Hebreos 12 - DIOSPA QHELQACHISQ

Dios k'amiwasqanchejta jap'ikuna

¹ Ñawpajta Diospi atinikuspa purejkuna may chhika karqanku, paykunataj muyuyninchejpi testigo jina imaynatachus purishasqanchejta qhawashawanchej. Chayrayku imachus ñawpajman rejta mana saqewanchejchu, chay tukuyta wijch'unachej, jinallataj ch'ipaykuwanchej, chay juchatapis. Chantá Dios churapuwasqanchej ñanta mana sayk'uspa t'ijunachej.

² Jesusllatapuni qhawaspa kanachej, imajtinchus paymin sonqonchejpi Diospi atinikunata rikhuricherqa, jinallataj pay astawan astawan Diospi atinikuyta amañakunanchejpaj kallpachawanchej. Jesusqa jatun kusiyta aswan qhepaman tarinanta yachasqanrayku cruzpi wañorqa, chay jina wañuna p'enqay kasqanta mana kasuta ruwaspa. Jinaytawantaj, Diospa kamachinan tiyanaj pañanman tiyaykukorqa.

³ Chayrayku Jesús imatachus ruwasqanpi yuyaychej. Paytaqa juchasapa runakuna chejnikorqanku chantá ñak'aricherqanku ima. Chaywanpis pay sinch'ita sayarqa. Qankunapis kikillantataj ruwaychej, ama sayk'unaykichejpaj, nitaj llawch'iyanaykichejpaj.

⁴ Qankuna juchaj contranta maqanakuspa, manaraj wañunaykichejkamachu sayaykorqankichej.

⁵ Chaywanpis qankuna qonqapunkichejsina imatachus Dios nisqanta Dios wawankunata jina kallpachayta munaspa. Pay nin: Wawáy, Tukuyta Kamachej Dios cheqan ñanman churasuyta munaspa jasut'isqanta ama pisipaj qhawaychu, nitaj qanta k'amisojtin q'enaqakuychu,

⁶ imaraykuchus Diosqa pitachá munakun, chayta cheqan ñanman churan. Jinallataj pitachá wawanpaj rejsikapun, chayta seq'on, nispa.

⁷ Sichus qankuna Dios cheqan ñanman churayta munaspa jasut'isqanta ñak'arishankichej chayqa, yuyarikuychej Diosqa wawankunata jina qankunata qhawashasqanta. Pi tatataj wawankuna cheqanta puriyta yachanankupaj mana jasut'inmanchuri?

⁸ Diosrí tukuy wawankunata cheqan ñanman churayta munaspa jasut'in. Sichus Dios qankunata mana jasut'isunkichejchu chayqa, chay niyta munan qankuna mana wawanpunichu kasqaykichejta, manachayqa k'ipa wawalla.

⁹ Mana chayllachu, wawa kashajtinchej tata mamanchej cheqan ñanman churanawanchejpaj jasut'iwasqanchejrayku, noqanchej paykunata jatun respetowan qhawakoj kanchej. Jina chayqa, manachu astawanraj janaj pacha Tatanchejman k'umuykusunman wiñaypaj kawsananchejpaj?

¹⁰ Tata mamanchejqa mana unaypajchu, yuyasqankuman jinalla jasut'iwaj kanchej. Diosrí, allinninchejpaj jasut'iwanchej, pay jina llimphu kawsayniyoj kananchejpaj.

¹¹ Arí, jasut'isqa kashanchej chaypachaqa mana kusikunapaj jinachu, imajtinchus nanakun. Chaymantarí, sichus Dios imatachus yachachiyta munawasqanchejta tukuy sonqo jap'ikunchej chayqa, allinpi kawsay, chantá allin kajta ruway ima sumaj poqoy jina kawsayninchejpi kanqa.

¹² Chayrayku qankuna utisqa makiykichejta mosoj kallpawan kallpachaychej, jinallataj llawch'iyasqa chaki moqoykichejtapis.

¹³ Chantá cheqanta purispa kawsaychej, ajinamanta pisi kallpayoj wist'u chaki jina ama ñanta pantananpaj, manachayqa kallpachasqa kaspa thuruta sayananpaj.

Diospa nisqanta kasuna

¹⁴ Qankuna atisqaykichejta ruwaychej tukuywan allinta kawsakunaykichejpaj, jinallataj Diospaj t'aqasqa jina llimphu kawsayniyoj kanaykichejpaj. Pichus mana llimphu kawsayniyoj kajqa Tukuyta Kamachej Diospa uyanta mana rikonqachu.

¹⁵ Qankunamanta pipis Diospa qhasilla k'acha yanapayninta jap'ejtinña, ama saqeychejchu chaymanta karunchakunanta. Amallataj saqeychejchu pipis jaya sonqo kasqanrayku ch'ajwata sayarichinanta, imajtinchus chay ch'ajwa mana allin kawsayta apamusunkichejman, chaynejtataj ashkha pantachisqa kankuman.

¹⁶ Amallataj pipis khuchiriyopi purikoj runa kachunchu nitaj Esaú jina Diosta pisipaj qhawachunchu. Payqa mikhunaraykulla imatachus kuraj kaj churi jap'inan karqa, chayta chhalarparisqa.

¹⁷ Yachankichej jina, Esauqa tatanpa saminchasqanta jap'iyta munashaspapis, qhesachasqa karqa. Esaú sonqonta nanachikuspa manchayta waqarikorqa chaypis, manañapuni tatanpa saminchayninta jap'iyta aterqachu.

¹⁸ Qankunaqa mana israelitakuna jina llankhay atina lawrashaj orqoman qayllarqankichejchu, nitaj laqhayaymanpis, nitaj tutayajmanpis, nitaj sinch'i wayramanpis.

¹⁹ Manallataj pututoj waqasqantapis uyarerqankichejchu, nillataj Diospa parlamusqantapis. Chayta uyarejkuna mayta mañakusqanku Dios amaña paykunaman parlamunanta,

²⁰ imaraykuchus chay kamachisqaqa paykunapaj ancha manchachikuna karqa. Dios nisqa: Sichus ima uywallapis orqoman chayanqa chayqa, chay kikinpi rumiwan ch'anqaykuspa, wañuchiychej, nispa.

²¹ Chay tukuy ima sinch'i mancharikunapaj kasqanrayku, Moisespis nillasqataj: Manchachikuspa, kharkatitishani, nispa.

²² Qankunatajrí Sión orqoman, jinataj kawsaj Diospa llajtanman qayllaykunkichej. Chay llajtaqa janaj pachapi kaj Jerusalén, chaypitaj mana yupay atina angelkuna Diosta yupaychashanku.

²³ Ajinallataj qankuna Diospa kuraj kaj wawankunaj tantakuyninman qayllaykunkichej, pikunaj sutinkuchus janaj pachapi qhelqasqa kashan, chaykunajman. Jinallataj qankuna Diosmanpuni qayllaykunkichej, pichus tukuypa Jueznin, chayman. Cheqanpaj qhawasqa runakunamanpis qayllallankichejtaj, pikunachus mana pantayniyojman tukuchisqaña kanku, chaykunaman.

²⁴ Aswanpis Jesusman qayllaykorqankichej, pinejtachus Dios mosoj tratota qankunawan ruwarqa, chayman. Jinallataj Jesuspa yawarnin ch'ajchusqaman qayllallankichejtaj. Chaywanpis chay yawarqa runaj juchan pampachasqa kananmanta parlan, mana Abelpa yawarnin jinachu wañuchisqa kasqanmanta vengakunamanta.

²⁵ Chayrayku allinta qhawakuychej, ama pichus parlawanchej, chayta qhesachanamanta. Sichus israelitakuna Moisespa parlasqanta mana uyariyta munasqankurayku jasut'isqapuni karqanku chayqa, imaynatataj noqanchej llusp'isunman sichus janaj pachamanta parlamojta qhesachasunman chayri?

²⁶ Chaypacha Diospa parlasqan kay pachata kharkatiticherqa. Kunantajrí pay nillantaj: Uj kutitawan kharkatitichisaj, mana kay pachallatachu, manachayqa janaj pachatawan, nispa.

²⁷ Uj kutitawan nispaqa, niyta munan Diosqa imachus ruwasqa kajta thalarparispa orqhonanta, imachus mana kuyuchisqachu kayta atin, chayllaña qhepananpaj.

²⁸ Chayrayku Diosta pachis nina, imaraykuchus noqanchej mana kuyuchisqa kayta atej kamachinata jap'inchej. Pachis nina, sonqowantaj Diosta munasqanman jina yupaychana, tukuy sonqo payta may jatun respetowan qhawaspa, manchachikuspataj.

²⁹ Ajinata ruwana, imaraykuchus Diosninchejqa tukuy imata q'olarparej nina jinamin.