Génesis 35 - DIOSPA QHELQACHISQ

Jacobqa Betelman kutipun

¹ Chaymanta Diosqa Jacobta nerqa: Betelman tiyakoj ripuy. Wawqeyki Esaumanta ayqeshajtiyki maypichus noqa rikhurerqayki, chaypi noqapaj uj altarta ruwanki, nispa.

² Chantá Jacob ayllunta, jinataj pikunachus paywan risharqanku, chaykunata nerqa: Jap'ishankichej, chay tukuy imaymana dioskunata wijch'uychej. Jinaspataj, mayllakuychej, llimphu p'achatataj churakuychej.

³ Chantá Betelman risunchej, chaypitaj Diospaj uj altarta ruwasaj, imaraykuchus llakisqa purishajtiy, pay yanapawarqa, jinallataj maymanpis risqaypi payqa noqawanpuni karqa, nispa.

⁴ Jinata Jacob nejtin, ayllonqa tukuy imaymana lantikunata payman jaywarqanku, jinallataj jaluchukunatapis jaywallarqankutaj. Jacobtaj chaykunata Sichem nisqa qayllapi kaj encina sach'a uraman p'ampaykorqa.

⁵ Chantá paykuna chaynejmanta llojsishajtinku, Diosqa muyuyninkupi llajtayojkunaj sonqonkuman manchachikuyta churarqa. Chayrayku Jacobpa churinkunata mana qhatiykorqankuchu.

⁶ Jacobwan, tukuy runankunawan ima Luz sutiyoj llajtaman chayarqanku. Chay llajtaj ujnin sutenqa Betel karqa, chaytaj Canaán jap'iypi kashan.

⁷ Chaypitaj Jacob altarta ruwarqa, chantá chay cheqata “El Betel”, nispa suticharqa. Ajinata chay cheqata suticharqa imaraykuchus wawqen Esaumanta ayqekushajtin, chay cheqanejpi Dios payman rikhurisqa.

⁸ Chantá chaypi kashajtinku, Rebecaj uywaqen Débora wañuporqa. Ayantataj Betel qayllapi, encina sach'a uraman p'amparqanku. Chayrayku Jacob chay sach'ata suticharqa: “Waqarikuna sach'a”, nispa.

⁹ Chaymanta qhepaman Jacob Padán Arammanta kutimushajtin, ujtawan Dios payman rikhurerqa, chantá payta samincharqa.

¹⁰ Nerqataj: Sutiykeqa Jacob. Kunanmantarí manaña jinachu sutiyki kanqa. Aswanpis sutiyki “Israel” kanqa, nispa. Ajinata Dios Jacobta waj sutiwan suticharqa.

¹¹ Chantá Dios Jacobta nillarqataj: Noqaqa Tukuy Atiyniyoj Dios kani. Mirayniyki ashkha kachunku. Qanmanta ashkha runayoj suyukuna rikhurenqanku, jinallataj mirayniykimanta kuraj kamachejkuna sayarenqanku.

¹² Noqaqa Abrahamman, Isaacmanwan qosqay jallp'ata qanman qollaykitaj. Jinataj mirayniykimanpis chay jallp'ata qosaj, nispa.

¹³ Chantá Dios riporqa, maypichus Jacobwan parlarqa, chaynejmanta.

¹⁴ Jacobtaj, maynejpichus Dios paywan parlarqa, chaypi uj rumita oqharispa, sayacherqa. Rumita sayachisqanmantaj vinota jich'aykorqa, chantá aceitewan jawiykorqa.

¹⁵ Jacob chay cheqatataj “Betel” nispa suticharqa.

Raquel wañupun

¹⁶ Chaymantataj Jacobwan, ayllunwan ima Betelmanta purirerqanku. Efrataman chayanankupaj jinaña kashajtinkutaj, Raquel onqokuspa, uj qhari wawata ñak'ayta paqarichikorqa.

¹⁷ Mana paqarichikuyta atispa ñak'arishajtintaj, partera nerqa: Ama manchachikuychu, wawaykeqa qharisitumin, nispa.

¹⁸ Raqueltajrí wañupushaspaña, ñak'ayllataña wawata suticharqa: “Benoní”, nispa. Wawaj tatantajrí “Benjamín”, nispa suticharqa.

¹⁹ Ajinata Raquel wañuporqa. Ayantataj Efrataman rinapi p'amparqanku. Chay cheqajta ujnin sutin “Belén” karqa.

²⁰ Chantá Jacobqa Raquelpa ayan p'ampasqa patapi rumikunata tawqarqa. Chay tawqasqa rumikuna, Raquel maypichus p'ampasqa karqa, chayta rikuchishan.

²¹ Chantá Israel chaymanta ripuspa, Migdal Edarmanta aswan jaqaynejpi toldonta sayacherqa.

²² Uj kutirí chaynejpi Israel tiyakushajtin, kuraj kaj churin Rubén Bilawan puñuykorqa. Bilaqa tatanpa ujnin warmin karqa. Jacobtaj chayta yachaspa, maytapuni phiñakorqa. Jacobpata churinkuna chunka iskayniyoj karqanku.

Jacobpa churinkuna

²³ Leapi Jacobpa kuraj kaj churin Rubén karqa, sullk'ankunataj Simeón, Leví, Judá, Isacar, Zabulón ima karqanku.

²⁴ Raquelwan rejsisqan churinkunataj karqanku Josewan, Benjaminwan ima.

²⁵ Raquelpa kamachin Bilapi churinkuna karqanku Danwan, Neftaliwan ima.

²⁶ Leaj kamachin Zilpapi churinkunataj karqanku Gadwan, Aserwan ima. Chaykuna Jacobpa churinkuna karqanku Padán Arampi kashajtin paqarejkuna.

Isaac wañupun

²⁷ Chantá Jacob tatan Isaacta watukoj Mamreman rerqa. Chay llajtaj ujnin sutenqa Arba, chayrí Hebrón karqa. Chaypi Abrahamwan, churin Isaacwan ima unay tiyakusqanku.

²⁸ Isaacqa 180 watata kawsarqa.

²⁹ Pay allin unayniyoj wañupuspa, ñawpa tatankunaman riporqa. Chantá churin Esauwan, Jacobwan ima payta p'amparqanku.