Génesis 23 - DIOSPA QHELQACHISQ

Sara wañupun

¹ Saraqa 127 watata kawsarqa.

² Paytaj Quiriat Arbapi wañuporqa. Arbaqa Canaán jap'iypi, Hebrón llajta kashan. Abrahamqa warmin Sara wañupusqanrayku mayta llakikuspa, anchatataj waqarqa.

³ Chantá warminpa ayanpa ladonmanta jatarispa, Abrahamqa Jetpa churinkunata parlapayaj rerqa, nerqataj:

⁴ Noqaqa qankuna ukhupi karu llajtayoj kani. Ama jina kaspa, warmiypa ayanta p'ampakapunaypaj jallp'ata venderiwaychej ari, nispa.

⁵ Jetpa churinkunataj Abrahamta nerqanku:

⁶ Wiraqochi, uyariwayku ari. Noqayku qanta Diospa ajllasqan kasqaykita qhawayku. Chayrayku sumajnin kaj aya p'ampanaykupi warmiykej ayanta p'ampakapuy. Mana pipis nisqaykuchu: Mana, mana nispaqa. Ajinata nispa, Abrahamman kuticherqanku.

⁷ Chantá Abraham sayariytawan, jititakunaman k'umuykuspa, nerqa:

⁸ Cheqatapunichus munankichej kaypi warmiypa ayanta p'ampakapunayta chayqa, ama jina kaspa, Sojarpa churin Efronta kayta niripuwaychej:

⁹ Macpelapi qaqa jusk'uta payman vendey, nispa. Chayqa jallp'an kantupi kashan. Noqataj mashkhachus valesqanta qopusaj, ajinamanta qankuna ukhupi aya p'ampana noqajtapuni kananpaj, nispa.

¹⁰ Efronqa Jet llajtayojkunawan khuska kasharqa. Paytaj llajta masinkuna chantá chay llajtamanta tukuy kurajkunaj uyarinankuta, Abrahamta nerqa:

¹¹ Wiraqochíy, uyariway: Maypichus qaqa jusk'u kashan, chay jallp'ata qhasilla qosqayki, mana vendesqaykichu. Tukuy llajta masiykuna qhasilla qosusqayta yachachunku. Qanqa chayman warmiykej ayanta p'ampakapuyta atinki, nispa.

¹² Abrahamtajrí ujtawan chay llajtayojkunaman k'umuykuspa,

¹³ tukuy uyarishajtinku, Efronta nillarqataj: Ama jina kaspa, uyariway ari. Noqaqa jallp'aj valesqanta pagapusqayki. Qolqeta jap'ikapuy ari, noqataj chayman wañojniyta p'ampakapusaj, nispa.

¹⁴ Efrontaj Abrahamman kuticherqa:

¹⁵ Wiraqochíy, uyarillaway: Jallp'aqa 400 qolqe valen. Mayk'achus valesqanmanta amaña parlanachu. Qanqa chayman warmiykej ayanta p'ampakampullay, nispa.

¹⁶ Chantá Abrahamqa Efronwan parlaspa, mañasqan preciota pagarqa. Jititakuna rikushajtinkutaj, sumaj qolqe metalmanta tawa kilota jina pesarqa.

¹⁷ Ajinata Macpelapi Efronpa jallp'an, qaqapi jusk'u, chantá sach'akuna ima Abrahampa makinman chayarqa. Macpelaqa Mamrej inti llojsimuynejpi karqa.

¹⁸ Chaytaqa Abraham rantikaporqa, rantikapusqanmantataj jititakuna chantá llajtamanta kurajkuna ima testigo karqanku.

¹⁹ Chaymanta Abrahamqa Macpelapi aya p'ampanaman Saraj ayanta p'ampakaporqa. Chayqa Mamrej inti llojsimuyninnejpi kashan. Chay cheqaqa Canaán jap'iypi, Hebrón sutiwan rejsisqa karqa.

²⁰ Ajinata Abrahamqa chay jallp'amanta dueño karqa, chhankapi aya p'ampanamanta ima, mayqentachus jititakuna aya p'ampanapaj vendesqanku, chaymanta.