Hebreos 10 - DIOSPA QHELQACHISQ

Cristo cruzpi wañusqan juchata pampachan

¹ Moisespa kamachisqanqa jamoj imakunaj llanthun jinalla karqa, mana janaj pachamanta chay kikin allin imakunachu. Chayrayku kamachisqaqa sapa wata kikin jaywanallatapuni Diosman jaywajkunata mana jayk'aj cheqan runaman tukuchiyta atinchu.

² Sichus jaywajkuna uj kutillapi juchallisqankumanta llimphuchasqa kankuman karqa chayqa, paykuna manaña uywata ñak'aspa Diosman ujtawan jaywankumanchu karqa, sonqonku manaña juchachasqanrayku.

³ Kunanrí, uywa ñak'asqata Diosman jaywasqanku paykunata juchayoj kasqankumanta sapa wata yuyarichin.

⁴ Chayqa ajina, imaraykuchus torokunaj, chantá chivokunaj yawarnenqa runaj juchanta manapuni wiñaypaj pampachayta atinchu.

⁵ Chayrayku Cristo kay pachaman jamuspa, Tata Diosta nerqa: Mana uywa ñak'asqa q'olachinata, nitaj waj jaywanata qonata munarqankichu. Manachayrí runaj ukhunta qowarqanki qanman jaywasunaypaj.

⁶ Uywata ñak'aspa q'olachina, jinataj jucha pampachanapaj jaywanapis mana sonqoykej munasqanman jinachu karqa.

⁷ Chayrayku nerqani: Kaypi kashani, Diosníy, munasqaykiman jina ruwanaypaj, imaynachus noqamanta p'anqapi qhelqasqa kashan, chayman jina, nispa.

⁸ Ñawpajta Cristo nin: Mana munarqankichu jaywanakunata, ofrendakunata, uywata ñak'aspa q'olachinata, jucharayku jaywanata ima. Chaykunaqa mana sonqoykej munasqanman jinachu karqa, nispa. Chayta Moisés kamachisqa chaypis, Dios mana munasqachu.

⁹ Chantá Cristo nillarqataj: Diosníy, kaypi kashani, munasqaykita ruwanaypaj, nispa. Ajinamanta payqa ñawpa kaj jaywanakunata qhasi manakajman tukuchin, jinaspataj, mosoj kajta cuentanmanta churan.

¹⁰ Dios mayta munarqa Jesucristoj ukhun wiñaypaj uj kutillata jaywasqa kananta, chaynejta noqanchej Diospaj t'aqasqa kananchejpaj.

¹¹ Ñawpa tratopi sacerdotekunaqa altarpa ñawpaqenpi sapa p'unchay sayaspa, sapa kuti Diosman chay kikin jaywanallatapuni jaywananku karqa. Chaywanpis chay jaywanakunaqa mana jayk'ajpis runaj juchanta pampachayta aterqachu.

¹² Kuraj kaj sacerdotenchej Cristorí, uj kutillata wiñaypaj pay kikin jaywaykukorqa jucha pampachasqa kananpaj. Jinaspataj, Diospa pañanman tiyaykukorqa.

¹³ Chaypitaj pay suyashan awqankuna chakin uraman churasqa kanankukama,

¹⁴ imaraykuchus payqa uj kutita jaywasqallanwan Diospaj t'aqasqa kajkunata wiñaypaj mana juchayojta ruwan.

¹⁵ Chayllamantataj Santo Espiritupis rikoj jina willan, imajtinchus nin:

¹⁶ Qhepanejman paykunawan kay jina tratota ruwasaj: Noqaqa sonqonkuman kamachisqayta churasaj, yuyayninkupitaj qhelqasaj, nispa Tata Dios nin.

¹⁷ Chantá nillantaj: Juchallisqankumanta, chantá millay ruwasqankumantapis manaña ujtawan yuyarikusajchu, nispa.

¹⁸ Maypachachus Dios juchata pampachan chaypachaqa, manaña jucha pampachasqa kananpaj uywata ñak'aspa Diosman jaywana kanchu.

Diospi atinikuspa sinch'ita sayana

¹⁹ Chayrayku wawqe panakuna, Jesús wañusqanrayku noqanchej mana manchachikuspa yawarninnejta Diosllapaj T'aqasqa Cheqaman tukuy sonqo yaykuyta atinchej.

²⁰ Jesús wañorqa chaypacha, jark'aj velota llik'ispa kicharerqa Diosllapaj T'aqasqa Cheqaman yaykunanchejpaj. Kunantaj pay kawsashan, paynejtataj Diosman qayllayta atinchej kicharisqan ñannejta.

²¹ Janaj pacha Diospa wasinpi Kuraj Kaj Sacerdotenchej tiyapuwanchejña.

²² Chayrayku ch'uwa sonqowan Tata Diosman qayllaykunachej, tukuy sonqo Cristopi atinikuspa, imaraykuchus pay wañusqanwan sonqonchejta tukuy juchamanta llimphuwarqanchej, llimphu yakuwanpis ukhunchejta mayllanman jina.

²³ Ajinaqa noqanchej imatachus Dios ruwananta suyakushanchej, chaymanta mana iskayrayaspa, sinch'ita ch'ipakunachej, imaraykuchus Diosqa nisqanta junt'anqapuni.

²⁴ Jinallataj ujkuna ujkuna imaynatachus yanaparinakunapaj yuyaycharikuna, puraj munakunanchejpaj, chantá allin kajta ruwananchejpaj ima.

²⁵ Amallataj sayk'uychejchu Diosta yupaychanapaj tantakuyman riyta, imaynatachus wakin riyta saqerparinku, jinataqa. Manachayqa ujkuna ujkuna sonqonchejta oqharinakuna, astawanqa Tukuyta Kamachej Jesuspa kutimunan p'unchay qayllamushasqanrayku.

²⁶ Sichus noqanchej cheqa kajta yachaspaña, juchallillasunmanpuni chayqa, chay juchata pampachanapaj manaña waj jaywana kanchu.

²⁷ Manachayqa mancharina jatun juiciollataña suyana kashan, chaypitaj sinch'i nina lawray Diospa awqankunata ruphaykonqa.

²⁸ Pillapis Moisespa kamachisqanta mana kasojqa iskay, chayrí kinsa rikojkunaj parlasqankuwan wañuchisqa kananpaj juchachasqa kanan karqa, mana pejpa khuyasqan.

²⁹ Ñawpajta ajinachus karqa chayqa, kunan astawanraj juchachanapaj jina kanqanku pikunachus Diospa Churinta qhesachajkuna, jinataj wañusqan qhasi manakaj kasqanta nejkuna. Paykuna mosoj tratoman yaykunapaj yawar jich'asqanta pisipaj qhawanku, mayqenchus Diospaj t'aqawanchej, chayta. Jinallataj Diospa Espiritunta turiyanku, pichus Diospa qhasilla k'acha yanapayninta chayachimuwanchej, chayta.

³⁰ Noqanchej Tukuyta Kamachej Diospa nisqanta yachanchej: Vengakunaqa noqajtamin, jinataj ruwasqankuman jina noqa pagachikusaj, nispa nisqanta. Nillarqataj: Tukuyta Kamachej Diosqa ayllunta juzganqa, nispa.

³¹ Ajinaqa kawsaj Diospa makinman urmanaqa may jina mancharinamin.

³² Chayrayku yuyarikuychej, maypachachus qankuna Cristomanta sumaj willayta jap'ikorqankichej, chay ñawpa p'unchaymanta. Yuyarikuychej may jina ñak'ariypi kashaspapis, imaynatachus kallpakorqankichej sinch'ita sayanaykichejpaj, chaymanta.

³³ Wakin kuti tukuypa rikunanta runaj turiyanan, chantá runaj asikunan karqankichej. Wakin kutitaj qankunaqa, pikunachus qankuna jina ñak'arichisqa kasharqanku, chaykunawan khuska ñak'arerqankichej.

³⁴ Jinallataj qankuna carcelpi wisq'asqa kajkunata khuyarikorqankichej. Wajkuna kapuyniykichejta qhechusojtiykichejpis, kusikorqankichej, imaraykuchus yacharqankichej janaj pachapi chayaqeykichej aswan sumaj mana tukukuyniyoj kasqanta.

³⁵ Chayrayku ari tukuy sonqo Diospi atinikullaychejpuni, imaraykuchus Diosqa may sumaj t'inkata qosonqachej.

³⁶ Qankuna pacienciakuyta necesitankichej, Diospa munasqanta ruwaspallapuni kanaykichejpaj. Chaypacha Dios imatachus qonawanchejta nisqanta jap'inkichej.

³⁷ Diospa Qhelqachisqanpi nin: Tumpamantawan pichus jamunan kashan, chay jamonqaña. Jamunanqa qayllapiña.

³⁸ Cheqan runapaj qhawasqay kajkunaqa noqapi atinikusqankunejta wiñaypaj kawsanqanku. Ñawpa kawsayninkuman kutiripojkunawanrí, sonqoy mana kusisqachu kanqa, nispa.

³⁹ Noqanchejrí mana, pikunachus ñawpa kawsayninkuman kutiripuspa, juchachasqa kanaman rishanku, chaykuna jinachu kanchej. Manachayqa, noqanchej kanchej, pikunachus Diospi atinikusqankurayku qhespichisqa kanata tarinku, chaykunamanta.