Filipenses 2 - DIOSPA QHELQACHISQ

Cristo jina kanachej

¹ Ajinaqa Cristoman ujchasqa kasqaykichejrayku pay atiyta qosunkichej ujkunaj sonqonkuta kawsarichinaykichejpaj, pay munakususqaykichejraykutaj sonqochasqa kankichej. Chantá tukuyniykichejpi kikin Santo Espiritullataj kashan, jinallataj khuyakuyniyoj kankichej.

² Chayrayku qankuna uj sonqolla kaspa, kusiywan sonqoyta junt'achiychej. Chantá ujkuna ujkuna munakuspa, jinataj uj yuyaylla kaspa, uj ruwanallapi yuyaspa ima kusichillawaychejtaj.

³ Ama imatapis ruwaychejchu churanakuspa, chayrí jatunchakuspa. Manachayqa llamp'u sonqo kaywan imatapis ruwaychej. Sapa uj ujkunata qhawachun paymanta aswan kasqankuta jina.

⁴ Amataj pipis paypa allinnillantaqa mask'achunchu, manachayqa tukuypa allinninta.

⁵ Cristo Jesús imayna yuyayniyojchus karqa, ajinallataj qankunapis kaychej.

⁶ Cristoqa Diospuni kashaspapis, payqa Dios kayninmanta mana ch'ipakorqachu.

⁷ Manachayqa Dios jina jatunchasqa kayninta saqespa, wata runa jinaman tukorqa, runa jinallataj paqarerqa.

⁸ Payqa runaman tukuspa, pay kikin k'umuykorqa. Diosta kasuspataj, runa wañuchipis kanman jina cruzpi chakatasqa wañorqa.

⁹ Chayrayku Diosqa payta maytapuni jatuncharqa, jinaspataj, payman tukuy sutimantapis aswan sumaj sutita qorqa.

¹⁰ Ajinamanta Jesús Tukuyta Kamachej kasqanta rimarispa tukuy qonqorikonqanku, janaj pachapi kajkuna, kay pachapi kajkuna, chantá ukhu pachapi kajkunapis.

¹¹ Jinallataj tukuy runakuna Jesucristo Tukuyta Kamachej kasqanta rimarenqanku, ajinamanta Tata Dios jatunchasqa kananpaj.

Kay pachapi k'anchay jina kanchej

¹² Munasqa wawqe panakuna, noqa qankunawan kashajtiy, qankuna kasuwajpuni kankichej. Kunanrí qankunamanta karupi kashajtiy, astawanraj kasunawaykichej tiyan. Chayrayku atisqaykichejta ruwaychej qhespichisqa kasqaykichej imatachus ruwasqanta rikuchinaykichejpaj Diosta kasuspa, chantá payta may jatun respetowan qhawaspa ima.

¹³ Ajinata ruwaychej, imaraykuchus Diosmin allin kajta ruwayta munachisunkichej, payllataj ruwanaykichejpaj yanapasunkichej sonqonpa munasqanman jina.

¹⁴ Chantá tukuy imata ruwaychej ama thutuspa, nitaj churanakuspa,

¹⁵ ama pipis qankunamanta millayta rimanankupaj. Qankunaqa millayta ruwaj runakuna ukhupi Diospa wawankuna jina allinta puriychej, mana imamanta juchachanapaj jina. Ajinata ruwaspa, kay pachapi ch'aska jina lliphipirinkichej.

¹⁶ Jinallataj kawsayta qoj willaymanta jap'ikuspallapuni kaychej. Ajinamanta Cristoj kutimunan p'unchaypi noqa sonqo junt'asqa kasaj, imaraykuchus yachasaj kallpakusqay, ruwasqaytaj mana qhasichu kasqanta.

¹⁷ Diospi atinikuspa ruwasqaykichejqa Diosman jaywanatapis jaywashawajchej jina. Noqatachus wañuchiwanqanku chayqa, kawsayneyqa chay jaywasqaykichej patapi ch'ajchunapaj vino jina kanqa. Ajina kanman chayqa, noqa may jinata kusikusaj, munanitaj qankunapis noqawan khuska chaymanta kusikunaykichejta.

¹⁸ Ajinaqa qankuna noqawan khuska kusikuychej, noqapis qankunawan khuska mayta kusikusaj.

Pablota yanapajkuna

¹⁹ Sichus Tukuyta Kamachej Jesús munanqa chayqa, noqa Timoteota usqhayta kachamusaj qankunata watukusunaykichejpaj. Pay qankuna imaynachus kashasqaykichejta willawajtintaj, noqapis sonqo junt'asqa kusikusaj.

²⁰ Mana pipis Timoteo jina kanchu. Payqa qankuna allin kanaykichejta tukuy sonqo munan.

²¹ Wajkunarí paykunaj allinnillankuta mask'anku, manataj Cristo Jesuspa munasqantachu.

²² Qankunaqa Timoteo allinta purej kasqanta yachankichej. Jinallataj yachankichej Jesusmanta sumaj willayta willanapi yanapaysikusqanta, imaynatachus uj wawa tatanta yanapan, ajinata.

²³ Ajinaqa kaypi imaynachus rinawanta yachaytawan, noqa munani payta qankunaman kachamuyta.

²⁴ Jinallataj Tukuyta Kamachej Jesuspi atinikuspa, suyashani noqa kikiy qankunata watukoj usqhayta jamunayta.

²⁵ Yuyarqani wawqey Epafroditota qankunaman kachamunayqa allin kasqanta. Pay yanapawan, noqawan khuskataj Jesusmanta sumaj willayta willanapi sinch'ita sayarqa. Qankunataj payta kachamuwarqankichej, pisichikushajtiy yanapanawanpaj.

²⁶ Payqa qankunata maytapuni rikuyta munashan, llakisqataj kashan onqosqanta yachasqaykichejmanta.

²⁷ Arí, cheqapuni onqosqa karqa, wañupunanpaj jinaña. Chaywanpis Dios paymanta khuyarikorqa. Chantá noqamantapis khuyarikullawarqataj, ama llakiy patapi llakiy chayamunawanpaj.

²⁸ Chayrayku Epafroditota usqhayta kachamushani qankuna ujtawan payta rikuspa kusikunaykichejpaj, noqapis amaña llakikunaypaj.

²⁹ Qankuna payta Tukuyta Kamachej Jesuspa kamachinta jina may kusisqa wajyarikuychej. Jinallataj pikunachus pay jina kajkunatapis jatunpaj qhawaychej.

³⁰ Epafroditoqa Cristoj ruwananpi kasqanrayku yaqha wañorqa. Noqata yanapawaspa, wañuy patapiña kasharqa, imaraykuchus qankuna karupi kaspa, mana yanapawayta aterqankichejchu.