Filipenses 3 - DIOSPA QHELQACHISQ

Mana cheqanta yachachejkunamanta qhawakuna

¹ Munasqa wawqe panakuna, kaytapis nillaykichejtaj: Tukuyta Kamachej Jesusman ujchasqa kasqaykichejrayku kusikuychej. Noqaqa imatachus qankunaman qhelqaspa nisusqayta kutin kutinta nispa, mana sayk'unichu, imaraykuchus chayqa qankunapaj allin.

² Qhawakuychej alqo jina kaj runakunamanta. Paykuna millayta ruwajkuna kanku, jinallataj: Circuncidakunapuni tiyan, nispa yachachinku.

³ Noqanchejmin cheqapuni circuncidasqa kanchej, mana paykunachu, imaraykuchus Santo Espíritoj yanapasqan kaspa, Diostapuni yupaychanchej. Jinallataj Cristojta kasqanchejmanta kusikunchej, manataj runa imatachus ruwasqanpi atinikunchejchu.

⁴ Noqaqa imatachus ruwasqaymanta jap'ikuyta atiyman. Sichus pillapis runa imatachus ruwasqanpi atinikuyta yuyanman chayqa, noqaqa astawanraj atinikuyta atiyman.

⁵ Noqaqa paqarisqaymanta pusaj p'unchayninman circuncidasqa karqani. Jinallataj israelita kani Benjamín jatun ayllumanta. Ñawpa tataykunapuni hebreokuna karqanku. Diospa kamachisqanta junt'anamanta parlaspataj, fariseo karqani.

⁶ Chantá Diospa kamachisqanta junt'ayta munasqayrayku, noqa Cristoj Iglesianta qhatiykachaspa, ñak'aricherqani. Kamachisqakunata junt'anapitaj mana k'amina karqani.

⁷ Ñawpajta chaykunata sumaj valorniyoj kasqanta qhawarqani. Kunanrí Cristo noqapaj imatachus ruwasqanrayku chay tukuyta manakajpaj qhawani.

⁸ Cheqapuni ñawpajta imachus kasqayta qhasi manakajpaj qhawani, Tukuyta Kamachej Jesucristowan kawsakuna tukuy imamanta nisqaqa aswan sumaj kasqanrayku. Cristota munakusqayrayku noqa chay tukuy imata qhesachani, jinataj Cristota kasunayrayku q'opata jina qhawani, paywan ujchasqa kanaypaj.

⁹ Manaña Moisespa kamachisqankunata junt'aspachu cheqan runapaj qhawasqa kayta mask'ashani. Aswanpis Cristopi atinikusqayrayku cheqan runapaj qhawasqa kani, imaraykuchus Diosqa cheqan runapaj qhawawanchej Cristopi atinikusqanchejrayku.

¹⁰ Noqaqa Cristota astawan rejsiyta munani, chaywantaj niyta munani kawsarichej atiynin noqapi rikukunanta. Jinallataj paywan khuska ñak'ariyta munani. Wañunay kajtinpis, pay jinallataj wañuyta munani.

¹¹ Ajinamanta wañusqamanta kawsarimpuyta suyashani.

Atipajqa t'inkata jap'enqa

¹² Mana nishanichu qankunaman imatachus nisqayta noqa ruwasqaytaña, nitaj cheqan runa kanaman chayasqaytaña. Aswanpis sinch'ita kallpakuspa, ñawpajman rishallanipuni, maymanchus chayanay kashan, chayman chayanaypaj. Chaypajmin Cristo Jesús paypata kanaypaj ruwawarqa.

¹³ Wawqe panakuna, mana nishanichu noqa maymanchus chayanayman chayasqaytaña. Chaywanpis kayta ruwani: Imachus ñawpajta noqapaj aswan karqa, chayta qonqayman churaspa, maymanchus chayanay kashan, chayta qhawaspa kallpakuni.

¹⁴ Ñawpajman rishallanipuni, maymanchus chayanay kashan, chayman chayanaykama, janaj pachapi kaj t'inkata jap'inaypaj. Chay t'inkata jap'inanchejpaj Diosqa Cristo Jesusnejta wajyawarqanchej.

¹⁵ Ajinaqa, tukuy pikunachus Diospi atinikunapi yuyayninpiña kajkuna ajinata yuyana tiyan. Sichus wakinniykichej waj jinata yuyawajchej chayrí, chaytapis Diosllataj entiendechisonqachej.

¹⁶ Chaywanpis maykamañachus chayanchej, chay yachasqanchejman jina purinachej.

¹⁷ Chayrayku wawqe panakuna, noqa imaynatachus purini, ajinallatataj qankunapis puriychej, qhawaychejtaj pikunachus noqayku jina allinta purejkunata.

¹⁸ Imatachus ashkha kutita nerqaykichejña, chayllatataj kunanpis waqaspa nillaykichejtaj: Ashkha runa imaynatachus purisqankuwan yachayta qonku Cristo cruzpi wañusqanpa contranpi kasqankumanta.

¹⁹ Paykunaqa wiñay chinkayman rishanku, imaraykuchus paykunaj diosninkoqa sonqonkoj munasqanta ruwanalla. Chay runakuna p'enqayta ruwasqankumanta runaykachanku, sonqonkutaj kay pachapi millay kajllata mask'an.

²⁰ Noqanchejrí janaj pacha llajtayojkuna kaspa, qhespichejninchej Tukuyta Kamachej Jesucristo janaj pachamanta kutimunanta suyashanchej.

²¹ Chaypachataj pay pisi kallpa wañoj ukhunchejta waj jinaman tukuchenqa, paypa may sumaj lliphipej ukhun jina kananpaj. Chaytataj ruwanqa mayqen atiyninwanchus tukuy imata chakin uraman churanqa, chaywan.