Ezequiel 5 - DIOSPA QHELQACHISQ

¹ Chantá Tata Dios nillawarqataj: Runaj churin, sumaj filochasqa espadata oqharikuy, chayrí sunkhata raphanapaj jina navajata, chaywantaj chujchaykita, jinallataj sunkhaykitapis raphakuy. Chantá chujcha k'utukusqaykita balanzapi pesaspa, kinsaman t'aqanki.

² Maypichus Jerusalén llajtaman rijch'akojta dibujarqanki, chay llajtata jap'inapaj muyuykuna junt'akojtin, kinsaman t'aqasqa chujchaykimanta ujnin t'aqata llajta chawpipi ruphachinki. Chantá chay kinsaman t'aqamanta ujnin t'aqa chujchaykita llajtaj muyuyninpi espadawan k'uturanki. Uj kaj t'aqa chujchaykitataj wayrawan apachinki, imaraykuchus noqaqa judiokunaj qhepankuta espada oqharisqa risaj.

³ Jinallataj uj pisi chujchaykita jap'ispa, p'achaykej kantunman wataykuy.

⁴ Chay chujchallamantataj wakin chujchata ninaman enqhaykuy. Chayqa uj señal kanqa chaymanta llojsimoj ninawan tukuy israelitakuna ninawan ruphachisqa kanankumanta, nispa.

⁵ Tukuyta Kamachej Tata Dios kaytawan niwarqa: Kaymin Jerusalén llajta. Noqa kay llajtataqa ashkha suyukunaj chawpinpi, chantá llajtakunaj chawpinkupi ima churarqani.

⁶ Jerusalenrí kamachisqaypa contranpi, nisqaypa contranpi ima oqharikorqa. Paypa ruwasqanqa astawan millaypuni karqa muyuyninpi kaj llajtakunaj, chantá suyukunaj ruwasqankumanta nisqaqa, imaraykuchus nisqayta, kamachisqaytawan mana kasuspa, qhesacharqapuni, nispa.

⁷ Chayrayku Tukuyta Kamachej Tata Dios kay jinata nin Jerusalenpi tiyakojkunaman: Qankunaqa muyuyniykichejpi kajkunamantapis astawan millayta ruwankichej. Nisqayta mana kasunkichejchu, nitaj waqaychankichejchu. Nillataj muyuyniykichejpi kashanku, chay suyukunaj kamachisqankuman jinallapis purinkichejchu.

⁸ Chayrayku noqa Tukuyta Kamachej Tata Dios nini: Jerusalén, noqa contraykipi kashani. Muyuyniykipi kashanku, chay suyukunaj rikunankuta noqa jasut'isqayki.

⁹ Mana jayk'aj ruwasqayta qanwan ruwasaj, chayman rijch'akojtataj mana ujtawan ruwasajchu, chay tukuy ruwasqayki millachikunapaj jina kasqanrayku.

¹⁰ Chayrayku qankuna ukhupi wawankuta mikhuykojkuna kanqanku, jinallataj wawakunapis tatankuta mikhuykojkuna kallanqankutaj. Qanta noqa jasut'isqayki, qanmanta puchojtataj tukuynejman ch'eqerachisaj.

¹¹ Chantapis noqa Tukuyta Kamachej Tata Dios tiluspa nini: Noqapaj t'aqasqa Temployta chhika millayta ruwaspa ch'ichichasqaykichejrayku qankunata qhesachasqaykichej. Manataj saminchasqaykichejchu, nitaj khuyakusqaykichejchu.

¹² Qankunamanta kinsaman t'aqasqamanta ujnin t'aqaqa onqoywan chantá yarqhaywan ima callekunapi wañuranqanku. Ujnin t'aqataj muyuyniykichejpi awqaykichej espadawan wañurachenqanku, ujnin t'aqatataj tukuynejman ch'eqerachisaj, paykunaj qhepantataj espadawan qhatiykusaj.

¹³ Ajinata ruwaspa, k'araj phiñakuyniyta thasnukusaj. Tukuy phiñakuyniyta qankunawan pagachikusaj sonqoy tiyaykusqa kanankama. Phiñakuyniy tiyaykojtintaj, chaypacha yachankichej noqa Tata Dios qankunamanta celosakuspa chayta nisqayta, nispa.

¹⁴ Tata Dios nillarqataj: Jerusalén llajta, qanta ch'in pampaman tukuchisqayki. Muyuyniykipi kashanku, chay suyukunaj ñawpaqenkupi p'enqaypi rikhurichisqayki tukuy rikusunankupaj.

¹⁵ Maypachachus noqa qanta jasut'ispa k'araj phiñakuyniywan sinch'ita ñak'arichisqayki chaypacha, tukuy runakuna alqochakusonqanku, mana allinpajtaj qhawasonqanku. Muyuyniykipi kaj suyukunapis qanta rikuspa, mancharikonqanku, wananqankutaj. Noqa Tata Diosmin chaytaqa nini.

¹⁶ Noqa wañuchej flechata jina yarqhayta qankunaman apachimusqaykichej. Arí, mikhunata pisiyachispa, yarqhaywan ch'ayñarayachisqaykichej.

¹⁷ Noqapuni yarqhayta, onqoyta, wañuyta ima apachimusqaykichej. K'ita phiña animalkunatapis kachaykamullasqaykichejtaj mana wawayojta saqesunaykichejpaj. Jinallatataj qankunamanta maqanakupi ashkha wañurachisqa kanaykichejta saqellasaj. Ajinata noqa Tata Dios nini.