, ajinata.

¹¹ Ajinaqa kallpakuna ari Diospa qosqan samarikuyman yaykunanchejpaj. Chaywanpis sichus Diosta mana kasusunchejchu chayqa, ñawpa israelitakuna jina urmallasunmantaj.

¹² Diospa simi nisqanqa kawsayniyoj, atiyniyojtaj, puraj filoyoj espadamantapis aswan filochasqa. Ajinaqa Diospa simi nisqan runaj sonqon ukhukamapuni chayan. Jinallataj runaj yuyasqanta, sonqonpi imatachus munasqantapis sut'ita sut'inchan, allinchus manachus kasqanta.

¹³ Diospa tukuy ruwasqanqa mana paymanta pakakuyta atinchu. Manachayqa tukuy imapis paypa ñawpaqenpi sut'ipacha, pimanchus cuentata qonanchej kanqa, chaypa ñawpaqenpi.

Jesusqa khuyakoj kuraj kaj sacerdote

¹⁴ Diospa Churin Jesusqa Kuraj Kaj Sacerdotenchej, pichus janaj pachaman yaykorqa, chay. Chayrayku Jesucristopi atinikusqanchejmanta ch'ipakuspa, sinch'ita sayanallanchejpuni tiyan.

¹⁵ Chay Kuraj Kaj Sacerdotenchej pisi kallpa kasqanchejta yachaspa, khuyarikuwanchej, imaraykuchus payqa noqanchej jinallataj juchallinaman tanqasqa karqa. Chaywanpis pay mana jayk'ajpis juchallerqachu.

¹⁶ Chayrayku noqanchej mana manchachikuspa, may jina munakuyniyoj Diospa ñawpaqenman qayllaykunachej. Payman qayllaykuspataj, khuyakuyninta, chantá qhasilla k'acha yanapaynintawan tarisunchej, necesitasqanchej p'unchaypi yanapanawanchejpaj.