Habacuc 1 - DIOSPA QHELQACHISQ

Habacuc justicia mana kasqanmanta llakikun

¹ Kay willayta Tata Dios Habacucman sut'incharqa.

² Tata Dios, mayk'ajkamataj qhaparikamusqayki, qantaj mana uyariwankichuri? Jayk'ajkamataj qhaparikamusqayki kallpaman atinikuspa ñak'arichiwasqankurayku, manataj kacharichiwankichuri?

³ Imaraykutaj millay ruwayllata, ñak'ariyllatawan qhawachiwankiri? Millay ruwaykunawan, wañuchinakuywan ima muyurisqa kani. Tukuynejpi phiñanakuykuna, maqanakuykunapis tiyan.

⁴ Mana kamachisqaykiman jinachu imatapis ruwanku, nitaj pipajpis justicia kanchu. Millay runakunaqa cheqan runakunata qhatiykachanku, ajinamantataj justiciata q'ewinku.

Tata Dios kutichin

⁵ Chantá Tata Dios kutichiwarqa: Muyuyniykichejpi kaj suyukunata qhawariychej. Chaykunata qhawaspataj, mancharinkichej. T'ukunapaj jina kay p'unchaykunapi ruwasaj. Pi willarisojtiykichejpis, mana creeyta atinkichejchu.

⁶ Noqaqa caldeokunata maqanakuman yaykunapaj jina wakichisaj. Paykuna may sajra rumi sonqo kanku, mana khuyakuyniyojtaj. Jinataj kay pachata uj ladomanta uj ladoman purispa, wajkunaj jallp'ankuta qhechunankupaj jinalla kashanku.

⁷ Caldeokunaqa manchachikunapaj jina millay runakuna kanku. Mana ni ima kamachisqakunatapis kasunkuchu, aswanpis munayninkuman jinalla imatapis ruwanku.

⁸ Caballonkoqa tigremantapis astawan sinch'ita t'ijurin, ch'innejpi k'ita alqokuna jinataj manchachikunapaj kanku. Caballopi soldadonkukunapis wayra jina phawarispa, karumantapacha maqanakoj chayarparimunku, imaynatachus anka mikhunanta jap'ej phawaykun, jinata.

⁹ Caldeo soldadokunaqa pasaj jinalla tukuy imata phiriranku, maymanchus risqankupitaj runakunata kharkatichinku. Jap'irasqanku runakunaqa mama qocha kantupi t'iyumantapis aswanraj kanku.

¹⁰ Kuraj kamachejkunamanta alqochakunku, jinallataj may uyarisqa runakunamantapis. Sumaj perqawan jark'achasqa llajtakunamantapis asiykukunku. Perqata wasaykunankupaj jallp'a moqota oqharispataj, llajtata jap'inku.

¹¹ Purisqankoqa jatun muyoj wayra jina, jinataj ninku kallpanku diosninku kasqanta, nispa.

Habacuc ujtawan quejakullantaj

¹² Chantá Habacuc kuticherqa: Tata Dios, Diosníy, qanqa wiñay wiñaypajmin kawsanki. Ama wañojta qhawallawaykuchu. Qanmin pakakunayku kanki. Chayrayku ama saqeychu Babiloniamanta kajkuna aylluykita jasut'inawaykuta.

¹³ Qanqa may llimphu kasqaykirayku, millay kajta ruwanata mana qhawallaytapis atinkichu. Jina kaspa, millayta ruwajta mana qhawakullankichu. Imaynatataj ari millay ruwajkunata qhawakullankiri? Imanaynatataj ch'inlla kanki millay runakuna paykunamanta aswan allin runakunata wañuchejtinkuri?

¹⁴ Imaraykutaj runakunata qhawanki, mama qochapi challwata jinalla, chayrí mana kamachejniyoj animalkunapis kankuman jinatari?

¹⁵ Chayrayku Babiloniamanta kajkunaqa waj suyukunata anzuelowan jina jap'inku, imaynatachus challwata jap'ej runaqa challwata jap'in, ajinata. Anzuelowan, ch'ipawantaj jap'ej rinku, chantá challwata qotullata rikuspa, mayta kusikunku.

¹⁶ Chayraykumin challwa jap'ejkuna anzuelonkuta, ch'ipankutapis mayta munakunku. Chayraykullataj jaywanata jaywanku, inciensotapis q'oshñichinku, chaykunanejta ashkha mikhunayoj kasqankurayku.

¹⁷ Ajinatachu Babiloniamanta kajkuna ch'ipankuwan jap'irallawasqaykupuni? Runakunata mana uj chhikanta khuyarikuspa wañuchillanqankupunichu?