Génesis 27 - DIOSPA QHELQACHISQ

Isaacqa churinkunata saminchan

¹ Isaac allin machuña karqa, ñawinpis manaña rikorqachu. Uj kuti kuraj kaj churin Esauta nerqa: Wawáy, nispa. Esautaj kuticherqa: Imata ninki, tatáy? nispa.

² Chantá Isaac nerqa: Wawáy, noqaqa allin machuña kani, jinaqa mayk'ajllapis wañupuyman.

³ Chayrayku arcoykita, flechatawan oqharikuspa, monteman riy, imallatapis jap'ispa apampunawaykipaj.

⁴ Chantá munasqayman jina sumaj mikhunata wayk'uspa, mikhunaypaj apamuway. Noqataj manaraj wañupushaspa, qanta saminchasqayki, nispa.

⁵ Rebecarí uyarisharqa Isaac imatachus Esauman nishasqanta. Chayrayku Esaú tatanpaj imallatapis jap'impunanpaj monteman risqantawankama,

⁶ Rebecaqa churin Jacobta nerqa: Uyarini tataykita Esauman ajinata nishajta:

⁷ Rispa, imallatapis jap'impuway, chantá sumaj mikhuyta wayk'orqapuway. Chantá manaraj wañupushaspa, noqaqa Tata Diospa uyarinanta saminchasqayki, nispa.

⁸ Chayrayku wawáy, imatachus nisqayta sumajta uyariway:

⁹ Kanchaman rispa, chivitukunamanta iskayta sumajnin kajta apamuy. Noqataj chay chivitukunata ñak'aspa, tataykej munasqanman jina sumaj mikhuyta wayk'orqapusaj.

¹⁰ Chantá qan tataykiman chay mikhunata mikhunanpaj jaywamunki, manaraj wañupushaspa qantapuni saminchasunanpaj, nispa.

¹¹ Jacobtajrí maman Rebecata nerqa: Wawqey Esauqa thapulli, noqataj mana.

¹² Sichus tatay llankhariwanqa chayqa, rejsirpariwanqa, yuyanqataj paymanta alqochakushasqayta. Chayraykutaj saminchanawantaqa, maldiciwanman, nispa.

¹³ Mamantaj nerqa: Wawáy, maldicisusqanqa noqaman chayamuwachun. Qanqa nisqayta ruwallay. Usqhayta rispa, iskay chivitukunata apamuy, nispa.

¹⁴ Chantá Jacob usqhay usqhayta kachaykukuspa, iskay chivitukunata aparqamorqa. Rebecataj Isaac munasqanman jina, sumaj mikhuyta wayk'uporqa.

¹⁵ Chaymantataj Rebecaqa Esaúj p'achanmanta sumajnin kajta orqhomuspa, chayta Jacobman churaykorqa.

¹⁶ Chantá Jacobpa makinta, kunkantawan ima cabra qarawan mayt'uykullarqataj, maynejchus q'ara karqa, chaynejta.

¹⁷ Jinaytawantaj, sumaj mikhuy wayk'usqanta, t'antatawan Jacobman jaywarqa.

¹⁸ Chantá Jacobqa, maypichus tatan kasharqa, chayman yaykuspa, nerqa: Tatáy, nispa. Isaactaj nerqa: Jay. Pitaj kanki, wawáy? nispa.

¹⁹ Jacobtaj nerqa: Kuraj kaj churiyki Esaú kani. Imatachus munasqaykita ruwapuykiña. Jatarikuy ari, tiyarikuspataj jap'isqay animalta wayk'usqayta mikhurikuy. Chantá saminchawanki, nispa.

²⁰ Isaactajrí taporqa: Imaynapitaj usqhayllata animalta jap'erqanki, wawáy? nispa. Jacobtaj nerqa: Tata Diosniyki yanapawasqanrayku askamalla animalta jap'erqoni, nispa.

²¹ Isaactaj Jacobta nerqa: Qayllamuway wawáy, cheqapunichus churiy Esaú kasqaykita yachayta munani, nispa.

²² Jacobtaj tatanman qayllaykorqa, tatantaj makinta llankharerqa. Chantá Isaac nerqa: Parlasqanqa Jacobpata, makintajrí Esaujpata, nispa.

²³ Ajinata Isaacqa payta mana rejserqachu, imaraykuchus Jacobpa makenqa kurajnin Esaujta jina thapulli karqa.

²⁴ Chaywanpis Jacobta saminchananpajña kashaspa, Isaac ujtawan tapullarqataj: Cheqapunichu qanqa Esaú waway kanki? nispa. Jacobtaj nerqa: Arí tatáy, Esaupuni kani, nispa.

²⁵ Chaymanta tatanqa Jacobta nerqa: Wawáy, jap'isqaykimanta wayk'usqaykita mikhunaypaj jaywariway, chantá saminchasqayki, nispa. Jacobtaj mikhunata tatanman jaywarqa, vinotapis jaywallarqataj. Isaactaj mikhorqa, ujyarqa ima.

²⁶ Chantá Isaac nerqa: Wawáy qayllaykamuwaspa, much'aykuriway, nispa.

²⁷ Jacob qayllaykuspa much'aykojtin, Isaacqa p'achanpa ima munay q'apayninta muskhirerqa. Jinaspataj, ajinata nispa samincharqa: Arí, kay q'apayqa churiypatamin, Tata Diospa saminchasqan campoj q'apaynin jina.

²⁸ Diosqa janajmanta parachimpusuchun, sumajta poqoj jallp'atataj qosuchun, ashkha trigota, ashkha vinotawan.

²⁹ Tukuy imaymana rijch'aj runakuna kamachiykikuna kachunku. Waj suyukunamanta runakunataj ñawpaqeykipi qonqorikuchunku. Wawqeykikunatapis kamachillankitaj, mamaykej wawankunataj k'umuykamusuchunku. Maldicisojkuna maldicisqa kachunku, saminchasojkunatajrí saminchasqa kachunku, nispa.

³⁰ Jinapi Isaac churin Jacobta saminchayta tukojtinkama, Jacob tatanpa ñawpaqenmanta llojserqa. Jacob llojsejtinkamataj, Esaú jap'ej risqanmanta chayaykamorqa.

³¹ Chantá sumaj mikhuyta wayk'orqoytawan tatanman apaspa, nerqa: Tiyarikuy, tatáy. Animal jap'isqaymanta wayk'usqayta mikhurikuy, saminchanawaykipaj, nispa.

³² Isaactajrí taporqa: Pitaj kankiri? nispa. Esautaj nerqa: Kuraj kaj churiyki Esaú kani, nispa.

³³ Jinata nejta uyarispa, Isaac mayta mancharikorqa, kharkatitispataj, nerqa: Chantá pitaj jap'isqanmanta wayk'uspa apamuwarqari? Manaraj qan apamushawajtiyki, mikhorqaniña. Chayrayku payta saminchaniña, paytaj saminchasqapuni kanqa, nispa.

³⁴ Chantá Esauqa tatanpa nisqanta uyariytawan, jatunmanta qhaparispa, mayta waqarqa: Tatáy, noqatapis saminchallawaytaj ari, nispa.

³⁵ Isaactajrí nerqa: Sullk'ayki jamuspa, q'otiyaykuwan. Qanta saminchasunay karqa, chayta pay jap'inña, nispa.

³⁶ Esautaj nerqa: Chayraykuchá payta: “Jacob”, nispa suticharqankichej. Kaytawanqa iskay kutitaña q'otiyawan. Ñawpajtaqa kuraj kaj churi jina imatachus jap'inayta qhechuwan, kunantaj saminchayniytapis qhechullawantaj. Tatáy, manachu noqatapis saminchariwankiman? nispa.

³⁷ Isaactaj Esauta kuticherqa: Pay qanta kamachisunanta niniña, chantá tukuy aylluyki paypa kamachinkuna kanqanku. Nillanitaj paypaj ashkha trigo, vino ima kananta. Jina chayqa, imatañataj qanman qoykiman, wawáy? nispa.

³⁸ Esaurí tatanta nillarqapuni: Tatáy, ujllachu saminchayniyki karqa? Noqatapis saminchallawaytaj ari, nispa. Esautaj jatunmanta qhaparispa, mayta waqarikorqa.

³⁹ Chantá tatan Isaac nerqa: Qanqa sumajta poqoj jallp'amanta karupi tiyakunki, janajmanta urmamoj paramantapis.

⁴⁰ Chantá espadaykiwan jark'akunki. Wawqeykej kamachin kanki. Chaywanpis aswan qhepanejman allinta kallpacharikuspa, wawqeykej makinmanta kacharichikunki, nispa.

Jacobqa Esaumanta ayqekun

⁴¹ Chaymantapacha Esauqa Jacobta manchayta chejnikorqa, tatan payta saminchasqanmanta, nerqataj: Tatayqa ñapis wañuponqaña. Chaymanta qhepaman sullk'ay Jacobta wañurpachisaj, nispa.

⁴² Rebecarí wawan Esaú imatachus nishasqanta yachaytawan, Jacobta wajyachimuspa, nerqa: Kurajniyki Esaú qanta wañuchisuyta yuyashasqa.

⁴³ Chayrayku wawáy, allinta uyariway: Ayqekuy turay Labanpaman. Payqa Jaranpi tiyakun.

⁴⁴ Chaypi kurajniykej sonqon tiyaykunankama tiyakamuy.

⁴⁵ Imatachus ruwasqaykita qonqasqantaña reparasaj chayqa, kutimpunaykipaj willachimusqayki. Chejninakusqaykichejrayku uj p'unchaylla iskayniykichej wañunaykichejtaqa mana munanichu, nispa.

⁴⁶ Chaymanta Rebecaqa Isaacta nerqa: Esaú kay llajtayoj warmikunawan casarasqanrayku umayta nanachispa sayk'uchiwankuña. Sichus Jacobpis kay llajtayoj warmillawantaj casaranman chayqa, wañupuyllataña munayman. Imapajñataj kawsaymanri? nispa.