Gálatas 4 - DIOSPA QHELQACHISQ

Diospa wawanña kanchej

¹ Chantá nillasunmantaj: Chayaqeta jap'ej wawa wawallaraj kashaspa, wata runamanta mana waj jinachu, tukuy imamanta dueño kashaspapis.

² Manachayqa payqa uywajkunaj makinkupi kanan tiyan, tatanpa nisqan p'unchaykama.

³ Ajinallataj noqanchejwan karqa manaraj Cristo jamushajtin. Noqanchej wawa jinallaraj kashaspa, Diosman churanakojkunaj yuyasqankuman jina purej kanchej, jinataj chay jina yuyanaj wata runan karqanchej.

⁴ Chantá señalasqan p'unchay chayamojtin, Diosqa Churinta kachamorqa. Payqa uj warmimanta paqarerqa, jinataj Moisespa kamachisqankunata kasuspa kawsarqa.

⁵ Dios Churinta kachamorqa, Moisespa kamachisqankunaj wata runan kashajtinchej pay kawsayninwan pagaspa kacharichinawanchejpaj. Ajinata ruwarqa tukuyninchej paypa wawanpaj rejsikapusqan kananchejpaj.

⁶ Wawanña kajtinchejtaj, Diosqa Churinpa Espiritunta noqanchejpi tiyakunanpaj kachamorqa, paytaj Diosta niyta yanapawanchej: Tatáy, Tatitáy, nispa.

⁷ Ajinaqa manaña wata runachu kankichej, aswanpis Diospa wawankunaña. Diospa wawanña kasqaykichejraykutaj, payqa chayaqeta jap'ejkunata ruwasunkichej.

Wata runa jina kanaman mana kutirinachu

⁸ Ñawpajta qankuna manaraj Diosta rejserqankichejchu. Chaypachataj mana dioschu kanku, chaykunaj wata runan karqankichej.

⁹ Kunantajrí Diosta rejsinkichejña, chayrí Diospa rejsikapusqan kankichej. Chayrayku mana yachayta atinichu imaraykuchus Diosman churanakojkunaj yuyasqankuman jina purinapi wata runa jina watej kayta munasqaykichejta. Chay runakunaj yuyasqankoqa runata yanapananpaj mana atiyniyojchu, nitaj imapajpis valenchu.

¹⁰ Qankuna jatun p'unchaykunata, mosoj killa raymita, waj raymikuna ruwanata, chantá wata qallariy raymita ima maypaj qhawaspa ruwashankichejraj.

¹¹ Llakikuni yuyaspa qankunata yanapanaypaj tukuy ruwasqay qhasipajsina kananta.

¹² Wawqe panakuna, mañarikuykichej noqa jina kanaykichejta. Amaña yuyaychejchu Dioswan allinpi kanapaj kamachisqata junt'ana kasqanta. Ñawpajta qankuna mana chaykunata junt'arqankichejchu, noqataj chaypacha qankuna jinaman tukorqani. Qallariymantapacha qankuna noqata mana ima mana allintapis ruwawarqankichejchu.

¹³ Qankuna yuyarikunkichej: Noqa onqoykuspa Galaciaman rerqani, chaypachataj Jesusmanta sumaj willayta qankunaman willarqani.

¹⁴ Ajina onqosqa kashajtiypis, qankuna mana pisipajchu qhawawarqankichej, nitaj wijch'uwarqankichejchu. Aswanpis Diospa angelninta jina wajyarikuwarqankichej, chayrí Cristo Jesuspis kayman karqa, jinata.

¹⁵ Maytaj kunan chay jina kusikuyniykichejri? Kayta allinta yachani: Chaypacha qankuna atiwajchejchus karqa chayqa, ñawiykichejtapis orqhokuspa, qowankichejman karqa.

¹⁶ Kunanrí qankunaman cheqa kajta nisqayrayku awqaykichejmanchu tukupuni?

¹⁷ Chay mana cheqanta yachachejkuna sonqoykichejta suwayta mayta munanku, imatachus yuyasqankurí mana allinchu. Aswanpis paykunaqa noqaykumanta qankunata karunchachiyta munasunkichej paykunaman k'askapunaykichejpaj.

¹⁸ Sichus pipis qankunarayku allin kajta ruwayta munan chayqa, walejlla. Chaywanpis chayqa tukuy tiempo kanan tiyan, manataj noqa chaypi kashajtillaychu.

¹⁹ Munasqa wawaykuna, onqokoj warmi jina ujtawan nanaywan ñak'arishani, Cristo imaynachus kasqan qankunapi ruwasqa kanankama.

²⁰ Kunanpacha qankunawan kayta munayman, waj jinamanta qankunawan parlanaypaj, imaraykuchus qankunamanta imatachus yuyanayta mana yachanichu.

Saramanta, Agarmantawan rijch'anachina

²¹ Niwaychej, qankuna Moisespa kamachisqankunata kasuyta munajkuna: Kamachisqakuna imatachus nisqanta yachankichejchu?

²² Diospa Qhelqachisqanpi nin Abrahampata iskay churinkuna kasqankuta, ujnenqa wata runan Agarpi, ujnintaj warmin Sarapi.

²³ Wata runa warminpi kajqa runaj munasqanman jina paqarerqa. Warminpi kajtajrí Diospa nisqanman jina paqarerqa.

²⁴ Chayqa uj rijch'anachina. Chay iskay warmikuna iskay tratowan ninakunku. Uj tratoqa Sinaí orqopi ruwasqa karqa, chaytaj Agarwan ninakun. Chay orqopi israelitakunaqa Diospa kamachisqanta jap'erqanku, chaytaj paykunata wata runaman tukucherqa.

²⁵ Agarqa Sinaí orqowan ninakun, Arabiapi kashan, chaywan. Chay orqotaj ninakullantaj kay tiempomanta Jerusalenwan, imaraykuchus Jerusalenqa, wawankuna ima kamachisqakunaj wata runan kanku.

²⁶ Sararí patapi kaj Jerusalenwan ninakun, chaytaj mana wata runachu. Noqanchejtaj paypa wawankuna kanchej.

²⁷ Diospa Qhelqachisqanpi nin: Kusikuy, mana wawata rejsej warmi. Jatunmanta qhaparispa kusikuy, onqokoj warmej nanayninta mana rejsej, imaraykuchus saqerpayasqa warmeqa aswan ashkha wawayoj qosayoj warmimanta nisqaqa, nispa.

²⁸ Ajinaqa wawqe panakuna, qankuna Isaac jina, Diospa nisqanman jina wawakuna kankichej.

²⁹ Chaypacha runaj munasqanman jina paqarejqa Santo Espíritoj munasqanman jina paqarejta qhatiykacharqa. Kunanpis jinallataj.

³⁰ Chaywanpis Diospa Qhelqachisqanpi, ima nintajri? Ajinata nin: Wata runa warmita, churintawan ima qharqoy, imaraykuchus wata runa warmej churenqa mana chayaqeta jap'enqachu mana wata runa kaj warmej churinwan khuska, nispa.

³¹ Ajinaqa, wawqe panakuna, noqanchej mana chay wata runa warmej wawankunachu kanchej, manachayqa mana wata runachu karqa, chay warmejpata.