Génesis 39 - DIOSPA QHELQACHISQ

Tata Diosqa Joseta yanapan

¹ Ismaelitakunaqa Joseta Egiptoman aparqanku. Chaypitaj Egipto llajtayoj Potifar payta rantikorqa. Potifarqa Egipto suyuta kuraj kamachejpata yanapajnin karqa, payta qhawaj soldadokunaj capitanninku.

² Jinapi Tata Diosqa Josewan kasharqa. Chayrayku José Egipto llajtayoj patronninpapi kashajtin, tukuy imapi allin rerqa.

³ Patronnintaj repararqa Tata Diosqa Josewan kashasqanta, chayraykutaj Joseta tukuy ima ruwasqanpi allin rishasqanta.

⁴ Chayrayku Joseqa patronninwan maytapuni munachikorqa. Chantá Potifarqa Joseta tukuy kapuyninmanta, wasinpi kajkunamantawan mayordomo kananpaj churarqa.

⁵ Chaymantapacha Tata Dios Joserayku Potifarta samincharqa. Wasinpi tukuy ima kajpi, jinataj chajranpipis Tata Dios yanaparqa.

⁶ Tukuy tiyapusqanta Josejpa makinman saqespa, Potifarqa manaña imamantapis llakikorqañachu, manachayqa mikhunallanmantaña. José allin rijch'ayniyoj, alajitu runa karqa.

⁷ Chay qhepamantaj Potifarpa warmenqa Joseta munapayaspa, uj kuti nerqa: Jamuy, noqawan puñunaykita munani, nispa.

⁸ Joserí manapuni munarqachu, nerqataj: Patronneyqa niwan noqa tukuy imanmanta cuentayoj kanayta. Noqa kaypi kashajteyqa, mana imamantapis llakikunanchu tiyan.

⁹ Kay wasipi mana pipis noqamanta aswan atiyniyoj kanchu, patronniytaj tukuy imata makiyman saqewan. Qanllata mana saqewanchu, imajtinchus qanqa warmin kanki. Ajinaqa, imaynatataj chay jina millayta ruwaspa, Diospa contranpi juchalliymanri? nispa.

¹⁰ Chaywanpis chay warmeqa sapa p'unchay Joseta qhatiykacharqa, paywan puñuykunanta munaspa, payllawan kananta munaspa ima. Josetajrí mana uyariyllatapis munajchu.

¹¹ Uj kuti José Potifarpa wasiman yaykorqa, imachus ruwananta ruwaj. Mana pipis chaypi kashasqanta rikuspataj,

¹² Potifarpa warmenqa Joseta patanchakunan p'achamanta jap'iykuspa, nerqa: Puñuna, nispa. Josetajrí chay p'achanta warmej makinpi saqerparispa, wasimanta jawaman ayqerikaporqa.

¹³ Chantá chay warmeqa José ayqespa makinpi patanchana p'achata saqerparisqanta rikuspa,

¹⁴ wasinpi kaj kamachinkunata wajyaspa, nerqa: Rikunkichejchu, qosayqa kay hebreo runata pusamun noqanchejmanta alqochakunawanchejpaj. Wasipi kashajtiy, noqawan puñuykuyta munaspa yaykuykamorqa, noqatajrí jatunmanta qhaparikorqani.

¹⁵ Paytaj sinch'ita qhaparikusqayta uyarispa, p'achanta makiypi saqerparerqa, chaymantataj jawaman ima jina ayqerikaporqa, nispa.

¹⁶ Chantá chay warmeqa Josejpa p'achanta qosan chayamunankama jallch'arqa.

¹⁷ Qosan chayamojtintaj, kikillantataj willarqa: Chay wata runa hebreota pusamusqaykeqa alqochakuwayta munaspa, cuartoyman yaykuykamorqa.

¹⁸ Noqatajrí jatunmanta tukuy kallpaywan qhaparejtiy, payqa p'achanta saqerparispa, ima jina jawaman ayqerikaporqa.

¹⁹ Ajinata kamachiykeqa noqata ruwawan, nispa. Potifarqa warmin imatachus willasqanta uyarispa, Josepaj maytapuni phiñakorqa.

²⁰ Chantá Joseta jap'ichiytawan, wisq'aykucherqa, maypichus kuraj kamachejpa presochasqankuna kasharqanku, chayman.

²¹ José carcelpi kashajtinpis, Tata Dios paywanpuni karqa, khuyakuspataj, tukuy imapi payta yanaparqa. Chayrayku Joseqa carcelta qhawaj kamachejwanñataj munachikorqa.

²² Chayrayku carcelpi kamachejqa Joseta churarqa carcelpi presokunata qhawananpaj. Ajinapi payqa carcelpi tukuy imachus ruwanamanta yachaj karqa.

²³ Chayrayku carcelmanta cuentayoj runaqa José imatachus ruwashasqanta mana qhawajchu, imaraykuchus Tata Dios Josewan kasqanrayku tukuy ima ruwasqanpi allin rerqa.