Filipenses 4 - DIOSPA QHELQACHISQ

Diospi atinikuspa mayta kusikuna

¹ Chayrayku munasqa wawqe panakuna, qankunaqa Tukuyta Kamachej Jesuspi atinikuspallapuni kaychej. Noqa qankunata anchata rikuyta munashaykichej, imaraykuchus qankuna kusichiwankichej, llank'asqaymantataj t'inkay kankichej.

² Pananchej Evodiata, chantá pananchej Sintiqueta ima tukuy sonqo nini, Tukuyta Kamachej Jesusta qhatikoj kasqankurayku uj sonqolla kanankuta.

³ Jinallataj, munasqa kawsaqéy, tukuy sonqo mañakuyki chay iskay warmikunata yanaparinaykita, imaraykuchus paykuna noqawan khuska wajkunaman Jesusmanta sumaj willayta willanapi sinch'ita llank'arqanku. Paykuna Clementewan, chantá wajkunawan ima yanapawarqanku. Jinataj paykunaj sutinku churasqa kashan, ima p'anqapichus wiñay kawsayniyojkunaj sutinku qhelqasqa kashan, chaypi.

⁴ Qankuna Tukuyta Kamachej Jesusman ujchasqa kasqaykichejmanta kusikuychejpuni. Ujtawanpis nillaykichejtaj: Kusikuychej, nispa.

⁵ K'acha kasqaykichejta tukuy yachachunku. Cuentaman churaychej: Tukuyta Kamachej Jesuspa kutimunanqa qayllapiña.

⁶ Jinallataj ama imamantapis phutikuychejchu. Aswanpis Dioswan parlarikuspa, imatachus pisichikushasqaykichejta mañakuychej. Chantá imatachus ruwapususqaykichejmanta Diosta pachis niychej.

⁷ Ajinamanta Dios chay mana unanchay atina sonqo tiyaykuyninta qosonqachej, chaytaj Cristo Jesusnejta sonqoykichejta, yuyayniykichejtawan waqaychanqa.

Allin kajta ruwanapi yuyaychej

⁸ Kunanqa wawqe panakuna, parlayta tukunaypaj kaytawan nisqaykichej: Qankunaqa yuyaychej tukuy imachus cheqan, tukuy imachus respetowan qhawanapaj jina kanman, chantá tukuy cheqan kajpi ima. Jinallataj yuyaychej tukuy llimphu kajpi, tukuy k'acha kajpi, tukuy allinpaj qhawasqa kajpi ima. Ajinaqa tukuy imachus sumaj, chantá jatunchanapaj jina, chaypipis yuyallaychejtaj.

⁹ Jinataj noqaj yachachisqayta ruwaychejpuni, jinallataj simiymanta uyarisqaykichejta, chantá noqata ruwajta rikusqaykichejta ima ruwaychej. Ajinata ruwajtiykichejtaj, sonqo tiyaykuchej Dios qankunawan kanqa.

Pablota qolqewan yanapanku

¹⁰ Noqaqa Tukuyta Kamachej Jesusta may jinatapuni jatunchani, qankuna ujtawan yuyarikuwasqaykichejmanta. Yachani qankuna noqamanta mana qonqapuwasqaykichejta. Qankuna yanapawayta munarqankichej chaypis, mana aterqankichejchu.

¹¹ Chayta nishaykichej, mana pisichikusqayraykuchu, imajtinchus amañakuniña imachus tiyapuwasqanwan sonqo junt'asqa kayta.

¹² Noqa yachani pisichikuspa kawsay imachus kasqanta, jinallataj chhika patapi kawsaytapis. Yachallanitaj tukuy imaymana kawsaypi kawsayta, sajsasqa kayta, chayrí yarqhasqa kaytapis, jinallataj ashkha tiyapuyniyoj kayta, pisichikuytapis.

¹³ Tukuy imaymana rikhurimojtin, noqaqa sinch'ita sayayta atini Cristo kallpachawasqanrayku.

¹⁴ Chaywanpis, qankuna llakiyniypi yanapawaspa, allinta ruwarqankichej.

¹⁵ Maypachachus Macedoniamanta puririmorqani Jesuspa sumaj willayninta willayta qallarishaspa, chaypacha, Filipos llajtapi iglesiamanta kajkunalla qolqewan yanapawarqankichej. Mana waj iglesiapis noqamantaqa yuyarikuwarqachu.

¹⁶ Tesalonicapi kashaspa pisichikushajtiy, qankunalla kutin kutinta qolqeta apachimuwarqankichej.

¹⁷ Ajinata nispaqa, noqa mana mask'ashanichu astawan qonawaykichejta. Manachayqa munashani k'acha kasqaykichejrayku jatun t'inkata jap'inaykichejta.

¹⁸ Kaykama tukuy imachus pisiwasqanqa tiyapuwanña, chaymantapis astawanraj. Ashkhaña tiyapuwan, imaraykuchus Epafroditowan apachimuwasqaykichejta jap'iniña. Chay apachimuwasqaykichejqa ima munay q'apashaj jaywana jina, chaytaj Diosnejta allinpaj qhawasqa, sonqonpa munasqanman jinataj.

¹⁹ Chayrayku Diosneyqa t'ukuna qhapaj kayninman jina imamantachus pisichikushasqaykichejta Cristo Jesusnejta qosonqachej.

²⁰ Tata Diosninchej wiñay wiñaynintinpaj yupaychasqa kachun. Ajina kachun.

Pablo wawqe panakunata napaykun

²¹ Jesucristonejta Diospata tukuy kajkunaman noqaj sutiypi napaykapuwaychej. Noqawan kaj wawqe panakunapis napaykamullasunkichejtaj.

²² Jinallataj kaypi Diospaj tukuy t'aqasqa kajkuna napaykamullasunkichejtaj, astawanqa kuraj kamachej Cesarpa wasinpi kajkuna.

²³ Tukuychanaypaj kayta niykichej: Tukuyta Kamachej Jesucristoj qhasilla k'acha yanapaynin tukuy qankunawan kachun, nispa.