Gálatas 6 - DIOSPA QHELQACHISQ

Puraj yanapanakunachej

¹ Wawqe panakuna, sichus pitapis juchallisqanta reparankichej chayqa, qankuna Santo Espirituta kasuspa purejkuna llamp'u sonqowan payta yanapaychej cheqan ñanman kutirinanpaj. Chaywanpis allinta qhawarikuychej, ama pay jinallataj juchallishanaykichejpaj.

² Ima mana allin rikhurejtinpis, purajmanta yanapanakuychej, imaraykuchus ajinata ruwaspa, Cristoj kamachisqanta junt'ashankichej.

³ Sichus ujkunata yanapanaykipaj aswan kasqaykita yuyakunki chayqa, qan kikiykita q'otiyakushanki.

⁴ Ajinaqa sapa uj imaynatachus ruwasqanta allinta qhawakuchun. Sichus ruwasqan allin chayqa, chaymanta sonqo junt'asqa kanqa. Chaywanpis ama wajkunawanqa kikinchakuchunchu,

⁵ imajtinchus sapa ujpis imatachus ruwasqanmanta cuentayoj kanqa.

⁶ Pichus Diospa simi nisqanmanta yachachisqa kajqa tukuy ima allin kajta jap'isqanmanta yachachejninman jaywarichun.

⁷ Ama qankuna kikiykichej q'otiyakuychejchu. Dioswanqa mana pipis pujllakunmanchu, imaraykuchus imatachus tarpunchej, chayllatataj oqharisunchej.

⁸ Pichus juchallinaman aysaj sonqonpa munasqanta ruwaspa purejqa chay ruwasqanmanta wiñaypaj wañuyllata tarenqa. Pichus Santo Espíritoj munasqanta ruwaspa purejrí, Santo Espiritumanta wiñay kawsayta jap'enqa.

⁹ Chayrayku allin kajta ruwaspa, ama sayk'unachu, imaraykuchus mana sayk'uspa ruwallasunchejpuni chayqa, maychus tiemponpi Dios t'inkata qowasunchej.

¹⁰ Chayrayku atikushajtenqa, tukuypaj allinta ruwana, astawanqa Jesucristota qhatikoj masinchejkunapaj.

Pablo k'amin, napaykun ima

¹¹ Kikin makiywan kay chhikachaj letrawan qhelqamusqayta allinta qhawaychej.

¹² Runaj ñawpaqenpi allinpi rikhuriyta munajkunaqa qankunata munajta mana munajta circuncidachiyta munasunkichej, ama paykuna Cristoj cruzninrayku qhatiykachasqa kanankupaj.

¹³ Circuncidasqa kajkunapis Moisespa kamachisqanta tukuyninta mana junt'ayta atinkuchu. Chaywanpis circuncidachikunaykichejta munanku, chayta ruwachisusqaykichejmanta paykuna jatunchakunankupaj.

¹⁴ Noqarí Tukuyta Kamachej Jesucristo cruzpi wañusqallanmanta jatunchakuni. Ajinamanta Diosman mana kutirikojkuna imatachus aswanpaj qhawanku, chaypaj wañuni Cristoj wañusqannejta. Jinallataj runa imatachus noqamanta yuyasqan mana jamuwanchu nitaj riwanchu. Paykunapajpis wañusqa jinallataj kani.

¹⁵ Chayrayku circuncidasqa kana, chayrí mana circuncidasqa kana yanqhalla. Manachayqa mosoj runaman tukuchisqa kaymin aswanqa.

¹⁶ Jinapi noqa nini: Kay kamachisqaman jina tukuy purejkunamanqa sonqo tiyaykuy, khuyakuytaj kachun, pikunachus cheqapuni Diospa ayllun kanku, chaykunaman, nispa.

¹⁷ Kunanmanta ñawpajmanqa amaña pipis umayta nanachiwachunchu, imaraykuchus Jesuspata kasqayrayku ñak'arisqaymanta ukhuypi t'iriy tiyan.

¹⁸ Wawqe panakuna, Tukuyta Kamachej Jesucristonchejpa qhasilla k'acha yanapaynin qankunawan kachun. Ajina kachun.