Génesis 9 - DIOSPA QHELQACHISQ

Diosqa Noewan tratota ruwan

¹ Chantá Diosqa Noeta, churinkunatawan ima saminchaspa, nerqa: Ashkha wawayoj kaychej, kay pachamantaj junt'aychej.

² Kay pachapi tukuy imaymana animalkuna qankunata manchachikusonqachej. Jinallataj phawajkunata, jallp'a patapi qhatatakuspa purejkunata, mama qochapi kajkunatapis tukuyninta makiykichejman churani.

³ Chayrayku tukuy animalta, jinallataj tukuy imaymana q'omerkunatapis mikhuyta atinkichej. Chaykunata mikhunaykichejpaj qoykichej.

⁴ Kayllata mana mikhunaykichejchu tiyan: Yawarniyoj aychata, imaraykuchus yawarpi kawsay kashan.

⁵ Qankunata wañuchisoj animalmanta, chayrí qankunata wañuchisoj runamanta noqa cuentata mañasaj. Sapa runamanta runa masinta wañuchisqanmanta cuentata mañallasajtaj.

⁶ Pichus runa masinta wañuchejtaqa waj runa payta wañuchillanqataj, imaraykuchus runaqa Diospa rijch'ayninman jina ruwasqamin.

⁷ Qankunarí ashkha wawayoj kaychej, kay pachamantaj junt'aykuychej, nispa. Ajinata Dios nerqa.

⁸ Jinallataj Diosqa Noeta, churinkunata ima nillarqataj:

⁹ Noqa qankunawan, mirayniykichejwan ima uj tratota ruwasaj.

¹⁰ Jinallataj qankunawan khuska jatun barcomanta llojsimojkunawan tratota ruwallasajtaj: Phawajkunawan, uywakunawan, k'ita animalkunawan, kay pachapi kaj chhika animalkunawan ima.

¹¹ Qankunawan trato ruwasqayqa kay jina: Noqaqa runakunata, nitaj animalkunatapis musphay para yakuwan mana ujtawan chinkachisajchu. Manaña ujtawan musphay para kanqañachu tukuynin kay pachata p'ampananpaj.

¹² Qankunawan, jinataj animalkunawan ima wiñaypaj trato ruwasqaymanta señalqa kaymin kanqa:

¹³ Noqaqa k'uychiyta phuyuman churani, chaytaj kay pachawan tratota ruwasqaymanta señal kanqa.

¹⁴ Maypachachus kay pachaman phuyuchimusaj chaypacha, k'uychiy phuyupi rikhurenqa.

¹⁵ Chaypacha qankunawan, jinallataj animalkunawan ima tratota ruwasqaymanta noqa yuyarikusaj. Tukuy imata chinkachinapaj manaña ujtawan musphay para kanqachu.

¹⁶ Maypachachus k'uychi phuyupi rikhurenqa chaypacha, noqa rikusaj, yuyarikusajtaj tukuy runawan, jinataj tukuy animalwan ima tratota wiñaypaj ruwasqaymanta.

¹⁷ K'uycheqa señal kanqa noqa kay pachapi tukuy kawsajwan tratota ruwasqaymanta, nispa. Ajinata Dios Noeta nerqa.

Noé machaykun

¹⁸ Noéj churinkuna jatun barcomanta llojsejkunaqa karqanku Sem, Cam, Jafet ima. Camqa Canaanpa tatan karqa.

¹⁹ Noéj churinkuna kay kinsa karqanku, paykunaj mirayninkutaj kay pachaman junt'arqanku.

²⁰ Chaymanta qhepata Noé jallp'ata llank'ayta qallarerqa, chantá uva huertata ruwarqa.

²¹ Chantá uj kuti Noé vinota ujyaspa, machaykorqa. Chayrayku payqa machasqamanta toldon ukhupi q'alalla wijch'urpayakorqa.

²² Jinallapi Canaanpa tatan Camqa tatan Noeta q'alallata rikuspa, wawqenkunaman willamorqa.

²³ Semwan, Jafetwantajrí uj qhatanata oqharispa, wasankuman qhataykukorqanku. Chantá qhepallamanta thaskispa, tatankuta qhataykorqanku. Ajinata ruwaspataj, paykuna tatanku q'alalla kashasqanta mana qhawarqankuchu.

²⁴ Chantá Noé puñusqanmanta rijch'arejtin, payman willarqanku sullk'a kaj churin imatachus ruwasqanta.

²⁵ Chayrayku pay nerqa: Canaán maldicisqa kachun, jinataj wawqenkunaj wata runan kachun, nispa.

²⁶ Noé nillarqataj: Sempa Tata Diosnin yupaychasqa kachun, Canaantaj Sempa wata runan kachun.

²⁷ Diosqa Jafetpa jap'iyninta astawan jatunchachun. Paytaj Sempa toldonpi tiyakuchun. Canaantajrí wata runan kachun, nispa.

²⁸ Jatun musphay paramanta qhepata Noeqa 350 watatawanraj kawsarqa.

²⁹ Ajinaqa Noé 950 watayoj kashaspa, wañuporqa.