Ezequiel 7 - DIOSPA QHELQACHISQ

Israel suyoj tukukuynenqa qayllapiña

¹ Tata Dios watej noqawan parlamuwaspa, niwarqa:

² Runaj churin, uyariway. Noqa Tukuyta Kamachej Tata Dios Israel aylluman nini: Kay suyoj tukukunan qayllapiña kashan, chayamushanña.

³ Israel, tukukunayki p'unchayqa chayamushanña, noqataj may phiñasqa qanman jamushayki. Purisqaykimanta cuentata mañasqayki, millayta ruwasqaykikunamantataj jasut'isqayki.

⁴ Mana khuyasqaykichu. Mana allinpi purisqaykimanta jasut'isqayki, millay ruwasqaykimantataj pagachisqayki. Ajinamanta qan yachanki noqa Tata Dios kasqayta.

⁵ Noqa Tukuyta Kamachej Tata Dios kay jinata nillanitaj: Ñak'ariy kawsayqa qhepan qhepanpi jamushan.

⁶ Kay suyoj tukukunan jamushan, qayllamushanñapuni. Qanpa tukukunayki p'unchayqa qayllamushanña.

⁷ Kay suyupi tiyakojkunaj tukukunaykichejqa chayamushanña. Qhollpikuna p'unchay chayamushan, manañataj orqokunapi kusikuy kanqachu.

⁸ Kunanpacha phiñakuyniyta pataykiman kachaykamusaj, chantá phiñakuyniyta qanpi thasnukusaj. Tukuy ruwasqaykimanta cuentata mañasqayki, millayta ruwasqaykimantataj jasut'isqayki.

⁹ Mana khuyasqaykichu. Mana allinpi purisqaykimanta jasut'isqayki, millay ruwasqaykitataj sut'inchasqayki. Ajinamanta qan yachanki noqa Tata Dios kasqayta.

¹⁰ Kayqa, chay p'unchay chayamunña. Chay phani chayamunña. Millayta ruwayqa tukuynejpi t'ika jina qhallallarishan, runaykachaytaj may jina kashan.

¹¹ Kallpaman atinikuspa ruwayqa astawan wiñarishan, millayta puriypis p'uturishallantaj. Chayrayku paykunamanta ni pipis qhepakonqachu, ni jatun llajtakuna nitaj may jina qhapaj kayninkupis.

¹² Kunan chay p'unchay chayamunña. Vendejpis, rantikojpis manaña kusikuchunkuchu, imaraykuchus noqa tukuy paykunata jasut'isaj.

¹³ Imatachus vendesqankuta mana ujtawan orqhokapuyta atenqankuñachu ni kawsashaspapis, imaraykuchus ashkha runapaj imatachus nisqayta junt'asajpuni. Imatachus kay llajtawan ruwanayta willaniña, chay nisqaytaqa junt'asajpuni. Millayta ruwasqankurayku wañunamanta mana llusp'enqankuchu.

¹⁴ Pututu waqajtin, maqanakuman rinankupaj tukuy wakichikunku. Chaywanpis mana pipis maqanakuman rejqa kanchu, imaraykuchus runaykachaj Israelta k'araj phiñakuyniywan jasut'isaj.

¹⁵ Llajtamanta jawapi maqanakuy tiyan, llajta ukhupitaj onqoy, yarqhay tiyan. Campopi kajkunaqa maqanakupi wañonqanku, llajtapi kajkunataj yarqhaywan, onqoykunawantaj wañuranqanku.

¹⁶ Tukuyninku mancharisqa urpi jina orqoman ayqenqanku chaypis, juchankurayku tukuy wañonqanku.

¹⁷ Tukuyninkojta makinku llawch'iyanqa, manchariywantaj chaki moqonkupis kharkatitenqa.

¹⁸ Llakiyninkuta rikuchispa, qhashqa p'achata churakonqanku, manchariywantaj kharkatitirenqanku. Tukuyninkojta umanku raphasqa kanqa, uyankupis p'enqaywan pukayarenqanku.

¹⁹ Qolqenkutapis qorinkutapis ñanman q'opata jina wijch'onqanku. Tata Diospa k'araj phiñakuynin p'unchaypi ni qorinku, nitaj qolqenkupis paykunata qhespichiyta atenqachu. Qolqenkoqa mana paykunata sajsachiyta atenqachu, nitaj wijsankutapis junt'achiyta, imaraykuchus qolqemanta wañurisqa kayninkoqa paykunata millay kawsayman aparqa.

²⁰ Valorniyoj jaluchunkumanta mayta runaykacharqanku, chaykunawantaj millay lantikunata ruwakorqanku. Chayrayku noqaqa k'acha jaluchunkuta q'opaman tukuchisaj.

²¹ Noqaqa waj llajtayojkunata kachaykusaj paykunamanta chay imakunata qhechunankupaj. Kay pachamanta astawan millay runakunaman tukuy kapuyninkuta jaywaykusaj. Tukuy kapuyninkuta millayman tukuchenqanku.

²² Noqa kay suyumanta wajnejman qhawaspa, saqesaj wajkuna noqapaj t'aqasqa cheqata ch'ichichanankuta. Ajinamanta millay suwa runakuna jamuspa, Temployta millachikunaman tukuchenqanku, nispa.

²³ Tata Dios nillarqapuni: Tukuy Israel suyuntinpi runa wañuchiy tiyan, Jerusalén llajtantinpitaj kallpaman atinikuspa millay ruwaykunawan junt'a kashan. Ezequiel, fierro cadenakunata wakichiy aylluykunata qhatatanapaj.

²⁴ Chantá noqa waj suyukunamanta mana khuyakuyniyoj runakunata pusamusaj, paykuna israelitakunaj wasinkukunata jap'ikapunankupaj. Atiyniyoj israelitakunaj jatunchakuyninkuta chinkachisaj, yupaychananku cheqakunatapis p'enqayman tukuchisaj.

²⁵ Manchay llakiy p'unchay chayamushanña. Chaypacha sonqo tiyaykusqa kawsayta mask'anqanku, manataj tarenqankuchu.

²⁶ Llakiy kawsayqa qhepan qhepanta chayamonqa, mana allin willaykunataj ñataj ñataj uyarikonqa. Yanqhallata mask'anqanku mayqellanpis Diosmanta sut'inchananta. Paykunata yachachinankupaj sacerdotekuna mana kanqachu, nitaj kurajkunapis paykunata yuyaychanankupaj kallanqatajchu.

²⁷ Kuraj kamachejninku llakiy p'achata churakonqa. Kamachejkunapis jatun llakiypi rikhurenqanku, tukuy runakunataj kharkatitenqanku. Noqaqa ruwasqankuman jina paykunata ruwasaj, juzgasqankuman jinataj paykunata juzgasaj. Ajinamanta noqa Tata Dios kasqayta yachanqanku, nispa.