Génesis 33 - DIOSPA QHELQACHISQ

Jacobwan Esauwan allinyakapunku

¹ Jinata rishaspa, Jacobqa Esauta 400 runakunawan jamushajta rikorqa. Chantá wawankunata Leaman, Raquelman, iskaynin warmi kamachinkunaman ima rak'irarqa.

² Ñawpajta warmi kamachinkunataraj wawankutawankama churarqa. Chaymantataj Leata wawankunatawan, qhepanejmantaj Raquelta, wawan Josetawan churarqa.

³ Jinaytawantaj, Jacob ñawpaykuspa, Esauman chayanankama qanchis kutita pampakama k'umuykorqa.

⁴ Esautajrí phawarispa, Jacobta taripaj rerqa. Chantá ojllaykuspa much'aykorqa. Jinapi iskayninku waqarikorqanku.

⁵ Chaymanta Esauqa Jacobpa warminkunata, wawankunatawan qhawarispa, Jacobta taporqa: Kaykuna pikunataj kankuri? nispa. Jacobtaj nerqa: Kay wawakunaqa Diospa qowasqan wawakuna kanku, nispa.

⁶ Chantá warmi kamachi Bilawan, Zilpawan ima sapa uj wawankuwan Esauman qayllaykuspa, pampakama k'umuykorqanku.

⁷ Qhepantataj Leañataj wawankunantin k'umuykuspa, Esauta napaykorqanku. Qhepa qhepatataj Raquel, Josewan ima qayllaykuspa, kikillantataj Esauta napaykuspa k'umuykorqanku.

⁸ Chantá Esaú Jacobta taporqa: Imata yuyaspataj kay chhika uywata apachimuwankiri? nispa. Jacobtaj nerqa: Sonqoykita llamp'uyachispa, allin sonqowan jap'inawaykipaj apachimorqayki, wiraqochíy, nispa.

⁹ Chantá Esaú nerqa: Mana wawqéy, noqajtaqa tiyapullawan. Qanpata kajqa qanpallata kachun, nispa.

¹⁰ Jacobtajrí nillarqapuni: Sichus cheqapuni sonqoyki noqapaj allin chayqa, ama jina kaspa, imatachus qosusqayta jap'ikullaway. Qanta rikuspaqa, kikin Diostapis rikushayman jina kani, imaraykuchus ima munayta jap'iwanki.

¹¹ Waqeta aparimususqayta jap'ikullaway. Tata Dios yanapawasqanrayku tukuy imayoj kani, manataj imapis pisiwanchu, nispa. Chay jinatapuni Jacob nisqanrayku, Esaú jap'ikorqa.

¹² Chaymantataj Jacobta nerqa: Jina kajtenqa, jakuchej khuska. Noqa ñawpaqeykita risaj, nispa.

¹³ Jacobtajrí nerqa: Wiraqochíy, yachanki jina, wawaykunaqa pisi kallpayojllaraj kanku. Chantapis ovejaykuna, wakaykuna ima juch'uy uñayoj kanku. Sichus anchata purichispa sayk'uchiyman chayqa, uj p'unchayllachari wañurankuman ari.

¹⁴ Chayrayku wiraqochíy, walej kanman ñawpaykunayki. Noqataj pisimanta pisi uywakunajpa, wawakunajpa purisqankuman jina jamullasaj. Chantá Seirpi tinkullasunchej, nispa.

¹⁵ Esautaj nerqa: Jina kajtenqa, noqawan jamoj runakunamanta wakinta saqeykiman yanapasunankupaj, nispa. Jacobtajrí nerqa: Imapaj, ari? Wiraqochíy, noqapaj allin sonqoyki kasqanta rikuniña, nispa.

¹⁶ Chantá Esaú chay p'unchaypacha Seirman kutiporqa.

¹⁷ Jacobtajrí chaymanta Sucotman riporqa. Chantá chaypi wasita ruwakorqa, jinallataj uywankunapaj ch'ujllakunata. Chayrayku Jacob chay cheqanejta “Sucot” sutiwan suticharqa.

¹⁸ Jacobqa Padán Arammanta kutimpuspa, Canaanpi Sichem llajtaman walejllata chayarqa. Chayman chayaspataj, Sichem llajtaj chimpanpi tiyakorqa.

¹⁹ Chay cheqapi uj kuraj runa Jamor sutiyoj karqa, Jacobtaj Jamorpa churinkunamanta uj jallp'ata pachaj qolqewan rantikorqa. Jamorpa ujnin churinpa sutin Sichem karqa. Chantá Jacob rantikusqan jallp'api tiyakunanpaj uj toldota sayacherqa.

²⁰ Jinataj, uj altartapis chaypi ruwallarqataj, suticharqataj: “Diosqa Israelpa Diosnin”, nispa.