Génesis 16 - DIOSPA QHELQACHISQ

Ismaelpa paqarikusqan

¹ Abrampa warmin Saraiqa mana wawayoj kayta aterqachu. Jinapis Saraijta Egipto llajtayoj uj warmi wata runan tiyaporqa. Chay warmej sutintaj Agar karqa.

² Chantá Saraiqa Abramta nerqa: Yachanki jina, Tata Dios wawa rejsinayta mana munasqanta. Chayrayku kamachiy Agarwan puñuykuy ari. Ichapis paynejta wawayoj kayta atiyman, nispa. Abramtaj warminpa nisqanta kasorqa.

³ Chantá Saraiqa Egipto llajtayoj kamachin Agarta wajyaspa, Abramman qorqa ujnin warmin kananpaj. Chaykama Canaán suyupi chunka watataña tiyakusharqanku.

⁴ Abramqa Agarwan puñuykorqa, paytaj onqoj rikhurerqa. Onqoj kashasqanta yachakuspataj, Agarqa Saraita pisipaj qhawayta qallarerqa.

⁵ Jinapi Saraiqa Abramta nerqa: Agar pisipaj qhawanawanpajqa qanmin juchayoj kanki. Noqaqa payta qanman jaywarqayki warmiyki kananpaj. Kunantajrí wawayoj kananta yachaspa, noqamanta aswan kasqanta yuyakushan. Chayrayku Tata Dios nichun, qanchus chayrí noqachus juchayoj kasqanchejta, nispa.

⁶ Abramtaj kuticherqa: Kamachiykeqa makiykipi kashan, paywan munasqaykita ruwayta atinki, nispa. Chantá Saraiqa Agarta allintapuni k'umuykachachiyta qallarerqa. Agartajrí ayqerikaporqa.

⁷ Chantá Tata Diospa angelnin Agarta tariparqa Shur nisqa ch'innejpi, Egiptoman rina ñan patapi kaj yaku pujyu qayllapi.

⁸ Taporqataj: Agar, Saraipa kamachin, maymantataj jamushankiri? Chantá maymantaj rishankiri? nispa. Agartaj nerqa: Noqaqa patronay Saraimanta ayqekushani, nispa.

⁹ Chantá Tata Diospa angelnin nerqa: Kutipuy patronaykejpaman, imatachá kamachisunki, chayta ruwaspa, nispa.

¹⁰ Chaymantataj chay angelqa Agarta nillarqataj: Noqa mirayniykita ashkhayachisaj, nitaj pipis yupayta atenqachu.

¹¹ Qanqa wijsayoj kashanki. Jinataj uj qhari wawata onqokunki, paytataj sutichanki “Ismael” sutiwan, imaraykuchus Tata Dios llakiywan waqasqaykita uyarisunki.

¹² Wawaykeqa k'ita caballo jina kanqa. Pay tukuywan maqanakonqa, paywanpis tukuy maqanakonqanku. Tukuy wawqenkuna payta chejnikushajtinkupis, paykunaj qayllankupi tiyakonqa, nispa.

¹³ Chantá Agarqa Dios paywan parlasqanrayku paymanta nerqa: Payqa Rikuwaj Dios. Noqaqa rikuwaj Diosta rikorqani, chaywanpis kawsashaniraj, nispa.

¹⁴ Chayrayku chay pujyutapis sutichallarqataj: “Rikuwaj kawsaj Diospa pujyun”, nisqa. Chay pujyoqa Cadeswan Beredwan ima tinkuypi kashan.

¹⁵ Chantá Agarqa patronanpaman kuterqa. Aswan qhepanejmantaj Abrampaj wawayoj karqa, jinataj wawanta “Ismael”, nispa suticharqa.

¹⁶ Abramqa pusaj chunka sojtayoj watayoj karqa Agar churin Ismaelta paqarikushajtin.