Ezequiel 8 - DIOSPA QHELQACHISQ

Templopi lantikunata churanku

¹ Babiloniaman apasqa kasqaykumanta sojta watamanta sojta kaj killanpi, phishqa p'unchayninpi noqa Ezequiel wasiypi tiyasqa kasharqani. Judamanta kaj kurajkunapis noqawan khuska tiyarikushallarqankutaj. Chaypacha Tukuyta Kamachej Tata Diosqa makinta patayman churaykuwarqa.

² Qhawarispataj, uj runata jina rikorqani. Payqa chakanmanta uraman ninaman rijch'akorqa, chakanmanta patamantaj llosq'ochasqa bronce jina lliphipisharqa.

³ Chay runaman rijch'akojtaj makinta aysarimuspa, chujchaymanta jap'iwarqa. Chantá Diospa Espíritun jallp'amanta pataman oqhariwaspa, mosqoypi jina Jerusalenman apawarqa. Chaypitaj Temploj ukhu kaj pationpi wichaynejman qhawaj punkuman churaykuwarqa, maypichus Tata Diosta phiñachej lanti kasharqa, chayman.

⁴ Chaypi Israelpa Diosninpa jatun kayninpa lliphipiynin kasharqa, imaynatachus mayu kantu pampapi mosqoypi jina rikorqani, chay jinallataj.

⁵ Chantá runaman rijch'akoj niwarqa: Runaj churin, wichaynejman qhawariy, nispa. Noqataj wichaynejta qhawarispa, punku yaykuna altar qayllapi Tata Diosta phiñachej lantita rikorqani.

⁶ Chantá runaman rijch'akoj niwarqa: Runaj churin, rikunkichu israelitakunaj millay ruwasqankuta, mayqenkunatachus ruwashanku ajllakusqay Templomanta karunchachinawankupaj, chaykunata? Chaywanpis chaymanta astawan millaytaraj rikunki, nispa.

⁷ Chaymanta patioman yaykuna cheqaman apawarqa. Perqapitaj uj jusk'uta rikorqani.

⁸ Chantá niwarqa: Runaj churin, kunan perqata astawan jusk'uykuy, nispa. Noqataj chay jusk'uta astawan jatunchaytawan, chaypi pakasqa uj yaykunata tarerqani.

⁹ Chantá niwarqa: Yaykuy, chaypitaj millachikunapaj millay ruwasqankuta rikunki, nispa.

¹⁰ Chantá noqa chayman yaykuspa, perqaj tukuy muyuyninta katarikunaman rijch'akojta pintasqata rikorqani, ch'ichipaj qhawasqa animalkunatawan. Jinallataj Israel aylloj tukuy lantinkukuna pintasqatapis rikullarqanitaj.

¹¹ Chay lantikunaj ñawpaqenkupitaj Israel ayllumanta qanchis chunka kurajkuna sayasharqanku. Safanpa churin Jazaniaspis paykunawan kasharqa. Chantá sapa ujninku incienso q'oshñichinayoj karqanku, incienso q'oshñitaj phuyu jina llojsisharqa.

¹² Chantá Tata Dios niwarqa: Runaj churin, imatachus israelitakunaj kurajninkukuna pakayllapi ruwashasqankuta rikunkichu? Sapa ujninku pintasqa lantinkoj wasinpi kashanku. Paykuna ninku: Tata Dios mana rikushawanchejchu. Payqa kay suyuta saqerpayan, nispa.

¹³ Chaymanta nillawarqataj: Chaywanpis chaymanta astawan millaykunataraj ruwajta rikunki, nispa.

¹⁴ Chantá Tata Diospa Templonman apawarqa wichay lado punkuman. Chaypitaj wakin warmikuna tiyasqa kashaspa, Tamuz nisqa lantimanta waqasharqanku.

¹⁵ Nillawarqataj: Runaj churin, chayta rikunki, icharí? Chaywanpis chaymanta astawan millaytaraj ruwashajta rikunki, nispa.

¹⁶ Chantá runaman rijch'akojqa Tata Diospa Templon ukhu pationman apaykuwarqa. Chaypitaj Temploman yaykuna punkumanta altarman rinapi, iskay chunka phishqayoj runakuna Tata Diospa Templonta wasanchakuspa, inti llojsimuy ladoman qhawarisqa pampaman k'umuykuspa intita yupaychasharqanku.

¹⁷ Chantá Tata Dios niwarqa: Runaj churin, imatachus ruwasqankuta rikunkichu? Judá aylloqa chay jina millayta ruwasqanwan mana sajsakunchu. Kay suyuman kallpaman atinikusqa millayta ruwanawan junt'achinku. Astawan astawan phiñachishawanku, millayta ruwasqankumanta asnasqantaj senqayman chayamuwan.

¹⁸ Chayrayku sinch'i phiñakuyniywan paykunata jasut'isaj. Paykunamantaqa mana uj chhikallantapis khuyakusajchu, nillataj paykunata saminchasajchu. Jatunmanta qhaparispapis wajyakuwachunku, noqaqa paykunata manapuni uyarisajchu, nispa nerqa Tata Dios.