Gálatas 1 - DIOSPA QHELQACHISQ

Pablo napaykun

¹ Noqa Pablo Jesuspa kuraj kachan kani, mana runaj churasqanchu nitaj wajkunaj kachasqanchu. Manachayqa Jesucristoj churasqan kani, Tata Diospatawan, pichus Cristota wañusqamanta kawsaricherqa, chaypata.

² Noqawan kashaj tukuy wawqe panakunapis Galaciapi kaj iglesiakunaman napaykamuyku.

³ Tata Diosninchej, chantá Tukuyta Kamachej Jesucristo qhasilla k'acha yanapayninkuta, jinataj sonqo tiyaykuyninkuta ima qankunaman qosuchunku.

⁴ Jesucristomin Tata Diosninchejpa munasqanman jina juchanchejrayku wañuchisqa kananpaj jaywaykukorqa, kay pachapi millay kawsaymanta kacharichinawanchejpaj.

⁵ Diosqa wiñay wiñaynintinpaj jatunchasqa kachun. Ajina kachun.

Mana waj sumaj willay kanchu

⁶ Noqa t'ukuni chay jina usqhayta Diosmanta karunchakusqaykichejta yachaspa, pichus Cristoj khuyakuyninrayku wajyasorqachej, chaymanta, waj jina sumaj willayta qhatinaykichejpaj.

⁷ Cristomanta jawaqa waj sumaj willay manamin kanchu. Manachayqa wakinkuna qankunaj umaykichejta muyuchiyta munaspa, Cristoj sumaj willayninta q'ewinku.

⁸ Chaywanpis noqaykuchus, chayrí janaj pachamanta angelchus chay sumaj willayta willasqaykumantaña waj jinata willasunkichejman chayqa, maldicisqa kachun.

⁹ Ñawpajta nerqaniña, kunanpis ujtawan nillaykichejtaj: Sichus pillapis chay sumaj willayta jap'ikusqaykichejmanta waj jina sumaj willayta willasunkichejman chayqa, maldicisqapuni kachun, nispa.

¹⁰ Noqaqa mana runaman allin rijch'aytachu mask'ashani, manachayqa Diosman allin rijch'ayta. Sichus noqa runaman allin rijch'ayta munayman chayqa, mana Cristoj kamachinchu kayman.

Pablo Jesucristomantapuni willan

¹¹ Munasqa wawqe panakuna, yachaychej noqaj willasqay sumaj willayqa mana runaj wakichisqanchu kasqanta.

¹² Noqaqa mana pi runamantachu chay sumaj willayta jap'erqani, nitaj pipis yachachiwarqachu, manachayqa kikin Jesucristomin noqaman chay sumaj willaymanta sut'inchawarqa.

¹³ Qankuna uyarerqankichej, imaynatachus ñawpajta judiokunaj yachachisqankuta qhatishaspa, Diospa Iglesianta chinkachiyta munasqayta. Chayraykutaj ancha kallpawan paykunata qhatiykacharqani.

¹⁴ Chaypacha noqa mita masiykunata atiparqani ñawpa tataykukunaj yachachisqanku usuta tukuy sonqo junt'ayta munaspa.

¹⁵ Chaywanpis manaraj paqarishajtiy, Dios ajllakuwarqa, jinallataj qhasilla k'acha yanapayninrayku wajyakuwarqa.

¹⁶ Diosqa Churinta rejsichiwayta munarqa, mana judiokuna ukhupi paymanta willanaypaj. Ajina kajtin, noqaqa mana pipis yuyaychanawanta mask'arqanichu.

¹⁷ Manallataj Jerusalenman rerqanichu, pikunachus noqamanta aswan ñawpajta Jesuspa kuraj kachankuna karqanku, chaykunawan parlaj. Manachayqa usqhayllata Arabia cheqaman kachaykukorqani, chaymantataj Damasco llajtaman kutimorqani.

¹⁸ Chantá kinsa watanman jina Jerusalenman rerqani Pedrota rejsiyta munaspa, paywantaj chunka phishqayoj p'unchayta karqani.

¹⁹ Chaypitaj Jesuspa kuraj kachankunamanta wakinta mana rikorqanichu, manachayqa Tukuyta Kamachej Jesuspa wawqen Santiagollata.

²⁰ Diosmin yachan kayta qankunaman qhelqamuspaqa, mana llullakusqayta.

²¹ Chaymanta noqa Siria jap'iyman, chantá Cilicia jap'iyman ima rerqani.

²² Chaypacha Judea jap'iypi Cristoj iglesianmanta kajkuna manaraj rejsiwarqankuchu.

²³ Paykunaqa uyarillaj kasqanku: Jaqay, pichus ñawpajta qhatiykachawaj kanchej, chay kunanqa Jesusmanta sumaj willayta willashan, mayqentachus ch'inyachiyta munarqa, chayta, nispa.

²⁴ Ajinata paykuna Diosta jatuncharqanku imatachus Dios noqawan ruwasqanmanta.