Génesis 6 - DIOSPA QHELQACHISQ

Runakuna millay ruwanaman qokunku

¹ Maypachachus kay pachapi runakuna mirayta qallarerqanku chaypacha, warmi wawakunayoj karqanku.

² Diospa churinkunarí runakunaj ususinkuna k'achita kasqankuta rikuspa, casaranankupaj munasqankuman jina ajllakorqanku.

³ Chayta rikuspa, Tata Dios nerqa: Runakuna kay pachapi wiñaypaj kawsanankuta mana saqesajchu, imaraykuchus paykunaqa wañoj runalla kanku. Chayrayku 120 watallataña kawsanqanku, nispa.

⁴ Chantá Diospa churinkuna runakunaj ususinkukunawan casaraspa, wawayoj karqanku, wawankukunataj jatunkaray runakuna karqanku. Paykuna chaypacha, jinataj qhepanejman manchay kallpayoj, manchay uyarisqataj karqanku.

⁵ Tata Diosrí rikorqa kay pachapi runakunaj millayta ruwasqanku anchañapuni kasqanta. Jinallataj Tata Dios yacharqa runakuna qhepanejman millayta ruwaspa purinallapipuni yuyasqankuta.

⁶ Chayrayku Tata Dios runata ruwasqanmanta maytapuni llakikorqa. Sonqonpi sinch'ita llakikuspataj, nerqa:

⁷ Noqaqa runa ruwasqayta kay pachamanta chinkachisaj. Jinallataj tukuy uywakunata, pampata qhatatakuspa purejkunata, phawajkunatawan chinkachillasajtaj. Chaykunata ruwasqaymanta anchatapuni llakikuni, nispa.

⁸ Chaywanpis Tata Diosqa Noéj purisqanta allin ñawiwan qhawarqa.

Noé jatun barcota ruwan

⁹ Noéj kawsasqan kay jina karqa: Noeqa cheqanta ruwaj runa karqa, paytaj Diosta kasuspallapuni purerqa. Chaypacha tiyakojkunamanta paylla Diospa munasqanta ruwaspa kawsarqa.

¹⁰ Noejta churinkunataj kinsa karqanku: Sem, Cam, Jafet ima.

¹¹ Kay pachapi millayta ruwaspa purina anchañapuni kasqanta Dios rikorqa. Jinallataj mana cheqan kajta ruwana junt'a kasqanta rikullarqataj,

¹² imajtinchus tukuy runakuna allintapuni millayta purinaman qokapusqanku. Kay pachapi millayta ruwaspa purina anchañapuni kasqanta Tata Dios rikorqa.

¹³ Chayrayku Noeta nerqa: Noqa kay pachamanta tukuy runata chinkachisaj, paykunarayku kay pachapi millayta purina ancha tiyan. Chayrayku paykunata, chantá kay pachapi kaj chhikata chinkachisaj.

¹⁴ Qantajrí pinomanta uj jatun barcota ruwanki, ukhunpi ashkha cuartoyojta. Ama yaku yaykuykunanpajtaj, ukhunta jawantawan ima mach'awan lluch'iranki.

¹⁵ Chay jatun barcotaqa kay jinata ruwanki: Sayt'unman 135 metro kanqa, kinrayninmantaj iskay chunka iskayniyoj metro khuskanniyoj kanqa. Sayayninmantaj chunka kinsayoj metro khuskanniyoj kallanqataj.

¹⁶ Jinallataj barcota kinsa altoyojta ruwanki, qhatanmanta uramantaj khuskan metropi jina ventanayoj kanqa. Uj ladonpitaj punkuta ruwanki.

¹⁷ Chantá noqaqa kay pachaman manchay sinch'itapuni parachimusaj, yaku kay pachata p'ampaspa, tukuy kawsajta chinkachinanpaj. Jallp'a patapi tukuy kawsayniyojpis wañullanqankutaj.

¹⁸ Qanwantajrí uj tratota ruwasaj. Barcomanqa qan, warmiyki, jinallataj churiykikuna, chantá ñojch'aykikuna ima yaykunkichej.

¹⁹ Chantá barcomanqa kay pachapi kaj chhika animalkunamanta uj chinatawan uj orqotawan qhatiykunki. Chay animalkunata qan barcoman apaykunki ama wañunankupaj.

²⁰ Phawajkunamanta, uywakunamanta, qhatatakuspa purejkunamanta ima, sapa t'aqamanta uj china, uj orqo barcoman yaykonqanku, qanwan khuska kawsanankupaj.

²¹ Jinallataj tukuy imaymana mikhunata tantaspa, waqaychallankitaj, qan chantá animalkuna mikhunankupaj, nispa. Ajinata Tata Dios nerqa.

²² Noetaj Dios imaynatachus nisqanman jina tukuyninta ruwarqa.