Hebreos 1 - DIOSPA QHELQACHISQ

Diosqa Churinnejta parlawanchej

¹ Ñawpa tiempopi Diosqa ñawpa tatanchejkunaman ashkha kutita sut'inchajkunanejta parlarqa tukuy imaymanamanta.

² Kunanrí kay qhepa p'unchaykunapi Dios Churinnejta parlawanchej, pimanchus tukuy imata chayaqeta jina qorqa, pinejtatajchus tukuy kaj chhikata ruwarqa, chaynejta.

³ Diospa Churenqa Diospa jatun kayninpa lliphipiyninta rikuchin, paypa kaynintaj Tata Diospa kayninta rejsichiwanchej. Payllataj atiyniyoj simi nisqanwan tukuy kaj chhikata maychus kananpi purichin. Chantá juchanchejta pampachaspa llimphuchawarqanchej, jinaspataj, janaj pachapi jatun atiyniyoj Kamachejpa pañanman tiyaykukorqa.

Diospa Churenqa angelkunamanta aswanmin

⁴ Diospa Churenqa angelkunamanta aswan patapi churasqa karqa, imaraykuchus Diosqa angelkunaj sutinkumanta aswan sumajpaj qhawasqa sutita payman qorqa.

⁵ Chayqa ajina, imaraykuchus Diosqa mana mayqen angelninmanpis nerqachu: Qanqa Churiy kanki, kunantaj noqa Tatayki kani, nispa. Nillataj mayqen angelmantapis nerqachu: Noqaqa paypa Tatan kasaj, paytaj Churiy kanqa, nispa.

⁶ Jinallataj kuraj kaj Churinta kay pachaman kachamuspa, Dios nerqa: Diospa tukuy angelninkuna payta yupaychachunku, nispa.

⁷ Angelkunamanta parlaspataj, Diosqa nin: Payqa angelninkunata wayrata jina kachan, kamachinkunatataj nina jina kanankuta ruwan, nispa.

⁸ Churinmantatajrí nin: Diosníy, qanqa wiñay wiñaynintinpaj kamachinki, jinataj justiciata ruwaspa kamachinki.

⁹ Qanqa cheqan kajta munakunki, mana allin kajtataj chejnikunki. Chayrayku qanpa Diosniykeqa jawispa ajllakusorqa, kusiywantaj junt'aykuchisorqa, kawsaqeykikunamanta aswan pataman churasuspa, nispa.

¹⁰ Chantá nillarqataj: Tukuyta Kamachejníy, qanmin qallariypi kay pachata sinch'ita sayacherqanki. Janajpis makiykej ruwasqallantaj.

¹¹ Tukuy chayqa tukukaponqa. Qantajrí wiñay wiñaypaj kallankipuni. Chaykunaqa p'acha jina thantakaponqanku.

¹² Qantaj chaykunata p'achata jina suk'anki. Jinaspataj, wajta churanki. Chaywanpis qanqa kikillanpuni kanki, wiñay wiñaynintinpajtaj kawsanki, nispa.

¹³ Jinallataj Diosqa mana mayqen angelmanpis nerqachu: Kay pañaynejpi tiyarikuy, awqaykikunata chakiyki uraman churanaykama, nispa.

¹⁴ Aswanpis angelkunaqa Diospa munasqanta ruwanankupaj kashanku. Diostaj paykunata kachamun, pikunachus qhespichisqa kanata chayaqeta jina jap'enqanku, chaykunata yanapanankupaj.