Génesis 8 - DIOSPA QHELQACHISQ

Jatun musphay para thañin

¹ Diosqa Noemanta, jinallataj jatun barcopi kasharqanku, chay animalkunamantapis khuyarikorqa. Chayrayku pay kay pachaman wayrachimorqa, yakutaj ch'akiyta qallarerqa.

² Jallp'aj sonqonmanta t'ojyamoj yakoqa manaña jutumorqachu. Jinallataj janajmanta jich'akamoj yakupis sayarqa. Chayrayku para thañerqa.

³ Yakoqa jallp'a patamanta pisimanta pisi ch'akerqa. Pachaj phishqa chunkayoj p'unchayninman jinataj astawan pisiyarqa.

⁴ Chantá qanchis kaj killapi, chunka qanchisniyoj p'unchayta, jatun barcoqa Ararat sutiyoj orqo pataman tiyaykorqa.

⁵ Yakutaj pisimanta pisi ch'akipushallarqapuni. Chayrayku chunka kaj killa qallariyta aswan jatuchaj kaj orqokuna ñapis rikhurerqankuña.

⁶ Chaymanta tawa chunka p'unchayninman jina, Noé jatun barcopi ruwasqan ventananta kicharerqa.

⁷ Chantá uj qharqañata kacharerqa. Qharqañataj kay pachapi yaku ch'akinankama kaynejta, jaqaynejta phawaspa karqa.

⁸ Chaymanta Noeqa uj urpitañataj kacharerqa, jallp'a rikhurerqañachus manarajchus, chayta yachananpaj.

⁹ Urpirí mayman tiyaykunanpaj mana tarispa, jatun barcoman kutimporqa, imaraykuchus jallp'aqa yakuwan p'ampasqallaraj kasharqa. Chayrayku Noeqa ventanamanta jawaman makinta orqhorqa. Urpi makinman tiyaykojtintaj, arcaman apaykorqa.

¹⁰ Chantá Noé qanchis p'unchaytawan suyarqaraj, chaymantataj ujtawan urpita kacharillarqataj.

¹¹ Ch'isiyaykushajtinña, urpeqa uj olivo laqhe achurisqa Noeman kutimporqa. Ajinamanta Noé yaku ch'akishasqantaña yacharqa.

¹² Chaymanta Noeqa qanchis p'unchaytawanraj suyarqa. Chantá urpita ujtawan kacharillarqataj, urpirí manaña kutimporqachu.

¹³ Noé 601 watayojña kashajtin, wata qallariy killamanta, killa qallariy p'unchayta kay pachapi yaku tukuynin ch'akiporqa. Chantá Noé barcoj qhatanta qhataraspa, jallp'a ch'akiña kasqanta rikorqa.

¹⁴ Iskay kaj killamanta, iskay chunka qanchisniyoj p'unchayninman jallp'aqa sumaj ch'akiñapuni karqa.

¹⁵ Chantá Diosqa Noeta nerqa:

¹⁶ Qanwan, warmiykiwan, churiykikunawan, chantá ñojch'aykikunawan ima barcomanta llojsiychej.

¹⁷ Jinallataj qanwan khuska kashaj animalkunatapis kacharillayña: Phawajkunata, uywakunata, pampata qhatatakuspa purejkunata ima, paykuna miraspa, kay pachaman junt'anankupaj, nispa.

¹⁸ Ajinata Noeqa jatun barcomanta llojserqa warminwan, churinkunawan, ñojch'ankunawan ima.

¹⁹ Jinallataj uywakuna, k'ita animalkuna, pampata qhatatakuspa purejkuna, phawajkuna ima tukuynin llojserqanku.

²⁰ Chantá Noeqa Tata Diosta yupaychananpaj uj altarta ruwarqa. Chaypitaj ñak'aspa, chantá q'olachispa ima Diosman jaywarqa, llimphupaj qhawasqa tukuy animalmanta, tukuy phawajmanta ima.

²¹ Q'olachispa jaywanaj q'aparisqanqa Tata Diospaj ima munay karqa. Chayrayku Dios nerqa: Noqaqa runaj juchanrayku kay pachata manaña ujtawan maldicisajchu. Runa wawamantapacha mana allinta ruwanallapipuni yuyan chaypis, manaña noqa tukuy kawsajta tukuchisajchu, kunan imaynatachus tukucherqani, jinataqa.

²² Kay pacha kanankamaqa chajra tarpuna, chajra poqoyta oqharina kallanqapuni. Kallanqataj q'oñi mit'a, chiri mit'a, q'omer mit'a, ch'aki mit'a, chantá p'unchay, tutapis, nispa. Ajinata Tata Dios nerqa.