Hebreos 13 - DIOSPA QHELQACHISQ

Cristota qhatikojkunajta imachus ruwananchej

¹ Cristota qhatikojkunapura wawqe panakuna jina munakuspa kawsakuychej.

² Waj llajtayojkunata wasiykichejman wajyarikuyta ama qonqaychejchu, imaraykuchus chayta ruwaspa, wakinkunaqa mana yachaspalla angelkunata wajyarikorqanku.

³ Jinallataj carcelpi kajkunamanta yuyarikuychej, paykunawan khuskapis wisq'asqa kashawajchej jina. Ñak'arichisqa kajkunamantapis yuyarikullaychejtaj, imaraykuchus qankunapis ajinallatataj ñak'arichisqa kayta atiwajchej.

⁴ Casarakunata tukuylla manchay sumaj kasqanta qhawaychej. Jinallataj qhari warmi kajkunapis mana wasanchanakuspa kawsakuychej, imaraykuchus Diosqa khuchichakojkunata, chantá millayta purejkunata ima juzgaspa juchachanqa.

⁵ Ama ashkha qolqeyoj kanamanta phutikuspa kawsaychejchu. Manachayqa imachus kunan tiyapusunkichej, chaywan sonqo junt'asqa kakuychej, imaraykuchus Dios nin: Mana qonqarparisqaykichu, nitaj saqerparisqaykichu, nispa.

⁶ Ajinaqa tukuy sonqo niyta atinchej: Tukuyta Kamachej Diosqa yanapawajniy. Chayrayku mana manchachikusajchu, imatachus pipis ruwanawanmanta, nispa.

⁷ Yuyarikuychej ñawpa michejkunaykichejmanta, pikunachus Diospa simi nisqanmanta yachachisorqachej, chaykunamanta. Chantá Diosta qhatejkuna jina imaynatachus kawsakusqankupi unanchaspa, paykuna jina Diospi atinikuspa puriychej.

⁸ Jesucristoqa kikillanpuni qayna, kunan, wiñaypajpis.

⁹ Chayrayku ama kunallanraj rikhurimoj yachachiykunawan, nitaj waj jina yachachiykunawan sonqoykichejta suwachikuychejchu. Aswan allinmin sonqoykichejpi Diospa qhasilla k'acha yanapayninwan kallpachasqa kanaykichej, imatachus mikhunamanta, chayrí mana mikhunamanta kamachisqakunata kasunaykichejmanta nisqaqa. Chaykunaqa mana jayk'aj yanapankuchu chay kamachisqakunata kasojkunata.

¹⁰ Noqanchejpata uj altar tiyapuwanchej, chay altarpi imachus jaywasqa kajmantataj Dioswan Tinkukuna Toldopi sacerdotekuna mana mikhuyta atinkuchu.

¹¹ Ñawpajta kuraj kaj sacerdoteqa uywa ñak'asqaj yawarninta Diosllapaj T'aqasqa Cheqaman apaykoj jucha pampachasqa kananpaj, chay jaywasqa uywaj aychantajrí jaramanta jawapi ruphachisqa kaj.

¹² Ajinallatataj Jesuspis llajtamanta jawapi ñak'arispa wañorqa, yawar jich'asqanwan runakunata Diospaj t'aqananpaj.

¹³ Chayrayku noqanchejpis Jesuswan khuskallataj jaramanta jawaman llojsinachej, pay jina p'enqayta k'umuykachachisqa kanata ñak'arinanchejpaj.

¹⁴ Kay pachaqa mana wiñaypaj tiyakunanchej llajtachu. Aswanpis jamoj p'unchaykunapi kaj llajtata tukuy sonqo suyashanchej.

¹⁵ Chayrayku, Jesucristonejta Tata Diosta yupaychanachej. Ajinata yupaychaspa, Diosman jaywashanchej ima jaywanatachus sapa p'unchay jaywananchej kashan, chayta. Chaynejta payllatapuni Diosninchejpaj rejsikapushasqanchejta rimarishanchej.

¹⁶ Amataj qonqaychejchu allin kajta ruwayta, jinallataj kapususqaykichejwan wajkunata yanapariyta, imaraykuchus chay jina ruwanapis sumaj jaywana jina Diosta kusichillantaj.

¹⁷ Iglesiapi michejniykichejkunata kasuychej, jinataj imatachus yachachisqankuta ruwaychej. Paykuna mana samarispa qankunata qhawashasunkichej, chaymanta Diosman cuentata qonankuta yachaspa. Chantá qankuna paykunata kasojtiykichej, imatachus ruwanankuta kusisqa ruwanqanku, mana thutuspachu, nitaj rimaspachu, imajtinchus chayqa qankunapaj mana allinchu kanman.

¹⁸ Jinallataj noqaykurayku Diosmanta mañapuwayku ari, imajtinchus allinta yachayku sonqoyku llimphu kasqanta. Munallaykutaj tukuy imapipis allinta puriyta.

¹⁹ Astawanqa Diosmanta mañapuwaychej askamalla qankunata watukoj jamunaypaj.

Cristota qhatejkunata napaykun

²⁰ Sonqo tiyaykusqa kawsakuyta qoj Diosqa ovejakunaj jatun Michejnin Jesucristota wañusqamanta kawsaricherqa, jinataj paypa yawar jich'asqanwan noqanchejwan wiñaypaj tratota ruwarqa.

²¹ Paymin tukuy imata allinta ruwanaykichejpaj qankunata yachachichun. Jinallataj Jesucristonejta qankunapi pay ruwachun, imachus payta kusichin, chayta. Chayrayku pay may jatunchasqa kachun, wiñay wiñaynintinpaj. Ajina kachun.

²² Wawqe panakuna, mañarikuykichej, qankunata sonqochayta munaspa uj iskay simipi nispa imatachus qhelqasqayta tukuy sonqo jap'ikunaykichejta.

²³ Yachanaykichejta munani, wawqenchej Timoteota carcelmanta kacharipusqankutaña. Aswan usqhaytachus kayman chayamonqa chayqa, iskayniyku qankunata watukoj jamusqayku.

²⁴ Tukuy michejniykichejkunata napaykapuwayku, jinallataj chaypi Cristota tukuy qhatikojkunatawan. Italiapi Cristota qhatikojkunapis napaykamusunkichej.

²⁵ Diospa qhasilla k'acha yanapaynin tukuyniykichejwan kachun.