Génesis 17 - DIOSPA QHELQACHISQ

Dios Abramwan trato ruwasqanmanta señal

¹ Abram jisq'on chunka jisq'onniyoj watayoj kashajtin, Tata Dios payman rikhurispa, nerqa: Noqa Tukuy Atiyniyoj Dios kani. Chayrayku qan munasqayman jina cheqanta puriy.

² Noqa qanwan uj tratota ruwasaj, mirayniykitaj may chhikapuni kanqa, nispa.

³ Chantá Abram pampakama k'umuykorqa. Diostaj payta nillarqataj:

⁴ Qanwan trato ruwasqayqa ajina kanqa: Qanmanta ashkha suyukuna rikhurenqanku.

⁵ Jinataj sutiykeqa manaña Abramchu kanqa. Manachayqa kunanmanta qan Abraham sutiyoj kanki, imaraykuchus ashkha runaj tatanku kanaykipaj churasqayki.

⁶ Mirayniykeqa may chhikapuni kanqanku. Suyukuna, chantá kuraj kamachejkuna ima qanmanta rikhurenqanku.

⁷ Qanwan kay ruwasqay trato, jinataj qhepanejman qanmanta mirajkunawan trato ruwasqaypis wiñay wiñaypaj kanqa. Noqaqa qanpa Diosniyki wiñaypaj kasaj, jinallataj paykunajtapis.

⁸ Qanman, mirayniykimanwan, maypichus tiyakushanki, chay tukuy Canaán jap'iyta qosqaykichej wiñaypaj chayaqeykichej kananpaj. Noqataj wiñaypaj Diosniyki kasaj, nispa.

⁹ Chay jawa Diosqa Abrahamman nillarqataj: Qan trato ruwasqayta junt'ay, jinataj wawaykikuna, allchhiykikunapis junt'achunku.

¹⁰ Kaymin qanwan, mirayniykiwan ima trato ruwasqayqa, chaytataj tukuyniykichej junt'anaykichej tiyan: Qankuna ukhupi tukuy qhari circuncidasqa kananku tiyan.

¹¹ Qankunaqa phichiluykichejpi qaritanta khuchuspa, orqhonkichej. Chaymin qankunawan trato ruwasqaymanta señal kanqa.

¹² Kunanmanta qhepaman tukuy qhari wawakuna paqarisqankumanta pusaj p'unchayninman circuncidasqa kanqanku. Jinallataj wasiykichejpi paqarejkuna, rantikusqaykichej wata runaj qhari wawan, waj llajtayojkunaj qhari wawanpis circuncidasqallataj kanqanku.

¹³ Wasiykichejpi paqarejkuna, rantisqaykichej wata runaj qhari wawanpis tukuypuni circuncidasqa kanqanku. Ajinata wiñaypaj trato ruwasqayqa ukhuykichejpi señalasqa kanqa.

¹⁴ Pichus mana circuncidasqa kajrí, qankuna ukhumanta wijch'usqa kanqa, trato ruwasqayta mana kasusqanrayku, nispa.

¹⁵ Chantá Diosqa Abrahamta nillarqataj: Saraí warmiykipis manallataj ajina sutiyojchu kanqa. Manachayqa kunanmantapacha “Sara” sutin kanqa.

¹⁶ Noqataj paytapis saminchasaj, jinataj paypipuni wawayki kanqa. Arí, payta saminchasaj, Saraj mirayninmantataj suyukuna rikhurenqanku, kuraj kamachejkuna ima, nispa.

¹⁷ Ajinata Diospa nisqanta uyarispa, Abraham pampakama k'umuykorqa, chantá asirikuspa, sonqonpi nerqa: Pachaj watayoj runa wawayoj kayta atinmanrajchu? Saraqa jisq'on chunka watayojña kashaspapis, wawayojrajchu kanmanri? nispa.

¹⁸ Chayrayku Abrahamqa Diosta nerqa: Walej kanman nisqaykita waway Ismaelwan junt'anayki, nispa.

¹⁹ Diostajrí kuticherqa: Cheqapuni qanqa warmiyki Sarapi wawata rejsinki. Chay wawatataj “Isaac” sutiwan sutichanki. Noqataj paywan wiñaypaj tratota ruwasaj, jinallataj mirayninwanpis.

²⁰ Wawayki Ismaelmanta niwasqaykitapis uyariyki, paytapis yanapasaj. Paypis ashkha wawayoj kanqa, noqataj miraynintapis ashkhayachisaj. Ismaelqa chunka iskayniyoj kurajkunaj tatanku kanqa, jinallataj paymanta ashkha runayoj jatun suyuta ruwasaj.

²¹ Chaywanpis tratoytaqa Isaacwanpuni ruwasaj. Chayrayku kunanmanta wataman jina warmiyki Sara qanpaj wawayoj kanqa, nispa.

²² Chantá Diosqa Abrahamwan parlayta tukuytawan, chaymanta riporqa.

²³ Chay p'unchaypacha Abraham churin Ismaelta circuncidarqa, jinallataj wasinpi paqarej kamachinkunata. Rantisqan kamachinkunatapis circuncidallarqataj. Jinallataj Diospa kamachisqanman jina wasinpi tukuynin qhari kamachinkunata circuncidallarqataj.

²⁴ Maypachachus Abraham phichilunpa qaranta khuchorqa chaypacha, jisq'on chunka jisq'onniyoj watayoj karqa.

²⁵ Churin Ismaeltaj circuncidasqa kashaspa, chunka kinsayoj watayoj karqa.

²⁶ Abrahamwan, churin Ismaelwan ima uj p'unchaylla circuncidasqa karqanku.

²⁷ Jinallataj Abramwan khuska wasinpi tiyakojkuna, wasinpi paqarej kamachinkuna, waj llajtayojkunamanta rantikusqan kamachinkuna ima chaypachallataj circuncidasqa karqanku.