Génesis 14 - DIOSPA QHELQACHISQ

Abramqa Lotta kacharichin

¹ Chaypacha Amrafelqa Babilonia suyupi kuraj kamachej karqa, Arioctaj Elasar suyuta, Quedorlaomertaj Elam suyuta, Tidaltaj Goyín suyuta kamacherqa.

² Paykuna tantaykukuspataj, Sodomapi kuraj kamachej Beraj contranta, Gomorrapi kuraj kamachej Birsaj contranta, Admapi kuraj kamachej Sinabpa contranta, Zeboyinpi kuraj kamachej Semeberpa contranta, chantá Soarpi kuraj kamachejpa contranta ima maqanakorqanku.

³ Chay phishqantin kuraj kamachejkunaqa Sidín vallepi soldadonkukunata tantaykorqanku, maypichus kunan Wañusqa Qocha nisqa kashan, chaypi.

⁴ Paykuna chunka iskayniyoj watataña Quedorlaomer sutiyoj kuraj kamachejpa makinpi kasqanku. Chunka kinsayoj kaj watapitajrí phishqantin kuraj kamachejkuna Quedorlaomerpa contranta oqharikusqanku.

⁵ Qhepan watapi kuraj kamachej Quedorlaomer, pikunachus paywan kasharqanku chaykunapiwan ima Astarot Carnayinman rispa, Refayinpi tiyakojkunata maqanakuspa atiparqanku. Chaymantataj Jam cheqapi Zuz suyumanta kajkunata atiparqanku, Savé Quiriatayin cheqapitaj Em suyumanta kajkunata atiparqanku.

⁶ Seir nisqa orqokunapipis Hor suyumanta kajkunata atiparqanku, paykunatataj Parán pampakama qhatiykorqanku. Chaynejqa ch'innej qayllapi kashan.

⁷ Quedorlaomerqa, pikunachus paywan kasharqanku, chaykunawan kutimushaspa, Enmispatman chayarqanku. Chay cheqajta ujnin sutin Cadés karqa. Chantá Amalec llajtayojkunaj jap'iyninkupi tarisqanku chhikata, tukuyninta tukucherqanku. Jinallataj Jasesón Tamarpi tiyakoj amorreokunatapis wañucherqanku.

⁸ Chantá phishqantin kuraj kamachejkuna ujchakuspa, maqanakoj llojserqanku. Paykuna Sodomata, Gomorrata, Admata, Zeboyinta chantá Soarta ima kamacherqanku. Paykunataj Sidín vallepi chay waj tawa kuraj kamachejkunaj contrankuta maqanakorqanku:

⁹ Quedorlaomerpa contranta, Tidalpa, Amrafelpa chantá Ariocpa contranta ima. Paykunaqa Elammanta, Goyinmanta, Sinarmanta, chantá Elasarmantawan ima kuraj kamachejkuna karqanku.

¹⁰ Chaypacha Sidín vallepi ashkha pujyukuna breawan junt'a karqa. Chantá Sodomata kuraj kamachej, jinataj Gomorrata kuraj kamachej ima maqanakupi atipaykuchikorqanku. Chaymanta ayqeshaspataj, soldadonkukunaqa breayoj pujyukunaman urmaykorqanku, wakin soldadokunataj orqokunaman ayqekorqanku.

¹¹ Chantá maqanakupi atipajkunaqa Sodomamanta, Gomorramanta ima valorniyoj kaj chhikata, mikhunata ima apakaporqanku, jinaspataj chaymanta riporqanku.

¹² Abrampa sobrinon Lottapis jap'ispa aparqanku, jinallataj imanchá tiyaporqa, chaytapis, imaraykuchus Lot chaypacha Sodomapi tiyakusharqa.

¹³ Chantá uj runa maqanakumanta ayqemuspa, imachus pasasqanta hebreo nisqa Abramman willarqa. Chaypacha Abramqa Mamrej encina sach'arara qayllanpi tiyakusharqa. Mamreqa amorreo llajtayoj karqa, jinataj Escolpata, Anerpatawan wawqenku, paykunataj Abramman sayasqa karqanku.

¹⁴ Abramrí sobrinon preso kasqanta yachaspa, wasinpi paqarej kamachinkunata tantarqa. Tukuyninpi 318 qharikuna karqanku. Chantá Abramwan, kamachinkunawan ima tawantin kuraj kamachejkunata Dan llajtakama qhatiykorqanku.

¹⁵ Chantá tutayaykojtin, Abramwan, chantá kamachinkunawan ima kuraj kamachejkunata muyuykuspa, ujllata maqanakoj yaykuykorqanku. Atipaykuspataj, paykunata Hobakama qhatiykorqanku. Hobaqa Damasco llajtamanta wichaynejpi kashan.

¹⁶ Paykunata atipaykuspataj, tukuy ima apasqankuta qhechorqanku. Ajinata Abramqa Lot sobrinonta, chantá imanchá tiyaporqa, chaytawan qhechukamporqa. Jinallataj warmikunata, chay waj runakunatawan ima kacharicherqa.

Melquisedecwan Abramwan

¹⁷ Abram Quedorlaomerta, jinallataj paywan khuska kaj kuraj kamachejkunatapis atipasqanmanta kutimushajtin, Sodoma llajtata kuraj kamachej Savé valleman payta taripaj rerqa. Chaynejqa Kuraj Kamachejpa vallen nisqa karqa.

¹⁸ Jinapi Salemmanta kuraj kamachej Melquisedec t'antata, vinotawan ima Abramman aparqa. Melquisedecqa Patapi Kaj Diospa sacerdoten karqa.

¹⁹ Chantá pay Abramta kay jinata samincharqa: Patapi Kaj Dios saminchasuchun, pichus janajta, kay pachatawan ruwaj, chay.

²⁰ Patapi Kaj Dios yupaychasqa kachun, pichus awqaykikunata atipachisorqa, chay, nispa. Chantá Abramqa tukuy imatachus qhechusqanmanta, sapa chunkamanta ujta Melquisedecman qorqa.

²¹ Chaymanta Sodomata kuraj kamachejrí Abramta nerqa: Chay qhechusqayki runakunallata kutichipuway. Chay waj imakunatatajrí jap'ikapullay, nispa.

²² Abramtajrí Sodomata kuraj kamachejman ajinata kuticherqa: Noqaqa chhika kaj Patapi Kaj Tata Diosman tiluspa niniña, pichus janajta, kay pachatawan ruwajman:

²³ Qanpata kajmanta ni imata jap'ikusajchu, ni q'aytullatapis, ni juk'uta watanallatapis, ama ninaykipaj: Noqaj tiyapuwasqanwan Abram qhapajyan, nispa.

²⁴ Noqapajqa mana imatapis munanichu. Runaykuna imatachus mikhorqanku, chayllata kutichipuway. Pikunachus riysiwajkuna, Aner, Escol, chantá Mamré ima, paykunapis imachus paykunaman chayajta jap'ikapuchunku, nispa.