Hebreos 2 - DIOSPA QHELQACHISQ

Ama cheqan ñanmanta pantaykunachu

¹ Chayrayku allinmin qhespichisqa kanamanta uyarisqanchejta tukuy sonqo kasunanchej, ama chaymanta pantaykunanchejpaj.

² Angelkunanejta Diospa willachisqanqa sinch'i atiyniyoj karqa. Chayrayku chay willachisqanta mana kasukuspa juchallikojkuna ruwasqankuman jina jasut'isqa karqanku.

³ Ajina kajtenqa, sichus noqanchejman kunan Dios qoshawanchej, chay jina ashkha valorniyoj qhespichiyta pisipaj qhawasunman chayqa, imaynatataj jasut'iyninmanta llusp'isunmanri? Chay qhespichiymanta Tukuyta Kamachej Jesús ñawpajta willarqa, payta uyarejkunataj chay willasqan cheqapuni kasqanta willallawarqanchejtaj.

⁴ Jinallataj Tata Diospis chay willawasqanchejta cheqa kasqanta rikucherqa runaj mana jayk'aj rikusqanta ruwaspa, chantá jatun atiyninwan waj t'ukuna imakunata ruwaspa ima. Jinallataj Santo Espiritunejta ruwanapaj atiykunata qospa, chaykunatapis munasqanman jina rak'irarqa.

Jesucristoqa runapuni

⁵ Kunan parlanachej Dios kay pachata mosojyachinanmanta. Chaypachaqa Dios mana angelkunatachu churanqa chayta kamachinankupaj.

⁶ Aswanpis Diospa Qhelqachisqanpi ujnin qhelqarqa: Imataj runa kasqa paymanta yuyarikunaykipajri? Chayrí, imataj wañoj runa kasqa payta cuentaman churanaykipajri?

⁷ Runata ruwaspaqa, qan mana angelkuna jina atiyniyojtachu ruwarqanki. Chaywanpis jatun kaywan payta pilluykucherqanki, jatunpajtaj qhawarqanki.

⁸ Jinallataj tukuy kaj chhikata chakin uraman churarqanki, nispa. Chayrayku, tukuy ima paypa kamachiyninpi kajtinñaqa, manaña imapis kanchu paypa kamachiynin uraman churanapajqa. Jinapis kunan manaraj rikunchejchu tukuy ima paypa kamachiyninpi churasqa kasqantaqa.

⁹ Diosqa Jesusta churarqa angelkunamanta tumpawan pisi kananpaj. Chaywanpis kunan Jesusta rikunchej, jatun kaywan pilluchisqata, jatunpaj qhawasqata ima, noqanchejrayku ñak'arispa wañusqanrayku. Dios munakuwasqanchejrayku munarqa Churin tukuy runarayku wañunanta.

¹⁰ Diosqa tukuy imata paypaj ruwarqa, payllataj tukuy imata purichin. Chay Diosmin ashkha wawata jatun kayninpa k'anchayninman pusayta munarqa. Munallarqataj paykunata qhespichejqa ñak'ariynejta sumaj wakichisqa kananta, qhespichej jina imachus ruwananta maychus kajta junt'ananpaj.

¹¹ Chayrayku juchamanta t'aqasqa kajkuna, chantá pichus paykunata juchamanta t'aqaj Jesuswan uj Tatallamanta kanku. Ajina kasqanraykutaj Jesús mana p'enqakuspa, paykunata wawqe panankunapaj rejsikapun.

¹² Chayrayku Jesús Diosta nin: Qanmanta wawqe panaykunaman willasaj, tantasqa kajkuna chawpipitaj takispa yupaychasqayki, nispa.

¹³ Ujtawan nillantaj: Noqaqa paypi atinikusaj, nispa. Chantá nillantaj: Kaypi kashani, pikunatachus Dios qowarqa, chay wawakunawan khuska, nispa.

¹⁴ Chay wawakunaqa aychayoj, yawarniyojtaj kanku. Ajinallataj Cristopis paykuna jina kananpaj aychallikorqa, cruzpi wañuspa Kuraj Supayta atipananpaj, pichus runakunata wañuchinanpaj atiyniyoj karqa, chayta.

¹⁵ Ajinamantataj Cristo kacharichiyta atin, pikunachus wañuyta manchachikuspa, tukuy kawsayninkupi Kuraj Supaypa wata runan kasharqanku, chaykunata.

¹⁶ Yachallanchejtaj Cristoqa mana angelkunatachu yanapaj jamusqanta, manachayqa Abrahampa mirayninmanta kajkunata.

¹⁷ Chayta ruwananpajtaj payqa tukuy imapi wawqenkuna jina kananpuni karqa, ajinamanta kunan Diospa ñawpaqenpi khuyakuyniyoj kuraj kaj sacerdotenchej kananpaj. Jinataj cruzpi wañuspa kawsayninta jaywarqa runakunaj juchanku pampachasqa kananpaj.

¹⁸ Ajinamanta Cristo tukuy imapi juchallinaman tanqasqa kasqanrayku, yanapayta atin pikunachus juchallinaman tanqasqa kanchej, chaykunata.