Génesis 5 - DIOSPA QHELQACHISQ

Adanpa miraynin

¹ Kaykuna Adanpa mirayninmanta kajkuna kanku. Mayk'ajchus Dios runata ruwarqa chaypacha, runata payman rijch'akojta ruwarqa.

² Diosqa qharita warmitawan ruwarqa, chantá paykunata samincharqa. Paykunata ruwaytawantaj: “Runa”, nispa suticharqa.

³ Adán 130 watayoj kashajtin, churin payman rijch'akoj paqarerqa. Adantaj payta “Set” sutiwan suticharqa.

⁴ Chaymanta Adanqa 800 watatawanraj kawsarqa. Chay jawa Adanpata waj churinkuna, chantá ususinkuna ima tiyapullarqataj.

⁵ Adanqa tukuyninpi 930 watata kawsarqa, chay jina unayniyoj kaspataj, wañuporqa.

⁶ Maypachachus churin Enós paqarerqa chaypacha, Setqa 150 watayoj karqa.

⁷ Churin Enós paqarisqanmantapacha Setqa 807 watatawanraj kawsarqa, wawankunataj qharikuna, chantá warmikuna ima karqankuraj.

⁸ Tukuyninpi Setqa 912 watata kawsarqa, chay jina unayniyoj kaspataj, wañuporqa.

⁹ Enosqa, churin Cainán paqarerqa chaypacha, 90 watayoj karqa.

¹⁰ Chay qhepata Enosqa 815 watatawanraj kawsarqa, wawankunataj qharikuna, chantá warmikuna ima karqankuraj.

¹¹ Tukuyninpi Enosqa 905 watata kawsarqa, chay jina unayta kawsaspataj, wañuporqa.

¹² Cainanqa, churin Malalel paqarerqa chaypacha, 70 watayoj karqa.

¹³ Chaymanta Cainanqa 840 watatawanraj kawsarqa, wawankunataj qharikuna, chantá warmikuna ima karqankuraj.

¹⁴ Tukuyninpi Cainanqa 910 watata kawsarqa, chay jina unayniyoj kaspataj, wañuporqa.

¹⁵ Malalelqa, churin Yared paqarerqa chaypacha, 65 watayoj karqa.

¹⁶ Chay qhepata churin Yared paqarisqanmanta Malalelqa 830 watatawanraj kawsarqa, wawankunataj qharikuna, chantá warmikuna ima karqankuraj.

¹⁷ Tukuyninpi Malalelqa 895 watata kawsarqa, chay jina unayniyoj kaspataj, wañuporqa.

¹⁸ Yaredqa, churin Enoc paqarerqa chaypacha, 162 watayoj karqa.

¹⁹ Chay qhepata Yaredqa 800 watatawanraj kawsarqa, wawankunataj qharikuna, chantá warmikuna ima karqankuraj.

²⁰ Tukuyninpi Yaredqa 962 watata kawsarqa, chay jina unayniyoj kaspataj, wañuporqa.

²¹ Enoc 65 watayoj kashajtin, churin Matusalén paqarerqa.

²² Enocqa Diospa munayninta ruwaspa kawsarqa. Matusalén paqarisqanmanta qhepata, Enocqa 300 watatawan kawsarqa, wawankunataj qharikuna, chantá warmikuna ima karqankuraj.

²³ Tukuyninpi Enocqa 365 watata kawsarqa.

²⁴ Enocqa Diospa munayninta ruwaspa kawsarqa. Chantá uj p'unchay chinkaporqa, imaraykuchus Dios kawsashajta pusakaporqa.

²⁵ Matusalén 187 watayoj kashajtin, churin Lamec paqarerqa.

²⁶ Chay qhepata Matusalenqa 782 watatawanraj kawsarqa, wawankunataj qharikuna, chantá warmikuna ima karqankuraj.

²⁷ Tukuyninpi Matusalenqa 969 watata kawsarqa, chay jina unayta kawsaspataj wañuporqa.

²⁸ Lamec 182 watayoj kasharqa chaypacha, churin Noé paqarerqa.

²⁹ Paytataj “Noé” sutiwan suticharqa, imaraykuchus nerqa: Paymin sinch'i ruwananchejmanta samarichiwasun. Tata Dios kay pachata maldicisqanrayku atin mana atin llank'ashanchej, Noetaj chaymanta samarichiwasun, nispa.

³⁰ Noé paqarisqanmanta qhepaman, Lamecqa 595 watatawanraj kawsarqa, wawankunataj qharikuna, chantá warmikuna ima karqankuraj.

³¹ Tukuyninpi Lamecqa 777 watata kawsarqa, chay jina unayniyoj kaspataj, wañuporqa.

³² Noé 500 watayoj kashajtin, paqarerqanku churinkuna Sem, Cam, chantá Jafet ima.