Génesis 13 - DIOSPA QHELQACHISQ

Abramwan Lotwan karunchakapunku

¹ Abramqa Egiptomanta ripuspa, warminwan, chantá tukuy imanwan Néguev nisqa ch'innejman kutiporqa. Lot sobrinonpis paykunawan khuska rillarqataj.

² Abramqa manchay qhapaj karqa, ashkha uywayoj, qolqeyoj, qoriyoj ima.

³ Chantá Neguevmanta alliymanta alliy thaskispa, Betel llajtaman kutiporqa. Chaymantataj maypichus ñawpajta toldonta sayachisqa Betelwan, Haiwan tinkuypi, chaynejman chayarqa.

⁴ Chay karqa, maypichus pay ñawpajta altarta ruwasqa, chay. Chantá Abrahamqa ujtawan chaypi Tata Diospa sutinta oqharispa yupaycharqa.

⁵ Lotpis tion Abram jina qhapajllataj karqa. Tiyaporqa ashkha ovejan, wakan, toldon ima.

⁶ Paykuna maypichus kasharqanku, chaynejqa chay chhika uywankupaj ancha pisi karqa. Jinaqa khuskallapuni tiyakuyta mana aterqankuñachu.

⁷ Chayrayku Abrampa uywanta michejkuna, chantá Lotpa uywanta michejkunawan ima mayta churanakuspa, maqanakorqanku. Chaypacha chay cheqanejpi cananeokuna, ferezeokuna ima tiyakushallarqankutaj.

⁸ Jina kajtenqa, Abram Lotta nerqa: Qanwan noqawanqa ayllu masintin kanchej. Chayrayku noqanchejpura mana phiñanakuyta atisunmanchu, nitaj michejninchejkunapis phiñanakuyta atillankutajchu.

⁹ Qhaway, jallp'aqa ajllakunaykipaj jina may chhikan kashan. Ama jina kaspa, noqamanta karunchakuy. Sichus qan lloq'eman rinki chayqa, noqa pañanejman ripusaj. Qantajchus pañanejman rinki chayqa, noqa lloq'enejman ripusaj, nispa.

¹⁰ Chantá Lotqa tukuynejta qhawarqa, astawanqa Jordán mayu valleta Soar juch'uy llajtakama. Chay jallp'aqa yakuyoj karqa, Tata Diospa huertan jina sumaj, Egiptopi jallp'aman rijch'akojtaj. Chay karqa, manaraj Tata Dios Sodoma llajtata, Gomorra llajtatawan chinkachishajtin.

¹¹ Chantá Lotqa Jordán valleta ajllakorqa. Jinaspataj, maypichus kasharqanku, chaymanta inti llojsimuynejman riporqa. Ajinata Abramwan Lotwan karunchanakorqanku.

¹² Ajinaqa Abram Canaán cheqanejpi tiyakoj qhepakorqa. Lottaj vallepi kaj llajtakunaman tiyakoj riporqa, Sodoma llajta qayllapitaj toldonta sayacherqa.

¹³ Sodoma llajtayojkunarí millay runakuna kasqankurayku, Tata Diospa contranpi millayta ruwaspa, anchata juchallerqanku.

¹⁴ Lot ripusqanmanta qhepaman Tata Diosqa Abramta nerqa: Maypichus kashanki, chaymanta wichaynejta, uranejta, inti llojsimuynejta, chantá inti yaykuynejta ima allinta qhaway.

¹⁵ Noqaqa tukuy rikusqayki jallp'ata qosqayki. Chay jallp'ataj qanpaj, jinataj mirayniykipajpis wiñaypaj kanqa.

¹⁶ Mirayniykita t'iyuta jina mirachisaj. T'iyoqa mana yupay atina, ajinallataj mirayniykeqa mana yupay atina kanqa.

¹⁷ Qan purispa, wichaynejta uranejta kay jallp'ata muyumuy, imaraykuchus noqa kay jallp'ata qanman qosqayki, nispa.

¹⁸ Chantá Abramqa toldonta phaskaspa, tiyakoj riporqa, Hebrón llajta qayllapi maypichus Mamré sutiyoj runajta encina sach'an karqa, chaynejman. Chaypipis uj altarta Tata Diospaj ruwallarqataj.