Génesis 4 - DIOSPA QHELQACHISQ

Cainwan Abelwan

¹ Adanqa warmin Evawan puñuykorqa, Evataj onqoj rikhurispa, uj qhari wawata paqarichikorqa. Suticharqataj “Caín” sutiwan: Tata Diospa yanapayninwan qhari wawayoj kani, nispa.

² Ujtawan wijsallikuspataj, Evaqa Cainpa sullk'antañataj paqarichikorqa, suticharqataj “Abel”, nispa. Abelqa ovejata uywaj karqa. Caintaj jallp'ata llank'aj karqa.

³ Qhepanejman Cainqa jallp'ata llank'aspa, poqochisqanmanta Tata Diosman wakin imakunata jaywarqa.

⁴ Abelpis Tata Diosman jaywananpaj apallarqataj, ovejanmanta phiwi uñakunamanta aswan sumajnin kajta. Jinapi Tata Diosqa Abelta, chantá jaywasqantapis sonqo junt'asqa jap'ikorqa.

⁵ Caintarí, jinallataj imatachus jaywasqantapis Dios mana sonqo junt'asqachu qhawarqa. Chayrayku Cainqa maytapuni phiñakorqa, uyanpis uj jinayarqa.

⁶ Chantá Tata Diosqa Cainta nerqa: Imaraykutaj chay jina phiñasqa, uj jinataj kashankiri?

⁷ Sichus allinta ruwawaj chayqa, mana k'umuykachaspa puriwajchu. Manachus allin kajta ruwanki chayrí, juchaqa jap'erqosunanpaj jina suyaykushasunki. Ama qanqa juchalliyta munanawan atipachikuychu, nispa.

⁸ Uj kuti Cainqa Abelta nerqa: Jaku campota puriykacharej rina, nispa. Chantá campopi kashajtinku, Cainqa wawqen Abelta maqaspa wañurparicherqa.

⁹ Chantá Tata Dios Cainta taporqa: Maytaj wawqeyki Abelri? nispa. Caintaj kuticherqa: Mana yachanichu. Noqachu wawqey Abelta qhawanay karqa? nispa.

¹⁰ Tata Diostajrí nerqa: Imatataj ruwarqankiri? Wawqeykej yawarnenqa jallp'amantapacha justicia ruwanayta qhaparimushawan.

¹¹ Chayrayku qanqa maldicisqa kanki, jinataj maypichus wawqeykej yawarninta jich'arqanki, chay jallp'amanta wijch'usqa kanki.

¹² Chajrata tarpojtiykipis, jallp'aqa manaña poqopusonqachu. Qantaj kay pachapi mana llajtayoj jina puriskiri kanki, nispa.

¹³ Chantá Caín Tata Diosta nerqa: Ñak'arinayqa mana apay atinapaj jinachu.

¹⁴ Kunan qanqa kay jallp'amanta qharqowanki, manañataj qayllaykipi ujtawan kayta atisajchu. Imamanta ayqekoj runa jina kay pachapi purisaj. Ajinaqa pipis tinkuwaspa, wañuchiwanqachari, nispa.

¹⁵ Tata Diostajrí kuticherqa: Mana jinachu kanqa. Pipis qanta wañuchejqa qanchis kutita jasut'isqa kanqa, nispa. Chaymantataj Tata Diosqa Cainman uj señalta churarqa, pipis payta taripaspa, ama wañuchinanpaj.

¹⁶ Ajinata Cainqa Tata Diosmanta karunchakuspa, Nodman tiyakoj riporqa. Nodqa Edenmanta inti llojsimuynejpi kashan.

Cainpa miraynin

¹⁷ Caín warminwan puñuykorqa, warmintaj wijsayoj rikhurispa, churin Enocta paqarichikorqa. Chaypacha Cainqa uj llajtata sayaricherqa, chay llajtatataj churin Enocpa sutinwan suticharqa.

¹⁸ Enocqa Iradpa tatan karqa, Iradtaj Mejuyaelpa tatan karqa. Mejuyaeltaj Metusaelpa tatan karqa, Metusaeltaj Lamecpa tatan karqa.

¹⁹ Lamecqa iskay warmiyoj karqa. Ujninpata Ada sutin karqa, ujninpatataj Silá.

²⁰ Adaj churenqa Jabal karqa, Jabalpa miraynintaj toldopi tiyakojkuna karqanku, uywata uywajkuna ima.

²¹ Sullk'anpa sutintaj Jubal karqa, chaypa wawankunataj arpata, qenatawan waqachiyta yachajkuna karqanku.

²² Silapis wawayojllataj karqa, sutintaj Tubal Caín karqa. Payqa broncemanta, fierromanta ima tukuy imata ruwayta yacharqa. Tubal Cainpata panantaj Noamá karqa.

²³ Uj kuti Lamecqa warminkunata nerqa: Ada, Silá, imatachus nisqayta sumajta uyariwaychej: Warmiykuna, noqaqa uj runata wañucherqani wajtawasqanrayku, uj waynatapis wañuchillarqanitaj sajmawasqanrayku.

²⁴ Sichus Cainta wañuchejta qanchis kutita jasut'enqanku chayqa, noqata wañuchiwajtaqa qanchis chunka qanchisniyoj kutita jasut'enqanku, nispa.

Setpa miraynin

²⁵ Adanqa ujtawan warminwan puñuykorqa, warmintaj wijsallikuspa, uj qhari wawata paqarichikorqa. Chantá payta suticharqa “Set” sutiwan: Diosqa uj qhari wawata qowan Abelpa cuentanmanta, pitachus Caín wañucherqa, chaymanta, nispa.

²⁶ Setpatapis churin kallarqataj, sutintaj Enós karqa. Chaymantapacha runakunaqa Tata Diospa sutinta oqharispa, payta yupaychayta qallarerqanku.